ޔޫތު މިނިސްޓަރުކަން އަޙްމަދު މަހުލޫފް ވަކިކުރާނެކަމަށް ލަފާކުރެވޭކަމަށް ކުރީގެ އިސްލާމިކް މިނިސްޓަރ ޑރ.މުޙައްމަދު ޝަހީމް ޢަލީ ސަޢީދު، މިނިސްޓަރ މަހުލޫފަށް ދަންނަވައިފިއެވެ.
މަހުލޫފްގެ މައްޗަށް ދެ ދައުވާކުރުމަށް އޭސީސީން ޕީޖީއަށް ފޮނުވާފައިވެއެވެ. އެއީ މަަހްލޫފް ރައްޔިތުންގެ މަޖިލީހުގެ މެންބަރަކަށް ހުރިއިރު ސްޕެޝަލް އިކޮނޮމިކް ޒޯން، އެސް.އީ.ޒެޑްގެ ބިލަށް ވޯޓުދިނުމާއި ޕީ.ޕީ.އެމްގައި ދެމި ހުރުމުގެ މުޤާބިލުގައި 33,000 އެމެރިކާ ޑޮލަރު އަމިއްލަފުޅު އެކައުންޓަށް ޖަމާވި މައްސަލައާއި، ރަސްމީ އިދާރާއަކަށް ދޮގު މަޢުލޫމާތު ދީފައިވާކަން ތަޙްޤީޤަށް އެނގެން އޮތުމުން ޤާނޫނުލް އުޤޫބާތުގެ ދަށުން، ދައުވާކޮށްދިނުމަށް ފޮނުވާފައިވާ މައްސަލައެވެ.
މި މައްސަލާގައި މަހުލޫފް ހުންނެވީ ސަސްޕެންޑްކޮށްފައެވެ. މަހުލޫފް ވިދާޅުވަމުން ގެންދަވަނީ އޭނާގެ މައްޗަށް ދައުވާކުރުމަށް ނުފޫޒް ފޯރުވަމުން އަންނަކަމަށް ތުހުމަތުކުރައްވަމުންނެވެ. މަހްލޫފަށް އިޝަރާތްކުރައްވާ ޑރ.މުޙައްމަދު ޝަހީމް ޢަލީ ސަޢީދު ކުރެއްވި ޓްވީޓެއްގައި ވިދާޅުވީ، މަހުލޫފް ވަޒީރުކަމުން ވަކިކުރައްވާނެކަމަށް ލަފާކުރެވޭކަމަށެވެ. ސަރުކާރުން ސަރުކާރުން މިހާތަނަށް ވަކިކުރި ހުރިހާ ވަޒީރުން ވަކިކުރީ ނުވަތަ ވަކިވާން ޖެހުނީ ހަވަރަށް ދިނުމަށްފަހުކަމަށްވެސް ޝަހީމް ވިދާޅުވިއެވެ. އެހެންކަމުން މިކަމާ ވިސްނެވުމަށްވެސް ޑރ.ޝަހީމް މަހުލޫފަށް ދެންނެވިއެވެ.
Alhugandah lafaa kurevenee manikufaanu @AhmedMahloof vazeerukamun vaki kuraane kamah. Ee sarukaarun mihaathanah vaki kuri hurihaa vazeerun vaki kuree nuvatha vaki vaan jehunee nikan rangalhah havarah dhinumahfahu. Veemaa mikankamaa visnavaa!
— Mohamed Shaheem Ali Saeed (@Mohamedshaheem1) August 14, 2021
އަޅުގަނޑަށް ލަފާކުރެވެނީ މަނިކުފާނު (އަޙްމަދު މަހުލޫފް) ވަޒީރުކަމުން ވަކި ކުރާނެކަމަށް. އެއީ ސަރުކާރުން މިހާތަނަށް ވަކިކުރި ހުރިހާ ވަޒީރުން ވަކިކުރީ ނުވަތަ ވަކިވާން ޖެހުނީ ނިކަން ރަނގަޅަށް ހަވަރަށް ދިނުމަށްފަހު. ވީމާ މިކަންކަމާ ވިސްނަވާ!
