ރައީސް ޔާމީންގެ ޝަރީއަތުގެ މަޖިލިސް ބެއްލެވި ތިން ފަނޑިޔާރެއްގެ އޯޑިއޯ ލީކުވި މައްސަލަގައި މިއަދު މަޖިލިސް ޖަލްސާގެ ތަޅުން ހޫނުވެ އިދިކޮޅު މެމްބަރުން އިހުތިޖާޖު ކުރަން ފަށައިފިއެވެ.
މިއަދުގެ ޖަލްސާއަށް ނައިފަރު ދައިރާގެ މެމްބަރު އަހުމަދު ޝިޔާމް ވަނީ މަޖިލީހަށް ކުއްލި މައްސަލައެއް ހުށަހަޅާފައެވެ. ނަމަވެސް އިތުރު ކުއްލި މައްސަލައެއް މަޖިލީހަށް ހުށަހަޅާފައިވުމުން ގުރުއަތު ނަގައިގެން ބަހުސް ކުރުމަށް ދިމާވީ، މަކުނުދޫ ދާއިރާގެ މެމްބަރު މުހައްމަދު ރައީ ހުށަހެޅި މައްސަލައެވެ.
ކުއްލި މައްސަލައަށް ޖާގަ ނުލިބުމުން، މަޖިލީހުގެ ތަޅުމުގައި އަޑުގަދަކޮށް، އިދިކޮޅު މެމްބަރުން ދަނީ އިހުތިޖާޖު ކުރަމުންނެވެ. އިދިކޮޅު މެމްބަރުންވަނީ މިއަދު މަޖިލީހުގައި މިހުކުގެ މައްސަލަ ބެލުމަށްވުރެ ވަކި އެހެން މުހިންމު މަސައްކަތެއް ނެތްކަމަށެވެ. މިމައްސަލާގައި މަޖިލީހުގައި ހިމެނޭ އިދިކޮޅު މެމްބަރުންނާއި، ސަރުކާރަށް ތާއީދު ކުރާ އެމްޑީޕީގެ މެމްބަރުންގެ މެދުގައި ބަހުގެ ހޫނު ހަމަލާތަކެއް ދަނީ ބަދަލު ކުރަމުންނެވެ.
މަޖިލިސް ރައީސްގައި އިންނެވި، ހަސަން އަފީފް ވިދާޅުވަމުން ދަނީ މިމައްސަލައަކީ މަޖިލީހަށް ބެލޭނެ ކަމެއް ނޫންކަމަށެވެ. މިމައްސަލަ ބަލާނަމަ ހުށަހަޅަން ޖެހޭނީ ކޯޓިތަކަށް ކަމަށް އަފީފް ވަނީ ވިދާޅުވެފައެވެ.
