ބޮރުޝިއާ ޑޯޓްމުންޑް ބަލިކޮށް ޖަރމަން ސުޕަރ ކަޕް ބަޔާން މިޔުކުން ކާމިޔާބުކޮށްފިއެވެ. ބަޔާނުން މި މެޗު ކާމިޔާބުކުރީ 3 ލަނޑު އެއް ލަނޑުންނެވެ.
ޑޯޓްމުންޑުގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގައި ބަޔާނުން ވަނީ ލީޑު ނަގާފައެވެ. މި ހާފު ނިމެން ހަތަރު މިނެޓަށް ވެފައި ވަނިކޮށް ސާޖް ގްނާބްރީ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ފޯވާޑް ރޮބަޓް ލެވަންޑޯސްކީއެވެ.
މެޗުގެ ދެވަނަ ހާފުގައިވެސް ދެ ޓީމުގެ ފަރާތުން ގިނަ ހަމަލާތަކެއް ފެނިގެންދިޔައިރު، މި ހާފު ފަށައިގެން ހަތަރުވަނަ މިނެޓުގައި ބަޔާނުން ވަނީ ލީޑު ފުޅާކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ ތަޖުރިބާކާރު ފޯވާޑް ތޯމަސް މުލާއެވެ. އެކަމަކު މެޗުގެ 64 ވަނަ މިނެޓުގައި ޒުވާން ތަރި އާލިން ބްރައުޓް ހާލަންޑް ވަނީ ލަނޑެއް ޖަހައި، ޑޯޓްމުންޑަށް ފަރަގު ކުޑަކޮށްދީފައެވެ. ނަމަވެސް އޭގެ 10 މިނެޓު ފަހުން އޭރިއާ ތެރެއިން ލިބުނު ފުރުސަތެއްގެ ބޭނުންހިފައި ލެވަންޑޯސްކީ ވަނީ ބަޔާނަށް އަލުން ލީޑު ފުޅާކޮށްދީފައެވެ.
މިކާމިޔާބީއަކީ ބަޔޭންގެ އާކޯޗް ރޫލިއަން ނާގެލްސްމަންގެ ކޯޗިންގ ކެރިއަރުގައި ކާމިޔާބު ކުރެވުނު ފުރަތަމަ ތަށްޓެވެ. އަދި މިއީ ސީޒަންގެ ފުރަތަމަ މެޗު އެއްވަރުވެގެން ނިމުމުން ބަޔާންއަށް ކުރިއަށްހުރި މެޗުތަކާއި ކުރިމަތިލާއިރު އިތުރު ހިތްވަރެއް ލިބިގެންދާނެ ކަމެކެވެ.
