ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ ހިޔާ ފްލެޓްތަކަށް ކަރަންޓު ދިނުމުގެ މަސައްކަތުގެ ދަށުން މާދަމާ 5 އަދި 6ވަނަ ޓަވަރަށް ކަރަންޓު ގުޅައިދޭނެކަމަށް ސްޓެލްކޯއިން ހާމަކޮށްފިއެވެ.
ސްޓެލްކޯއިން ކުރި ޓްވީޓެއްގައި ބުނެފައިވަނީ ހިޔާ ޓަވަރުތަކަށް ކަރަންޓު ދިނުމަށްޓަކައި މާދަމާ 5 އަދި 6 ވަނަ ޓަވަރުން ފްލެޓް ލިބިފައިވާ ފަރާތްތަކަށް އެސް.އެމް.އެސް މެދުވެރިކޮށް ހާޒިރުވާންޖެހޭ ގަޑި އެންގިގެންދާނެކަމަށެވެ. އެބޭފުޅަކަށް ހާއްސަ ކުރެވިފައިވާ ގަޑިއަށް ސްޓެލްކޯއިން ދޫކޮށްފައިވާ ސްލިޕާއި، ފްލެޓްގެ ތަޅުދަނޑިއާއެކު، ޓަވަރުތަކަށް ވަޑައިގަތުމަަށް ސްޓެލްކޯއިން ވަނީ އިލްތިމާސް ކުރައްވާފައެވެ.
ހިޔާ ފްލެޓްގެ 3، އަދި 4 ވަނަ ޓަވަރުގެ ލިފްޓުގައި ޓެކްނިކަލް މައްސަލަތަކެއް ދިމާވެ، އެ ޓަވަރުތަކަށް ކަރަންޓުދިނުން މިއަދު ވަނީ މެދު ކަނޑާލާފައެވެ. ސްޓެލްކޯއިން ބުނެފައިވަނީ މިމައްސަލަ ހައްލުވުމުން ކަރަންޓު ދިނުމުގެ މަސައްކަތް ކުރާނެކަމަށެވެ. ހިޔާ މަޝްރޫޢުގެ ފްލެޓްތައް ހިމެނޭ ބައެއް ޓަވަރުތަކަށް ދާއީމީކޮށް ކަރަންޓުގެ ޚިދުމަތް ފޯރުކޮށްދޭން ފަށައިވަނީ މިމަހުގެ 17 ވަނަ ދުވަހުއެވެ.
ހިޔާ ޓަވަރުތަކަށް ކަރަންޓު ދިނުމަށްޓަކައި މާދަމާ (21/08/2021) ގައި 5 އަދި 6 ވަނަ ޓަވަރުން ފްލެޓް ލިބިފައިވާ ފަރާތްތަކަށް އެސް.އެމް.އެސް މެދުވެރިކޮށް ހާޒިރުވާންޖެހޭ ގަޑި އެންގިގެންދާނެ. 1/2
— STELCO (@STELCOMALDIVES) August 20, 2021
ހިޔާ ފްލެޓްތަކުގެ އެއްބަސްވުމުގައި ސޮއިކޮށް ތަޅުދަނޑި ޙަވާލުކުރުމުގެ މަސައްކަތް މިހާރު ކުރަމުންދާއިރު، ގިނަ ފަރާތްތަކުން ފްލެޓަށް ބަދަލުވުމުގެ ޢަމަލީ މަސައްކަތް ވަނީ ފަށާފައެވެ. މިކަމަށް ބޭނުންވާ ތަކެތި އުފުލުމަށް ޓަވަރުތަކުގައި ހަރުކޮށްފައިވާ ލިފްޓުތަކުގެ ތެރެއިން 16 އެޕާރޓްމަންޓްގެ ޓަވަރެއްގައިވާ 3 ލިފްޓުން 2 ލިފްޓް އަދި 20 އެޕާރޓްމަންޓްގެ ޓަވަރެއްގައިވާ 4 ލިފްޓުން 3 ލިފްޓް ބޭނުންކުރެވޭނެކަމަށް އެޗް.ޑީ.ސީން ވިދާޅުވެއެވެ. އަދި އެ ކޯރޕަރޭޝަންގެ މުވައްޒަފުން ޓަވަރުތަކުގެ މަސައްކަތް ކުރިއަށްދާގޮތް ބަލައި، މިކަމާގުޅޭ އިތުރު އިރުޝާދު ދެމުންދާނެކަމަށްވެސް އެޗް.ޑީ.ސީން ހާމަކޮށްފައިވެއެވެ. މިކަމަކީ ގިނަ ބައެއްގެ މަސްލަހަތާއި ގުޅިފައިވާ ކަމަކަށްވާތީ، ފަސޭހަކަމާއެކު މިކަން ކުރެވެން އަންނަނީ ފްލެޓް ލިބިފައިވާ ފަރާތްތަކުގެ އެހީތެރިކަމާއި އެއްބާރުލުން ލިބިގެންކަން އެޗް.ޑީ.ސީން ފާހަގަކުރެއެވެ.
