ފަރަށްއެރި ބޯޓުން ތިމާވެއްޓަށް ނޭދެވޭ އަސަރުކުރާނެ އެއްވެސް އެއްޗެއް ކަނޑަށް ބޭރުވެފައިނުވާ ކަމުގައި މޯލްޑިވްސް ޓްރާސްޕޯޓް އޮތޯރިޓީން ވިދާޅުވެއްޖެއެވެ.
ކ. ރަސްފަރި ފަރަށް އަރާފައިވާ ބޯޓާއި ގުޅިގެން ތަފްސީލް ހާމަކުރައްވައި ޓްރާސްޕޯޓް އޮތޯރިޓީން ނެރުނު ބަޔާނެއްގައި ވިދާޅުވީ، ކަމާބެހޭ މުއައްސަސާތަކާއި އުޅަނދުގެ ވެރިފަރާތާއި ގުޅިގެން އުޅަނދު ސެލްވޭޖު ކުރުމަށްޓަކައި ކުރަންޖެހޭ މަސައްކަތްތައް ކުރަމުން ދާކަމަށެވެ.
މިހާތަނަށް ބެލިބެލުމުން މި އުޅަނދުން ތިމާވެއްޓަށް ނޭދެވޭ އަސަރުކުރާނެ އެއްވެސް އެއްޗެއް ކަނޑަށް ބޭރުވެފައި ނުވާކަމަށް އެއޮތޯރިޓީން ވިދާޅުވެއެވެ. އަދި މި ބޯޓުގައި ބޯޓު ދުއްވުމަށް ބޭނުންކުރުމަށް ހުރި 1200 ޓަނުގެ ލޯސަލްފާ އައި.އެފް.އޯ އަދި 80 ޓަނުގެ ލޯސަލްފާ މެރިންގ ގޭސް އޮއިލް ބޯޓުގައި ހުރިކަން ފާހަގަ ކުރެވިފައިވާކަމަށެވެ. ބޯޓުގައި މިތަކެތި ހުރުމުން ކަނޑަށް ތެޔޮ ބޭރު ނުވާނެގޮތަށް ކަންކަން ހަމަޖެއްސުމަށް ކުރަންޖެހޭ މަސައްކަތްތައް ކުރުމަށް އުޅަނދުގެ ވެރިފަރާތަށް ވަނީ އަންގާފައެވެ.
އެއޮތޯރިޓީން ބުނެފައިވަނީ ބޯޓި ފަރަށް އަރާފަިވަނީ ކާށިދޫ ކަނޑުގެ ދެކުނުން އިންޖީނު ފެއިލްވުމުގެ ސަބަބުންކަމަށެވެ. މި އުޅަނދަކީ އިންޑިޔާގެ ޓުޓުކޮރިންގ ބަދަރުން ފުރައިގެން އެފްރިކާ ބައްރަށް ދަތުރުކުރުމަށްޓަކައި އިނޮސެންޓް ޕެސޭޖުގެ ގޮތުގައި ރާއްޖޭގެ ސަރަހައްދު ހުރަސްކޮށް ދަތުރުކުރަމުންދިއަ ބޯޓެއް ކަމަށާއި، މި ބޯޓުގައި އެއްވެސް ކާގޯއެއް ނެތްކަމަށް ޓްރާސްޕޯޓް އޮތޯރިޓީން ވިދާޅުވެއެވެ.
މިބޯޓު ފަރަށް އެރުމާއި ގުޅިގެން މޯލްޑިވްސް ނޭޝަނަލް ޑިފެންސް ފޯސްގެ ކޯސްޓްގާޑާއި، އެންވަޔަރުމަންޓް ޕްރޮޓެކްޝަން އެޖެންސީއާއި، މޯލްޑިވްސް ކަސްޓަމްސް ސަރވިސްއާއި، މޯލްޑިވްސް ޕޯޓްސް ލިމިޓެޑްއާއި، މޯލްޑިވްސް އިމިގްރޭޝަންއާއި ޕޯޓް ހެލްތާއި އަދި މި އުޅަނދުގެ ލޯކަލް އެޖެންޓުގެ ގޮތުގައި ކަނޑައަޅާފައިވާ ފަރާތުން މިހާރުވެސް ބޯޓު ފުންކުރުމުގެ މަސައްކަތް ކުރަމުން ދާކަމަށް ވަނީ ވިދާޅުވެފައެވެ.
ރާއްޖޭގައި ޢަމަލުކުރަމުންދާ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގައިވާގޮތުން ތިމާވެއްޓަށް ނޭދެވޭ އަސަރެއް ފޯރާފަދަ ކަމެއް އެއްވެސް ފަރާތަކުން ކޮށްފިނަމަ، ޝަރީއަތް މެދުވެރިކޮށް ބަދަލު ހޯދުމުގެ އިޚްތިޔާރު ދިވެހި ސަރުކާރަށް ލިބިގެންވެއެވެ. އަދި މީގެ ކުރިންވެސް ހިނގާފައިވާ މިފަދަ ބައެއް ހާދިސާތަކުގައި، ބޮޑެތި އަދަދުތަކުން ޖޫރިމަނާކޮށްފައިވާކަންވެސް ފާހަގަކޮށްލެވެއެވެ.
