ލިފްޓުތަކުގެ މަސައްކަތް ނިމިފައިވާތީ ފްލެޓްތަކަށް ކަރަންޓު ދިނުމުގެ މަސައްކަތް އަލުން ފަށާފައިވާކަމަށް ސްޓެލްކޯއިން ބުނެފިއެވެ.
ސްޓެލްކޯއިން ހިޔާ ފްލެޓްތަކަށް ކަރަންޓު ދިނުމުގެ މަސައްކަތް މެދުކަނޑާލީ، މަސައްކަތް ނިމިފައިނުވާ ލިފްޓެއް ބޭނުންކުރުމުގެ ތެރޭގައި ލިފްޓުގައި ބަޔަކު ތާށިވުމާގުޅިގެން ހައުސިން ޑެވެލޮޕްމަންޓް ކޯޕަރޭޝަން އެޗްޑީސީގެ އެންގުމަކަށެވެ.
ސްޓެލްކޯ އިން މިދިޔަ ހޮނިހިރު ދުވަހު ބުނި ގޮތުގައި ހިޔާ ޓަވަރުތަކަށް ކަރަންޓް ދިނުން މެދުކަނޑާލީ ޓަވަރުތަކުގެ ލިފްޓްތައް ކޮމިޝަންކޮށް ނިމެންދެނެވެ. އެގޮތަށް ނިންމީ އެޗްޑީސީއާ ވެސް މަޝްވަރާ ކުރުމަށް ފަހުއެވެ. ލިފްޓްތައް ކޮމިޝަންކޮށް ނިމުމުން މިއަދު އަލުން ކަރަންޓް ދޭން ފަށާފައި ވަނީ ހިޔާގެ 15 އަދި 16 ވަނަ ޓަވަރުގައި ކުރިން ކަރަންޓު ނުދެވި ހުރި ފްލެޓްތަކަށެވެ.
އެގޮތުން ކުރިންވެސް ހަމަޖެހިފަވާގޮތަށް ފްލެޓް ލިބުނު މީހުންނަށް، އެސް.އެން.އެސް މެދުވެރިކޮށް، ހާޒިރުވާންޖެހޭ ގަޑި އަންގަމުންދާނެކަމަށެވެ. އެސްއެމްއެސް ލިބުމުން އެ ފަރާތަކަށް ޚާއްސަކޮށްފަވާ ގަޑިއަށް، ސްޓެލްކޯއިން ދީފަވާ ސްލިޕާއެކު ފްލެޓަށް އައުމަށްވަނީ އެދިފައެވެ. ފްލެޓްތަކުގެ އެތެރޭގަ ނުނިމި ހުރި މަސައްކަތްތައް ފެށޭނީ، ލިފްޓްތަކުގެ މަސައްކަތް ނިންމުމަށްފަހު ފްލެޓްތަކަށް ކަރަންޓު ގުޅުމުގެ މަސައްކަތް ނިމުމުންނެވެ.
ލިފްޓްތަކުގެ މަސައްކަތް ނިމެންދެން، ލިފްޓް ބޭނުންކުރުމަކީ ރައްކާތެރި ކަމެއް ނޫންކަން އެޗްޑީސީން މިހާރުވަނީ އަންގާފައެވެ. ހުރިހާ ޓަވަރެއްގެ ލިފްޓްތަކެއްގެ މަސައްކަތް ނިމޭނެކަމަށް އެޗްޑީސީން ތާވަލްކޮށްފަވަނީ މިމަހުގެ 30ވަނަ ދުވަހަށެވެ. މަސައްކަތް ކުރިއަށްގެންދަނީ ފަހަރަކު 2 ޓަވަރަށް ބަހާލައިގެންނެވެ. ލިފްޓްގެ މަސައްކަތަށްފަހު ކަރަންޓުގެ މަސައްކަތް ނިމުމުން، އެތެރޭގެ މަސައްކަތްތައް ކުރިއަށްގެންދިއުމަށް ފްލެޓަށް ވަދެވޭނެއެވެ.
ދާއިމީ ކަރަންޓު މިހާތަނަށް، 8ޓަވަރަށްވަނީ ފޯރުކޮށްދީފައެވެ. އެއީ އެޗް-3، އެޗް-4، އެޗް-7، އެޗް-8، އެޗް-11، އެޗް-12، އެޗް-15 އަދި އެޗް-16އެވެ. ނަމަވެސް މި ތަންތަނަށް ވަދެވޭނީ ލިފްޓްތަކުގެ މަސައްކަތް ނިމުމުންނެވެ.
