ޤާނޫނުލް އުޤޫބާތަށް އިޞްލާހު ހުށައެޅުއްވީ ދީނީ އެއްބައިވަންތަކަމަށް ލޮޅުން އެރިޔަ ނުދިނުގެ މަޤްޞަދުގައިކަމަށް ތުޅާދޫ ދާއިރާގެ މެންބަރު ޙިސާން ޙުސައިން ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް ބިލު ހުށައަޅުއްވަމުން ތުޅާދޫ ދާއިރާގެ މެންބަރު ޙިސާން ޙުސައިން ވިދާޅުވީ، ރާއްޖެއަކީ އިސްލާމީ ގައުމެއްކަމަށާއި، ރާއްޖޭގެ މުޅި ދައުލަތް ތަރުތީބުވެ ބައްޓަންކުރަންވާނީ އިސްލާމީ އުސޫލުތަކުގެ މައްޗަށްކަމަށެވެ. އެކަން ޤާނޫނުއަސާސީގައި ވަރަށް ސާފުކޮށް ބަޔަންކޮށްފައިވާކަން ފާހަގަކުރައްވަމުން ޙިސާން ވިދާޅުވީ، އިސްލާމީ ޝަރީޢަތުގައި ނުވަތަ ޤާނޫނުގައި ކަނޑައެޅިގެން މަނާކޮށްފައިނުވާ ކޮންމެ ކަމެއްކުރުމުގެ މިނިވަންކަން ކޮންމެ ރައްޔިތަކަށްމެ ލިބިގެންވާކަމަށެވެ.

ޙިސާން ވިދާޅުވީ ޤާނޫނުލް އުގޫބާތަށް ހުށައެޅުއްވި އިޞްލާހަކީ، މިހާރު ދިވެހިރާއްޖެއަށް ވަރަށް މުހިންމުވެފައިވާ ބިލެއްކަމަށް ދެކެވަޑައިގަންނަވާކަމަށެވެ. ދިވެހިރާއްޖޭގެ އިސްލާމީ ވެށި ހިމާޔަތްކުރުމާއި އިސްލާމީ އަގުކުރުންތައް މަތިވެރިކުރުމަށްޓަކައި އެބިލު މުހިންމު ދައުރެއް އަދާކުރާކަމަށާއި، މަދުން ނަމަވެސް، އިސްލާމްދީނަށް ކުޑައިމީސް ވާގޮތަށް ވާހަކަދެއްކުމާއި، ދީނީ ޝިއާރުތަކާއި ބައެއް ކަހަލަ ތަސައްވުރުތަކަށް އިހާނެތިކޮށް ވާހަކަދެއްކުމަކީ މުޖްތަމައިން ފެންނަމުންދާ ކަމެއްކަމަށް ޙިސާން ވިދާޅުވިއެވެ. މިކަމަކީ ޤާނޫނުއަސާސީ ތަންދޭކަމެއް ނޫންކަމަށްވެސް ޙިސާން ވިދާޅުވިއެވެ.

ވަކި މީހަކީ ކާފަރެއް ކަމުގައި ލޭބަލްކޮށް، އޭނާގެ ފުރާނަ ނުރައްކަލަށް ހުށަހެޅިދާނޭ ފަދަ ވާހަކަ ދެއްކުން ކުށަކަށް ހެދުމަށްޓަކައި މި މަޖިލީހަށް ސަރުކާރުން ބިލެއް ހުށަހަޅާފައިވޭ. އޭގެ ބޭނުމަކީ އެފަދަ ކަންކަމުން އުފެދޭ ފިތުނަތަކުން ދުރުވުން. އަޅުގަނޑުމެންގެ ދީނީ އެއްބައިވަންތަކަމަށް ލޮޅުން އެރިޔަ ނުދިނުން. އެ ބިލުގެ މަގުސަދާއި، މި ބިލުގެ މަގުސަދަކީވެސް، އިސްލާމް ދީނުގައި، އެފަދަ ކަންކަމުގައި ކަނޑައަޅާފައި ހުރި ހަރުދަނާ އުސޫލުތައް ނެގެހެއްޓުން.

– ޙިސާން ޙުސައިން

އިސްލާމްދީނަށް ކުޑައިމީސްކޮށް އިސްލާމްދީނަށް ޖޯކު ޖަހައި، އިސްލާމް ދީނަށް މަލާމާތެއް ރައްދުވެދާނެ ގޮތަކަށް އެއްވެސް ސިފައެއްގައި ވާހަކަދެއްކުމަކީ، އިސްލާމީ ވެއްޓެއްގައި އިސްލާމީ ދައުލަތެއްގައި ކުށެއްކަމުގައި އޮންނަންޖެހޭނެ ކަމެއްނޫންކަމަށާއި، ދީނީ ގޮތުންނާއި ޤާނޫނީ ގޮތުން ދިވެހިން ގަބޫލުކޮށްފައިވާ ހަމަޔަކީ، އިސްލާމްދީނަށް ކުޑައިމީސްވާ ކަހަލަ ރާއްޖޭގައި އިސްލާމް ދީނުގެ އަސާސްތައް ނެގެހެއްޓުމަށްޓަކައި އެބިލުގެ މުހިންމު ކަމަށް ވިސްނަވައި، ހުރިހާ މެންބަރުންވެސް ތާއީދުކޮށްދެއްވުމަށް އެދިވަޑައިގެންފައެވެ.

ޤާނޫނުލް އުޤޫބާތަށް ޙިސާން އިޞްލާހު ހުށައެޅުއްވީ، މުއާޞަލާތީ ވަސީލަތެއް ބޭނުންކޮށްގެން ނުވަތަ އެނޫންވެސް ގޮތަކަށް ޢާންމުންގެ ކުރިމަތީގައި، އިސްލާމްދީނަށް ތައުރީނުކުރުމުގެ ނިޔަތުގައި ބަހުން ނުވަތަ އިސްލާމްދީނަށް ފުރައްސާރަކުރުމަކީ ކުށެއްކަމަށް ކަނޑައެޅުމަށެވެ.