ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް މިދިޔަ މެއި މަހުގެ ހަވަނަ ދުވަހުގެ ރޭ ދިން ހަމަލާއާ ގުޅިގެން ދައުވާކޮށްފައިވާ ހަތަރު މީހުންގެ ބަންދު ކްރިމިނަލް ކޯޓުން ދަމަހައްޓައިފިއެވެ.
އެ ހަތަރު މީހުންގެ މައްޗަށް ވަނީ 13 ދައުވާއެއް އުފުލާފައެވެ. އެއީ:
– އަދުހަމް އަހުމަދުގެ މައްޗަށް 4 ދައުވާއެއް
– މުޖާޒު އަހުމަދުގެ މައްޗަށް 2 ދައުވާއެއް
– ތަހުމީން އަހުމަދުގެ މައްޗަށް 4 ދައުވާއެއް
– އަލީ ހައިޝަމްގެ މައްޗަށް 3 ދައުވާއެއް
މި ހަތަރު މީހުންގެ ތެރެއިން އަދުހަމާއި، މުޖާޒް އަދި ތަހުމީން ވަނީ ޝަރީއަތް ނިމެންދެން މިދިޔަ މަހުގެ 21 ވަނަ ދުވަހު ބަންދުކޮށްފައެވެ. އެމީހުންގެ ބަންދު މުރާޖައާ ކުރުމަށް ބޭއްވި ޝަރީޢަތުގައި ވަނީ އެމީހުންގެ ބަންދުގެ މުއްދަތު އިތުރުކޮށްފައެވެ.
ޖިނާޢީ އިޖުރާއަތުގެ ޤާނޫނަށް މިދިޔަ އަހަރު ގެނެސްފައިވާ އިޞްލާހުގައިވާގޮތުން ޝަރީއަތް ނިމެންދެން ބަންދުކޮށްފައި ތިބިނަމަވެސް ކޮންމެ 30 ދުވަހަކުން ބަންދު މުރާޖައާ ކުރަން ޖެހޭނެއެވެ.
މިގޮތުން ހައިޝަމް މިއަދު ކްރިމިނަލް ކޯޓަށް ގެންދިޔައީ މިދިޔަ މަހުގެ 21 ވަނަ ދުވަހު އޭނާގެ ބަންދަށް ޖެހި 30 ދުވަހުގެ މުއްދަތު ހަމަވާތީއެވެ. ކޯޓުން ވަނީ އޭނާގެ ޝަރީޢަތް ނިމެންދެން ބަންދުކުރުމަށް ޢަމުރުކޮށްފައެވެ.
މަޢުލޫމާތު ލިބިފައިވާގޮތުގައ މި ހަތަރު މީހންގެ ޝަރީއަތް މިހަފްތާގައި ފެށުމަށް ކްރިމިނަލް ކޯޓުން މިހާރު އަންނަނީ ތައްޔާރުވަމުންނެވެ. މިގޮތުން އެންމެ ފުރަތަމަ ބާއްވަނީ އިއުތިރާފްގެ އެއްބަސްވުން އެކުލަވާލާގައިވާ އަދުހަމްގެ ބައިކަމަށްވެސް މަޢުލޫމާތު ލިބިފައިވެއެވެ.
ރައީސް ނަޝީދަށް ދިން ހަމަލާއާއި ގުޅިގެން ދައުވާކޮށްފައިވާ ހަތަރު މީހުންގެ މައްސަލަ ބެލުމަށް ކްރިމިނަލް ކޯޓުން މިހާރު ވަނީ ތިން ފަނޑިޔާރުންގެ ބެންޗެއްވެސް އެކުލަވާލާފައެވެ. ނަމަވެސް އެއީ ކޮން ފަނޑިޔާރުންނެއްކަމެއް އަދި ނޭނގެއެވެ.
