ސްޓެލްކޯއަކީ ކަރަންޓުގެ ސިނާއަތައް ކަނބަލުންނެރޭ އަދި އިތުރު ކަނބަލުން މި ސިނާއަތަށް ނިކުތުމަށް ހިތްވަރުދޭ ކުންފުންޏެއް ކަމަށް މެނޭޖިންގ ޑިރެކްޓަރ ހަސަން މުޣުނީ ވިދާޅުވެއްޖެއެވެ.
އޭނާ އެހެން ވިދާޅުވީ ކަރަންޓުގެ މަސައްކަތުގައި އަންހެނުންގެ ދައުރު އިތުރު ކުރުމަށް އަންހެނުންނަށް ހާއްސަކޮށްގެން ސްޓެލްކޯ އިން ހިންގި "ނެޝަނަލް ސެޓްފިކެޓް 3 އިން އިލެކްޓްރީޝަން" ކޯހުގެ ނިންމުން ފާހަގަ ކޮށް، ދަސްވެނިވި ދަރިވަރުންނަށް ސެޓްފިކެޓް ދިނުމަށް ބޭއްވި ރަސްމިޔާތުގައެވެ.
އެ ކޯހުގައި ޖުމްލަ 20 ފަރާތަކުން ބައިވެރިވިނަމަވެސް، ކޮވިޑާ ގުޅިގެން ކުރިމަތިވި ހުރަސްތަކާއެކު އެ ކޯސް ފުރިހަމަ ކުރެވިފައިވަނީ މީގެ ތެރެއިން 10 ބައިވެރިއަކަށެވެ. އެހެން ނަމަވެސް އޭގެ ތެރެއިން ދަސްވެނިވެފައިވަނީ 8 ބައިވެރިއެކެވެ. މި ކޯހުގެ ނިންމުން ފާހަގަކުރުމަށް ހޯމަ ދުވަހު ސްޓެލްކޯގައި ބޭއްވި ހާއްސަ ރަސްމިއްޔާތެއްގައި މެނޭޖިންގ ޑިރެކްޓަރު ހަސަން މުޣުނީ ވިދާޅުވީ، ކޯސް ނިންމި ހުރިހާ ބައިވެރިންގެ ހިތްވަރު ފާހަގަކޮށް މަރުހަބާ ދަންނަވާ ކަމަށާއި، އަންހެނުންނަށް ހާއްސަކޮށްގެން ފުރަތަމަ ފަހަރަށް ހިންގި އެ ކޯހުގެ ބައިވެރިންނަކީ ތާރީހުގައި ލިޔެވިގެންދާނެ ބައެއް ކަމަށެވެ.
މިއަދު ބޭއްވި މިރަސްމިއްޔާތުގައި މުޣުނީ ވިދާޅުވީ ކޯސް ނިންމި ހުރިހާ ބައިވެރިންގެ ހިތްވަރު ފާހަގަކޮށް މަރުހަބާ ދަންނަވާ ކަމަށާއި، އަންހެނުންނަށް ހާއްސަކޮށްގެން ފުރަތަމަ ފަހަރަށް ހިންގި މި ކޯހުގެ ބައިވެރިންނަކީ ތާރީހުގައި ލިޔެވިގެންދާނެ ބައެއް ކަމަށެވެ.
މިއަދުގެ މެނޭޖްމަންޓާއެކު، މިކުންފުނި ވެފައި މިވަނީ މި ސިނާއަތައް އަންހެނުން ނިކުތުމަށް ހިތްވަރުދޭ ކުންފުންޏަކަށް.
މުޣުނީ ވިދާޅުވިއެވެ.
މި ރަސްމިއްޔާތު ޝަރަފްވެރި ކޮށްދެއްވައި ވާހަކަދައްކަވަމުން ރައްޔިތުންގެ މަޖިލީހުގެ ހިންނަވަރު ދާއިރާގެ މެމްބަރު ޖީހާން މަހުމޫދު ވިދާޅުވީ، ރާއްޖޭގައި އެންމެފަހުން ހެދުނު ހައުސް ހޯލްޑް އިންކަމް އެކްސްޕެންޑިޗަރ ސަރވޭއިން ދައްކާގޮތުގައިވެސް ފަންނީ ދާއިރާގައި ހަރަކާތްތެރިވާ އަންހެނުންނަށްވުރެ ފިރިހެނުންގެ ނިސްބަތް އިތުރުކަމަށާއި، އާމްދަނީގެ ފަރަޤުވެސް އެހާމެ ބޮޑުކަމަށެވެ. އަދި މަޤާމުގެ ހައިސިއްޔަތަށް ބަލާއިރުވެސް، އިސް މަޤާމްތަކުގައި އަންހެނުން ތިބޭ މިންވަރު މަދުވެފައި، އިސް މަޤާމުތަކަށް އަންހެނުންނަށް ހުރި ފުރުޞަތުތައްވެސް މަދުކަމަށް ޖީހާން ވިދާޅުވިއެވެ.
ޖީހާން ވިދާޅުވީ، ރާއްޖޭގައި އަމިއްލަ މަސައްކަތްކުރާ ފަރާތްތަކުގެ ތެރޭގައި ނިސްބަތުން ގިނައީ އަންހެނުންކަމަށާއި، ނަމަވެސް އެ މަސައްކަތްތަކަކީ އާމްދަނީގެގޮތުން ބަލާނަމަ ކުޑަ އުޖޫރައެއް ލިބޭ މަސައްކަތްތަކެއްކަމަށެވެ. އަދި ޚިދުމަތުގެ ދާއިރާގައިވެސް ޚާއްސަކޮށް ތަޢުލީމާއި ޞިއްޙީ ދާއިރާ އާއި އިދާރީ މަސައްކަތުގައި އަންހެނުން ނިސްބަތް ގިނަވި ނަމަވެސް އެއީވެސް މުސާރަކުޑަ މަސައްކަތްތަކެއްކަން އޭނާ ފާހަގަކުރެއްވިއެވެ. އެހެންކަމުން ޖީހާން ވަނީ އިލެކްޓްރިކަލް އަދި އިންޖިނިއަރިންގ ފަދަ ފަންނީ ދާއިރާތަކަށް އަންހެނުން ނުކުތުމަށް ހުރި ފުރުޞަތުތައް ރާއްޖޭގައި އިތުރުކޮށްދީ ތަމްރީން ދިނުމުގެ މުހިއްމުކަން ފާހަގަކުރައްވާފައެވެ.
