ސައުދީ އަރަބިއާގެ ފޮރިންގ މިނިސްޓަރަށް މިހަފްތާގެ ބުރާސްފަތި ދުވަހު ފޯނުން ގުޅުއްވުމަށްފަހު، އެމެރިކާއިން އެެގައުމަށް ފޯރުކޮށްދެމުންދާ އެހީތެރިކަން އިތުރުކުރައްވާނެ ކަމަށާއި އަދި ސައުދީއާއި އެމެރިކާއާދެމެދު އޮތް ޒަމާންވީ މުހިންމު ގުޅުން އިތުރަށް ވަރުގަދަ ކުރައްވާނޭކަމުގެ ޔަގީންކަން، އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކަން ދެއްވައިފިއެވެ.
މި ފޯން ކޯލްގައި ބްލިންކަންއާއި ސައުދޫ ފޮރިންގ މިނިސްޓަރ ޕްރިންސް ފައިސަލް ބިން ފަރުހާން ވަނީ އަފްއާނިސްތާންގެ ހާލަތާ ގުޅޭގޮތުންނާއި، ސަރަހައްދީ އިތުރު މައްސަލަތަކުގެ އިތުރުން، އިރާނުން އެހީތެރިކަން ފޯރުކޮށްދޭ ޔަމަނުގެ ހޫތީ ޖަމާއަތުން ސައުދީއަށް ދެމުންދާ ހަމަލާތަކާ ގުޅޭގޮތުންވެސް މަޝްވަރާ ކުރައްވާފައެވެ.
"ސެކެޓްރީ އޮފް ސްޓޭޓްވަނީ، ސައުދީ އަރަބިއާއާއި އެމެރިކާއާ ދެމެދު އޮތް ޒާމާންވީ ސްޓަރަޓީޖިކް ގުޅުން ވަރުގަދަކޮށް ދަމަހައްޓާނެ ކަމުގެ ޔަގީން ދިނުމުގެ އިތުރުން، އުދުވާނީ ހަމަލާތަކުން ސައުދީ އަރަބިއާ ހިމާޔަތް ކޮށްދޭނޭ ކަމުގެ ޔަގީންކަންވެސް ދީފަ،" މި ފޯން ކޯލްގެ ތަފަސީކޮށް ދެމުން ސްޓޭޓް ޑިޕާޓްމަންޓުން ހާމަ ކޮށްފައި ވެއެވެ.
ޔަމަނުގެ ހޫތީން ވަނީ، ބޮން ހަރުކޮށްފައިވާ ޑްރޯން ބޭނުކޮށްގެން ސައުދީގެ އަބުހާ އެއަރޕޯޓަށް މިހަފްތާގެ ކުރީކޮޅު ހަމަލާ ދީފައެވެ. މި ހަމަލާގައި އާންމުންގެ މަދުވެގެން 8 މީހަކަށްވަނީ އަނިޔާވެފައެވެ.
މި ހަމަލާތައް ބައިނަލް އަގުވާމީ މުޖުތަމަޢުންވަނީ ކުއްވެރި ކޮށްފައެވެ.
މީގެ އިތުރުން، އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާން ނެޑް ޕްރައިސްވެސް ވަނީ މިހަފްތާގެ ބުރާސްފަތި ދުވަހު ހޫތީންނަށް ވަރަށް ބޮޑަށް ފާޑު ވިދާޅުވެފައެވެ. "ހަގީގަތަކީ އަހަރަމެންގެ މުހިންމު ބައިވެރިއެއް ކަމުގައިވާ ސައުދީ އަރަބިއާއަށްވަނީ، ޔަމަނުން ވަރަށް ބޮޑު ނުރައްކަލަކާ ކުރިމަތި ލާން ޖެހިފަ. އަހަރެމެން އަހަރެމެންގެ ބައިވެރިންނާ އެކީ ދެމި ތިބޭނަން،" ކޮންމެ ދުވަހުވެސް ބާއްވަމުންދާ ޕްރެސް ބްރީފިންގައި ރިޕޯޓަރުންގެ ސުވާލުތަކަށް ޖަވާބު ދެއްވަމުން ޕްރައިސް ވިދާޅުވެފައި ވެއެވެ.
އެމެރިކާއިން ސައުދީއަށް ފޯރުކޮށް ދެމުންދާ އެހީތެރިކަމަށް އެއްވެސް ބަދަލެއް އަތުވެދާނެތޯ ކުރެވުނު ސުވާލުގެ ޖަވާބުގައި ޕްރައިސް ވިދާޅުވެފައިވަނީ، "އަހަރެމެންނާ ސައުދީ އަރަބިއާއާއި ދެމެދު، ޓެރަރިޒަމާއި އަދި ސަލާމަތީ ކަންކަމާ ގުޅޭގޮތުން އޮތީ ވަރަށް ވަރުގަދަ ގުޅުމެއް،: ކަމުގައެވެ.
ކޮމެންޓު ފޮނުވާ