– ޑރ.މުޙައްމަދު ޝަހީމް ޢަލީ ސަޢީދު
ޑރ.ޝަހީމް މިހެން ވިދާޅުވިއިރު، މި ސަރުކާރުގެ ބައެއް ވަޒީރުންނަށް ބޮޑެތި ތުހުމަތުތަކެއް ކުރެވި ގިނަބައެއްގެ ފާޑުކިޔުންތައް އަމާޒުވިއެވެ. އެގޮތުން ޖެންޑަރ މިނިސްޓަރަކަށް ހުންނެވި ޝިދާތާ ޝަރީފް ވަޒީރުކަމުން އިސްތިއުފާދެއްވީ މަޖިލީހުގެ އެމްޑީޕީ މެންބަރުންގެ ބޮޑެތި ތުހުމަތުތަކަިއ ފާޑުކިޔުންތައް އަމާޒުވެ ކުރިމަތިކުރުވި ފިއްތުންތަކާއި ގުޅިގެންނެވެ. އަދި ޓެކްނޮލޮޖީ މިނިސްޓަރަކަށް ހުންނެވި މުޙައްމަދު މަލީޙް ޖަމާލް ވަޒީރުކަމުން ވަކިކުރެއްވީ މަޖިލީހުގައި މެންބަރުން ފާޑުވިދާޅުވެ އިތުބާރު ނެތްކަމަށް ފާސްކުރެއްވުމަށްފަހުއެވެ. އަދި ހައުސިން މިނިސްޓަކަށް ކުރިން ހުންނެވި އާމިނަތު އާޠިފާއަށްވެސް އެމްޑީޕީގެ މަޖިލިސް މެންބަރުންގެ ފާޑުކިޔުން އަމާޒުކޮށްފައިވެއެވެ. އެކަމަނާ ވަނީ އަމިއްލަފުޅަށް އިސްތިއުފާދެއްވާފައެވެ.
މިނިސްޓަރ މަލީހު ވަޒީރުކަމުން ވަކިކުރައްވާނެކަމަށް ޑރ.ޝަހީމް ވިދާޅުވެފައިވާއިރު، މަހުލޫފް ވިދާޅުވީ، ދައުވާކުރުމަށް ޕީޖީ އޮފީހަށް ފޮނުވުމުން އޭގައި އަމަލުކުރެވެންޖެހޭ ގޮތަކީ، ދައުވާކުރެވޭވަރަށް ހެކި ހުރެއްޖެނަމަ ދައުވާކުރުންކަމަށާއި، ހެކި ނެތްނަމަ ދައުވާ ނުކޮށް އަނބުރާ ގެނދިއުންކަމަށެވެ. ނަމަވެސް އެމަނިކުފާނުގެ މައްސަލަ ބާއްވައިގެން ހެކި އުފައްދަން މަސައްކަތްކުރައްވާކަމުގެ ތުހުމަތު މަހުލޫފް ކުރެއްވިއެވެ.
އޭނާގެ މައްޗަށް ތުހުމަތުކުރާ ކޮރަޕްޝަންގެ މައްސަލާގައި، އެއްވެސް ހެއްކެއްނެތި ކޯޓަށް ހުށައަޅައިފިނަމަ، މިމައްސަލައިގަ ދައުލަތުން ހޭވި ހަޑި ހާމަވެ “އޮރިޔާން ވާނެ”ކަމަށްވެސް މަހްލޫފް ރޭ ވިދާޅުވެފައިވެއެވެ.
މަހުލޫފް ވިދާޅުވީ، އޭސީސީގެ ރައީސް މަރްޔަމް ޝިއުނާއާއި އެސެޓް ރިކަވަރީ ކޮމިޝަންގެ ރައީސް އަޙްމަދު އަސްޢަދުގެ ޗެޓްލޮގްތަކެއް ލިބިވަޑައިގެންފައިވާކަމަށެވެ. މަހުލޫފް ވިދާޅުވީ ޝަރީއަތަށް އޭނަގެ މައްސަލަ ގޮސްފިނަމަ އެ ވާހަކަތައް ހާމަކުރައްވާނެކަމަށާއި، އެއީ ދައުލަތް “އޮރިޔާން” ވާނެ ފަދަ ވަހަކަތަކެއްކަމަށެވެ. އަދި އެމްއެމްޕީއާރުސީގެ މައްސަލާގައި އެއްވެސް މީހަކަށް ދައުވާ ނުކުރެވަރުގެ މައްސަލައަކަށް ވާނެކަމަށް މަހުލޫފް ވިދާޅުވިއެވެ.
