ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށްވުރެ އަނިޔާވެރިއެއް ދެކެވަޑައި ނުގަންނަވާކަމަށް ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ޤާސިމް އިބްރާހީމް ވިދާޅުވެއްޖެއެވެ.
ބިމާއި ބެހޭ ޤާނޫނަށް މަތިވެރި ދާއިރާގެ މެންބަރު ޙަސަން ޒަރީރު ހުށައަޅުއްވާފައިވާ އިޞްލާހަށް ބަހުސްކުރެއްވުމުގެ މަރުހަލާގައި ނައިފަރު ދާއިރާގެ މެންބަރު އަޙްމަދު ޝިޔާމް ވަނީ ބިމުގައި އިންސާފު ޤާއިމްވާންޖެހޭކަމަށް ވިދާޅުވެ ރައީސް ޔާމީންގެ ޝަރީޢަތާއި ގުޅޭގޮތުން ލީކުވެފައިވާ އޮޑިއޯއަށް އިޝަރަތްކުރައްވާ ވާހަކަފުޅު ދައްކަވާފައެވެ.
ޝަރީޢަތާއި ގުޅޭގޮތުން މެންބަރު ޝިޔާމް ވާހަކަފުޅު ކުރިއަށް ގެންދަވަނީ މަޖިސް ނިޒާމީ މައްސަލައިގެ އޮއިވަރެއްގައި ޖެހި އެމްޑީޕީގެ މެންބަރުން ނިޒާމީ މައްސަލަތައް ނަންގަވަމުން ގެންދެވިއެވެ. އަދި މާމިގިލީ ދާއިރާގެ މެންބަރު ޤާސިމް އިބްރާހީމްވެސް ވަނީ ނިޒާމީ މައްސަލައެއް ނަންގަވާ އެމަނިކުފާނަށް ރައީސް ޔާމީންގެ ވެރިކަމުގައި ކުރެއްވި ހުކުމުގެ ހަނދާންތައް އައުކުރައްވާފައެވެ. ޤާސިމް ވިދާޅުވީ އެމަނިކުފާނުގެ މައްޗަށް ކުރީ ސަރުކާރުގައި ޙުކުމް އިއްވެވީ ބަލިވެ ހޮސްޕިޓަކުގައި އޮންނަވަނިކޮށް ޣައިރު ޙާޒިރުގައިކަމަށެވެ. އަދި ރައީސް ޔާމީނަށްވުރެ ބޮޑު އަނިޔާވެރިއެއް ދެކެވަޑައިގެންފައި ނުވާކަމަށްވެސް ވިދާޅުވެ އިދިކޮޅު މެންބަރުންނަށް ޤާސިމް ރައްދު ދެއްވިއެވެ.
ބަލިވެ އޮއްވަ ހުކުމްކުރީ ކާކުތޯ؟ އެދުވަހު އެއްވެސް ފަރާތެއް އަޑު ނެތީ ކީއްވެތޯ؟ރައީސް ޔަމީންނަށްވުރެ ބޮޑު އަނިޔާވެރިއެއ،ް ވަގެއް އަޅުގަނޑު ނުދެގެން.
– ޤާސިމް އިބްރާހީމް ވިދާޅުވިއެވެ.
ޤާސިމް ވިދާޅުވީ އިދިކޮޅު ޕީޕީއެމް ޕީއެންސީގެ މެންބަރުންނަށް އަދުލްއިންސާފުގެ ވާހަކަ ނުދެއްކޭނެކަމަށެވެ.
ގާސިމް އިބްރާހީމް ތިން އަހަރާއި ދެ މަހާއި 12 ދުވަސް ވަންދެން ޖަލަށް ލުމަށް ހުކުމް ކޮށްފައިވަނީ، އޭރުގެ ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަަމަށް 27 މާޗް 2017 ގައި ނަގަން އޮތް ވޯޓުގެ ކުރިން، މާޗް 26 ވަނަ ދުވަހުގެ ރޭ ޖުމްހޫރީ ޕާޓީގެ އޮފީސް، މ. ކުނޫޒުގައި ބޭއްވި ޖަލްސާގައި ވާހަކަފުޅު ދައްކަވަމުން މަޖިލިސް މެންބަރުންނަށް ނުފޫޒު ފޯރުވައި، މެންބަރުންނަށް ރިޝްވަތި ހުށަހެޅުއްވި ކަމަށް ވުނެ ދައުލަތުން އުފުލި ރިޝްވަތު ދިނުމަށް ހުށަހެޅުމުގެ ދައުވާގައެވެ.
ގާސިމް ހޮސްޕިޓަލުގައި އެޑްމިޓް ކޮށްފައިވަނިކޮށް، ޣައިރު ހާޒިރުގައި 2017 އޯގަސްޓް 24 ވަނަ ދުވަހުގެ ރޭ އިއްވި ހުކުމުގައި ބުނެފައިވަނީ ގާސިމް ދައްކަވާފައިވާ ވާހަކައަކީ، ވަކި ބަޔަކަށް އަމާޒުކޮށް ހާއްސަ ކުރެވިގެން ދައްކަވާފައިވާ ވާހަކައެއް ކަމާއި އާންމު ރައްޔިތުންނަށް އަމާޒުކޮށްގެން ސިޔާސީ ފަރާތްތަކުން ކުރަމުންދާ ސިޔާސީ ވައުދުތަކާއި ޤާސިމް ރައްޔިތުންގެ މަޖިލީހުގެ މެންބަރުންނަށް ޚާއްޞަކޮށް ދީފައިވާ ދައުވަތުގެ ޢިބާރާތާއި، ތަފާތު ވެގެންވާ ކަމަށް ވެސް ބުނެފައިވެއެވެ.
ޤާސިމް ބޭނުންކުރެއްވި، ޢިބާރާތަކީ ދިވެހިރާއްޖޭގެ ސިޔާސީ މަސްރަޙުގެ ޢުރުފު ޤަބޫލުކޮށްފައިވާ ފަދަ ޢިބާރާތެއްކަން ނުވަތަ ޤާސިމްގެ ފަރާތުން ދައްކާފައިވާ ވާހަކަ އަކީ ޤާނޫނު އަސާސީއާއި ޤާނޫނީ އިމުގެ ތެރެއިން ދައްކާފައިވާ ވާހަކައެއްކަން ނުވަތަ އެނޫންވެސް ދިފާޢެއް ޤާސިމަށް ލިބިގެންވާކަން ދިފާޢު އިން ސާބިތުކޮށްދޭންޖެހޭ މިންގަނޑަށް ސާބިތުކޮށްދެވިފައިނުވާ ކަމަށް ވެސް ހުކުމުގައި ބުނެފައިވެއެވެ.