ދައުވާ އުފުލާފައިވާ އަދުހަމް އަހުމަދު ރަޝީދަކީ ހަމަލާ ދިނުމަށްޓަކައި އަތަމާ ޕެލަސްގެ ގޯޅިތެރޭ ހުރެގެން ބޮން ގޮއްވާލި މީހާ އެވެ. އަދި އަދުހަމް ހުރީ ޖާނުން ފިދާވެގެންވެސް އެ ހަމަލާ ދިނުމަށް އޭނާ ހުރީ ތައްޔާރަށް ކަމަށް ތަހުގީގަށް ވަނީ އެނގިފައެވެ. ގއ. ކޮނޑޭ ފޮޅޭމާ ތަހުމީން އަހްމަދަކީ ހަމަލާ ދިނުމަށް ބޭނުންކުރި ސައިކަލްގެ ވެރި ފަރާތެވެ. އޭނާ ވަނީ ސައިކަލްގައި ބޮން ހަރުކުރުމަށްވެސް އެހީތެރިވެދީފައެވެ. އަދި މި ހަމަލާ ދިނުމުގައި އިސް ދައުރެއް އޭނާ އަދާކޮށްފައިވާކަން ތަހުގީގަށް ސާބިތުވެފައިވެއެވެ.
އަދުހަމްގެ މައްޗަށް އުފުލާފައިވަނީ ހަތަރު ދައުވާއެކެވެ. އެއީ ޓެރަރިޒަމްގެ އަމަލެއް ކުރުމުގެ ކުށުގެ ދައުވާ އާއި ޓެރަރިޒަމްގެ އަމަލެއް ކުރަން ރޭވުމުގެ ކުށުގެެ ދައުވާ އާއި ޓެރަރިސްޓް ޖަމާއަތަކަށް ތާއީދުކުރުމުގެ ކުށުގެ ދައުވާ އާއި ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްދުގައި މީހަކު މަރާލަން އުޅުމުގެ ކުށުގެ ދައުވާއެވެ.
މުޖާޒު އަހުމަދުގެ މައްޗަށް އުފުލާފައިވަނީ ޓެރިޒަމްގެ އަމަލެއް ކުރުމަށް ރޭވުމުގެ ކުށާއި ކުށެއް ކޮށްފައިވާ މީހަކު ފިލުވުމަށް އެހީތެރިވެ ދިނުމުގެ ކުށެވެ. މި ދެ ކުށް ސާބިތުވެއްޖެނަމަ އޭނާގެ މައްޗަށް 20 އަހަރަށްވުރެ ދިގު މުއްދަތުގެ ޖަލު ހުކުމެއް އަންނާނެއެވެ.
ތަހުމީނުގެ މައްޗަށް ހަތަރު ދައުވާއެއް ވަނީ އުފުލާފައެވެ. އެއީ ޓެރަރިޒަމްގެ އަމަލެއް ކުރުމުގައި ބައިވެރިވުމުގެ ކުށުގެ ދައުވާ އާއި ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ އާއި ގޮވާ ތަކެތި އެހެން ތަނަކަށް ގެންދިއުމުގައި އެހީތެެރިވެ ދިނުމުގެ ދައުވާ އާއި ޓެރަރިސޓް ޖަމާއަތަކަށް ތާއީދު ކުރުމުގެ ދައުވާ އެވެ. މި ދައުވާތައް ސާބިތުވެއްޖެނަމަ 49 އަހަރަށްވުރެ ދިގު މުއްދަތުގެ ޖަލު ހުކުމެއް އަންނާނެއެވެ.
އަލީ ހައިޝަމްގެ މައްޗަށް ތިން ދައުވާއެއް ވަނީ އުފުލާފައެވެ. އެއީ ޓެރަރިޒަމްގެ އަމަލެއް ކުރުމަށް ރޭވުމާއި ގޮވާ ތަކެތި އެހެން ތަނަކަށް ގެންދިއުމަށް އެހީތެރިވެ ދިނުމުގެ ކުށުގެ ދައުވާ އާއި ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާއެވެ. އޭނާގެ މައްޗަށް މި ދައުވާތައް ސާބިތުވެއްޖެނަމަ 46 އަހަރުގެ ހުކުމެއް އަންނާނެއެވެ.
