ހިޔާ ފްލެޓްގެ 3، އަދި 4 ވަނަ ޓަވަރުގެ ލިފްޓުގައި ޓެކްނިކަލް މައްސަލަތަކެއް ދިމާވެ، ކަރަންޓުދިނުން މެދުކަނޑާލައިފިއެވެ.
ސްޓެލްކޯއިން ބުނެފައިވަނީ މިއަދު ކަރަންޓު ދިނުމަށް ނިންމާފައިވާ ހިޔާފްލެޓްތަކުގެ 3 އަދި 4 ވަނަ ޓަވަރުގެ ލިފްޓްތަކަކަށް ދިމާވި ޓެކްނިކަލް މައްސަލައަކާއި ގުޅިގެން ކަރަންޓު ދިނުމުގެ މަސައްކަތް އެޗްޑީސީގެ މަޝްވަރާގެ މަތިން މިއަދަށް މިވަނީ މެދުކަނޑާލަން ޖެހިފައިވާކަމަށެވެ.
ސްޓެލްކޯއިން ބުނެފައިވަނީ އެޗްޑީސީން މިހާރު ގެންދަނީ އެ މައްސަލަ ހައްލު ކުރުމުގެ މަސައްކަތް ކުރަމުން ކަމުގައެވެ. މި 2 ޓަވަަރަށް ކަރަންޓު ދިނުމުގެ މަސައްކަތް ދެން ކުރިޔަށް ގެންދާނެ ދުވަހެއް އެ ޓަވަރުތަކުން ފްލެޓް ލިބިފައިވާ ފަރާތްތަކަށް އެސް.އެމް.އެސް އަދި ސޯޝަލް މީޑިއާ މެދުވެރިކޮށް އެންގާނެކަމުގައި ސްޓެލްކޯއިން ވަނީ ބުނެފައެވެ.
ސަމާލުކަމަށް: މިއަދު ކަރަންޓު ދިނުމަށް ނިންމާފައިވާ ހިޔާފްލެޓްތަކުގެ 3 އަދި 4 ވަނަ ޓަވަރުގެ ލިފްޓްތަކަކަށް ދިމާވި ޓެކްނިކަލް މައްސަލައަކާއި ގުޅިގެން ކަރަންޓު ދިނުމުގެ މަސައްކަތް އެޗްޑީސީގެ މަޝްވަރާގެ މަތިން މިއަދަށް މިވަނީ މެދުކަނޑާލަން ޖެހިފައި. 1/2
— STELCO (@STELCOMALDIVES) August 20, 2021
ހިޔާ މަޝްރޫޢުގެ ފްލެޓްތައް ހިމެނޭ ބައެއް ޓަވަރުތަކަށް ދާއީމީކޮށް ކަރަންޓުގެ ޚިދުމަތް ފޯރުކޮށްދޭން ފަށައިވަނީ މިމަހުގެ 17 ވަނަ ދުވަހުއެވެ.
ހިޔާ ފްލެޓްތަކުގެ އެއްބަސްވުމުގައި ސޮއިކޮށް ތަޅުދަނޑި ޙަވާލުކުރުމުގެ މަސައްކަތް މިހާރު ކުރަމުންދާއިރު، ގިނަ ފަރާތްތަކުން ފްލެޓަށް ބަދަލުވުމުގެ ޢަމަލީ މަސައްކަތް ވަނީ ފަށާފައެވެ. މިކަމަށް ބޭނުންވާ ތަކެތި އުފުލުމަށް ޓަވަރުތަކުގައި ހަރުކޮށްފައިވާ ލިފްޓުތަކުގެ ތެރެއިން 16 އެޕާރޓްމަންޓްގެ ޓަވަރެއްގައިވާ 3 ލިފްޓުން 2 ލިފްޓް އަދި 20 އެޕާރޓްމަންޓްގެ ޓަވަރެއްގައިވާ 4 ލިފްޓުން 3 ލިފްޓް ބޭނުންކުރެވޭނެކަމަށް އެޗް.ޑީ.ސީން ވިދާޅުވެއެވެ. އަދި އެ ކޯރޕަރޭޝަންގެ މުވައްޒަފުން ޓަވަރުތަކުގެ މަސައްކަތް ކުރިއަށްދާގޮތް ބަލައި، މިކަމާގުޅޭ އިތުރު އިރުޝާދު ދެމުންދާނެކަމަށްވެސް އެޗް.ޑީ.ސީން ހާމަކޮށްފައިވެއެވެ. މިކަމަކީ ގިނަ ބައެއްގެ މަސްލަހަތާއި ގުޅިފައިވާ ކަމަކަށްވާތީ، ފަސޭހަކަމާއެކު މިކަން ކުރެވެން އަންނަނީ ފްލެޓް ލިބިފައިވާ ފަރާތްތަކުގެ އެހީތެރިކަމާއި އެއްބާރުލުން ލިބިގެންކަން އެޗް.ޑީ.ސީން ފާހަގަކުރެއެވެ.
ހުޅުމާލޭ ދެވަނަ ފިޔަވަހީގައި ހިޔާ މަޝްރޫޢުގެ ދަށުން ތަރައްޤީކޮށްފައިވާ 25 ބުރީގެ 16 ޓަވަރަށް ކަރަންޓް ގުޅައިދިނުމުގެ މަސައްކަތް ކޮށްފައިވަނީ ޗައިނާ މެޝިނަރީ އިންޖިނިއަރިންގ ކޯޕަރޭޝަނުންނެވެ. ހިޔާ ޓަވަރުތަކުގައި ހިމެނޭ ހައުސިންގ ޔުނިޓްތަކަށް ކަރަންޓް ދިނުމަށް ބޭނުންވާ ކޭބަލްތައް އެޅުމާއި، ކަރަންޓް މީޓަރުތައް ހަރުކުރުމުގެ މަސައްކަތް މިހާރު ވަނީ ނިމިފައެވެ. 16 ޓަވަރަށާއި އަދި އިތުރު ބޭނުންތަކަށް ޤާއިމުކުރި 1 ޓްރާންސްފޯމަރާއެކު ޖުމްލަ 17 ޓްރާންސްފޯމަރު ހިޔާ ފްލެޓުތަކަށް ކަރަންޓު ދިނުމަށް ވަނީ ބަހައްޓާފައެވެ. މި ޓްރާންސްފޯމަރުތަކަށް ކަރަންޓުދީ، ފްލެޓްތަކަށް ކަރަންޓު ގުޅައިދިނުމުގެ މަސައްކަތް ކުރަމުންދަނީ ސްޓެލްކޯގެވެސް ބައިވެރިވުމާއެކުއެވެ.
