މަޖިލީހުގެ ރައީސްއާއި ނާއިބު ރައީސްވެސް ނެތި މަޖިލިސް ކުރިއަށް!

ރައްޔިތުންގެ މަޖިލީހުގެ ރައީސްއާއި ނާއިބު ރައީސް ނެތި މަޖިލީހުގެ މަސައްކަތްތައް  ކުރިއަށްގެންދަންޖެހިއްޖެއެވެ.

މެއި 6 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ދިން ނުރައްކާތެރި ޓެރަރިސްޓް ހަމަލާއާއި ގުޅިގެން އެމަނިކުފާނު ހުންނެވީ ބޭސްފަރުވާއަށް ރާއްޖެއިން ބޭރުގައެވެ. އެގޮތުން އިތުރު ފަރުވާއަށް ޖަރުމަންވިލާތަށް ވަޑައިގަތުމަށްފަހު  މިހާރު އެމަނިކުފާނު ހުންނެވީ އިނގިރޭސިވިލާތުގައެވެ.

މަޖިލީހުގެ ރައީސް ވަޑައިގެން ނެތް ހާލަތެއްގައި މަޖިލީހުގެ އެންމެހާ ޒިންމާތައް އުފުއްލަވަންޖެހިވަޑައިގަންނަވަނީ މަޖިލީހުގެ ނާއިބު ރައީސްއެވެ. ނަމަވެސް އެނގިފައިވާގޮތުން މަޖިލީހުގެ ނާއިބު ރައީސް އީވާ ޢަބްދުﷲވެސް މިވަގުތު ރާއްޖޭގައި ނެތެއެވެ. އެކަމަނާ ކޮންމެހެން ކުރައްވަންޖެހިވަޑައިގަންނަވާ ދަތުރެއްގައި މިހާރު ހުންނެވީ ރާއްޖެއިން ބޭރުގައެވެ. މަޖިލީހުގެ ރައީސްއާއި ނާއިބު ރައީސް ރާއްޖޭގައި ނެތުމުން، މިހާރު މަޖިލީހުގެ ރިޔާސަތު ބަލަހައްޓަވަމުން ގެންދަވަނީ ވިލުފުށީ ދާއިރާގެ މެންބަރު ޙަސަން އަފީފްއެވެ.

އަދި މަޖިލީހުގައި ކޮންމެހެން ނިންމަވަންޖެހޭ ކަންކަމާއި އަންގަވަންޖެހޭ އެންގެވުންތަކުގެ މަސައްކަތްވެސް ކުރައްވަނީ ވާރޗުއަލްކޮށެވެ. މިގޮތުން ލިޔެކިޔުންތަކުގައިވެސް ސޮއިކުރައްވަމުން ގެންދަވަނީ ޑިޖިޓަލް ސިގްނެޗާ ބޭނުންކުރައްވައިގެންނެވެ. އެކަމުގ ެސަބަބުން ބައެއް ދަތިތަކާއި ކުރިމަތިވާކަމަށް ބައެއް މެންބަރުން ވިދާޅުވެއެވެ.

މަޖިލީހުގެ ރައީސް ނަޝީދު އިނގިރޭސިވިލާތުގައި ހުންނަވައިގެން މަޖިލީހުގެ އިދާރާއަށް ފޮނުއްވެވި ސިޓީގައިވެސް ވަނީ، އެމަނިކުފާނަށް ދެވުނު ހަމަލާއާއި ގުޅިގެން ތަހުގީގް ނިންމައި ހަމަލާގައި ބައިވެރިވި އެންމެން ހައްޔަރުކޮށް ތަހުގީގް ނިމުމުން ނޫނީ ރާއްޖެ ވަޑައި ނުގަތުމަށް ނިންމަވާފައިވާކަމަށެވެ.

މިސިޓީގައި މަޖިލިސް ރައީސް ވަނީ އެމަނިކުފާނަށް ދެވެނު ހަމަލާގެ ތަހުގީގް ނިމި އެހަމަލާއަށް ފަންޑު ކުރި މީހުންނާއި، ހަމަލާގައި ބައިވެރިވި އެންމެންގެ މައްސަލަތައް ތަހުގީގް ކުރެވުމުން ނޫނީ ރާއްޖެ ވަޑައިގަތުމަކީ އެމަނިކުފާނުގެ އާއިލާއާއި ހެޔޮއެދޭ އެތައް ބަޔަކު އެދޭ ގޮތެއް ނޫންކަމަށެވެ.

6 މޭ 2021 ވަނަ ދުވަހު އަޅުގަނޑަށް ދިން ޙަމަލާ ރާވައި ހިންގި ފަރާތްތަކުގެ ތަޙްޤީޤު އަދި ނުނިމި ކުރިއަށްދާކަމަށް ދިވެހި ފުލުހުންގެ ޚިދުމަތުން ބުނޭ. އެ ތަޙްޤީޤު ނިމި، އެކަން ރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރީގައި އަޅުގަނޑު ރާއްޖެ ދިޔުމަކީ އަޅުގަނޑުގެ އާއިލާއާއި އަޅުގަނޑަށް ހެޔޮއެދޭ އެތައް ބަޔަކާއި އަޅުގަނޑުވެސް ޖެހިލުންވާކަމެއް.

– މަޖިލިސް ރައީސްގެ ސިޓީގައި ވެއެވެ.

އެހެންކަމަށް ވުމުން މިމައްސަލަ މިހާރުވެސް ތަހުގީގް ކުރެވެމުންދާއިރު، ތަހުގީގް ނިމެންދެން ރާއްޖެއިން ބޭރުގައި ރަސްމީ މަސައްކަތުގައި އުޅެވޭ ގޮތަށް ޗުއްޓީ ހަމަޖައްސަވައި ދެއްވުމަށް ރައީސް ނަޝީދު ވަނީ އެދިވަޑައިގެންފައެވެ.

މަޖިލިސް ރައީސް ވަނީ މަޖިލީހުގެ ކިބައިން ޗުއްޓީގެ މުއްދަތު އިތުރުކޮށްދެއްވައި، ރާއްޖެއިން ބޭރުގައި ދިރިއުޅުމަށް ހިތް ޚަލާޞްކުރައްވައި، އެފުރުސަތު ފަހިކޮށްދެއްވުމަށް އެދިފައެވެ. އަދި ރާއްޖެއިން ބޭރުގައި ހުންނައިރު މަޖިލީހުގެ އެންމެހައި ކަންކަން ޤާނޫނުއަސާސީ އާއި މަޖިލީހުގެ ގަވާއިދުގައިވާ ގޮތުގެމަތިން މަޖިލީހުގެ މެންބަރުންގެ އިރުޝާދުގެ ދަށުން މަޖިލީހުގެ ނައިބު ރައީސް އިސްވެ ހުންނަވައި މަޖިލީހުގެ އިދާރާއިން ހިންގާނެކަމީ ހިތުގައި އެއްވެސް ޝައްކެއް އުފެދޭކަމެއްނޫންކަމަށް ވަނީ ވިދާޅުވެފައެވެ.