2012 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހު ވެރިކަމުގައި ހުންނެވި ރައީސް ނަޝީދުގެ އިސްތިއުފާގެ ސިޓީހިފައިގެން މަޖިލީހުގެ އިދާރާއަށް ގޮސްފައި ނުވާނެކަމަށް ކުރީގެ ކަމިޝަނަރ އޮފް ޕޮލިސް އަދި ރައްޔިތުންގެ މަޖިލީހުގެ ތިމަރަފުށީ ދާއިރާގެ މެމްބަރު އަބްދުﷲ ރިޔާޒު ވިދާޅުވެއްޖެއެވެ.
ދިވެހި ރާއްޖޭގެ އަޑުން ގެނެސްދޭ "އަހާށޭ ބުނާން" ޕްރޮގްރާމުގައި ފެބްރުއަރީ 7 ވަނަ ދުވަހު ކަންކަން ހިނގައިދިޔަ ގޮތާއި ގުޅޭގޮތުން އާންމުން ކުރި ސުވާލުތަކަށް ޖަވާބު ދެއްވަމުން ރިޔާޒު ވިދާޅުވީ ފެބްރުއަރީ 7 ވަނަ ދުވަހު އެސަރަހައްދަށް ދިޔައީ ޤައުމީ ޚިދުމުގައި ކުރެއްވި މަސައްކަތްތައް ވެއްޔާއި މޮޑެވިގެންދާތަން ފެންނާތީކަމަށެވެ. އެއްވެސް ހާލަތެއްގައި ސަލާމަތީ ބާރުތަކުން ތަޅާފޮޅާތަން ދެކެން ބޭނުން ނުވާކަމަށާއި، އެދުވަހު އެކަން ފެނުމުން އެކަން ހުއްޓުވުމަށް އެތަނަށް ދިޔަކަމަށް ރިޔާޒު ވިދާޅުވިއެވެ.
7 ފެބްރުއަރީގައި އަޅުގަނޑު ފެނިފައި ހުންނާނެ، ސިފައިންނާއި ފުލުހުންގެ މަރުކަޒު އެހިސާބުން، ދެން. އެތަނަށް ދިޔަ ގަޑިޔާއި ދާންޖެހުނު ސަބަބު މުހިންމު ސުވާލެއްކަމަށް އަޅުގަނޑު ގަބޫލުކުރަނީ. ފުލުހުންގެ ޚިދުމުތުގައި 25 އަހަރު ޚިދުމަތް ކުރިމީހެއް އަޅުގަނޑަކީ. އަޅުގަނޑުމެން އަދިވެސް މިއަދުވެސް، މާދަމާވެސް ބޭނުމެއް ނުވާނެ ދުވަހަކުވެސް ފެންނާކަށް، ސިފައިންނާއި ފުލުހުން ތަޅާތަން. ތަޅާ މަންޒަތު ނުދެކޭނެ. އަޅުގަނޑުމެންނަކީ ޤައުމީ މީހުން. ޤައުމީ ފިކުރެއް، ޤައުމީ ވިސްނުމެއްގައި އަޅުގަނޑު މަސައްކަތް ކޮށްފައި ހުންނާނީ. ވަރަށް އިޚްލާސްތެރިކަމާއިއެކު ޤައުމަށް ޚިދުމަތް ކޮށްފައި ހުންނާނީ.
– ރިޔާޒު ވިދާޅުވިއެވެ.
ރިޔާޒު ވިދާޅުވީ ޤައުމުގެ ހާލަތު އެދުވަހު އެދަރައަށް ދިއުމުން މަސްލަހަތު ކޮންޓްރޯލް ކުރުމަކީ ދިވެހި ކޮންމެ ރައްޔިތެއްގެވެސް ޤައުމީ ޒިންމާއެއްކަމަށެވެ. އެހާލަތު އެތަނަށް ގޮސްގެން ކޮންޓްރޯލް ކުރެވިދާނެކަމަށް ގަބޫލުކޮށް އެތަނަށް ގޮސް ކުރެވެން އޮތް ހުރިހާ މަސައްކަތެއް ކުރެއްވިކަމަށް ރިޔާޒު ވިދާޅުވިއެވެ.
7 ފެބްރުއަރީގައި އަޅުގަނޑަށް ފެނިގެންދިޔައީ އަޅުގަނޑު ގޭގައި ޓީވީ ބަލަން އިން ވަގުތު ފެނިގެންދިޔައީ ރަބަރު ބްލެޓުވެސް ސިފައިންނާއި، ފުލުހުންގެ ތެރޭގައި ޖަހައި، އެހާލަތަށް ދިޔަކަން. ޤައުމެއްގެ ވެރިކަން ކުރައްވަން ތިއްބެވި ބޭފުޅުން އެޤައުމުގެ ވެރިކަމުގައި ފާލުން ނެއްޓީގެން ފޯސަސްގެ ތެރޭގައި ހަމަނުޖެހުން ހިނގާކަމަށް ފެންނަންޏާ، އަޅުގަނޑަށް ލިބިފައިވާ ތައުލީމާއި ތަޖުރިބާގެ އަލީގައި، އަޅުގަނޑަށް ގަބޫލު ކުރެވުނީ އަޅުގަނޑު އެތަނަށް ގޮސްގެން، އެހާލަތު ކޮންޓްރޯލް ކުރެވޭނެކަމަށް.
– ރިޔާޒު ވިދާޅުވިއެވެ.
ރިޔާޒު ވިދާޅުވީ އޭނާ އެދުވަހު ރައީސް ނަޝީދު އިސްތިއުފާގެ ސިޓީ ހިފައިންގެން މަޖިލީހަށް ގޮސްފައި ނުވާނެކަން ކޯނީ ރިޕޯޓުން ސާފުވާނެކަމަށެވެ. އެރިޕޯޓުގައި ވަރަށް ސާފުކޮށް ސިޓީ ގެންދިޔަ މީހާއާއި، ހަވާލުވި މީހާގެ މައުލޫމާތު ހުންނާނެކަމަށެވެ. އަދި އޭރު މަޖިލީހުގެ ރައީސަކީ މިހާރުގެ ފޮރިން މިނސްޓަރ ކަމަސްވުމުން، މިނިސްޓަރ ޝާހިދަށް އެކަން ވަރަށް ސާފުވާނެކަމަށް ރިޔާޒު ވިދާޅުވިއެވެ.
ރައީސް ނަޝީދުގެ އިސްތިއުފާގެ ސިޓީ، ހިފައިގެން އަޅުގަނޑު ރައްޔިތުންގެ މަޖިލީހުގެ އިދާރާއަށް ނުވެސްދަން. ކޯނީއާއި، ކޮމަންވެލްތާއި، ޔޫއެންއާއި ގުޅިގެން ކޮޑު އިންކުއަރީއެއް ހިންގެވި. އެ ރިޕޯޓުގައި ވަރަށް ތަފްސީލުކޮށް އިންނާނެ އަޅުގަނޑު ރައީސް ނަޝީދުގެ އިސްތިއުފާގެ ސިޓީ ނުގެންދާކަން.
– ރިޔާޒު ވިދާޅުވިއެވެ.
7 ފެބްރުއަރީގައި ހިނގަދިޔަ ކަންތައްތަކަށްފަހު ރައީސް ނަޝީދު ވަނީ ރައީސް ކަމުން އިސްތިއުފާ ދެއްވާފައެވެ. އެދުވަހުގެ އެ ކަމަކީ ބޮޑު ބަޢާވާތެއްކަމަށް އެމްޑީޕީގެ އިސް ބޭފުޅުންނާއި، ރައީސް ނަޝީދު ގެންދަވަނީ އަދިވެސް ވިދާޅުވަމުންނެވެ. އަދި މިކަމަށް އިންސާފު ލިބެންޖެހޭކަމަށް ދަނީ ބުނަމުންނެވެ.
ކޮމެންޓު ފޮނުވާ