ކުރިއަށް އޮތް ސާފް ޗެންޕިއަންޝިޕްގައި ރާއްޖޭގެ ޤައުމީ ފުޓުބޯޅަ ޓީމަށް އިރުޝާދު ދިނުމަށް ހެޑް ކޯޗަށް ހުރުން އެންމެ ގާތީ ދިވެހި ކޯޗެއްކަމަށް އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ދައުލަތުގެ މީޑިއާގައި ވާހަކަ ދައްކަވަމުން ބައްސާމް ވިދާޅުވީ ނިމިގެންދިޔަ އޭޝިއަން ކަޕް ކޮލިފައިން މެޗުތަކުގެ ނަތީޖާ ތަކުގެ ސަބަބުން ބައެއް ކަހަލަ ހިތްހަމަނުޖެހުންތައް ހުރުމާއި އެފްއޭއެމްއިން އެންމެ ބޭނުންވި ނަތީޖާގެ އިތުރުން ދެ ފަރާތުންވެސް އެއްބަސްނުވެވޭ ކަންތައްތަކެއް ހުރުމާއެކު، ކޯޗާއިއެކުވެސް ވާހަކަދެއްކުމަށްފަހު މިހާރުވާނީ ޤައުމީ ކޯޗު މާޓިން ކޫޕްމަންގެ އެގްރީމެންޓް ބާތިލް ކޮށްފައިކަމަށެވެ.
ކޫޕްމަން މަޤާމުން ވަކިކޮށްފައިވާއިރު، ސަރަހައްދީ އެންމެ ބޮޑު ފުޓުބޯޅަ މުބާރާތް ރާއްޖޭގައި ބޭއްވުމަށް އޮތީ ދޮޅުމަހަށް ވެފައެވެ. ބައްސާމް ވިދާޅުވީ ސާފް ޗެންޕިއަންޝިޕް ރާއްޖެއަށް ކާމިޔާބު ކުރުމަށްޓަކައި، ކުރެވެން އޮތް ހުރިހާ މަސައްކަތެއް ކުރާނެކަމަށެވެ. އަދި މިހާރު އޮތް ކޯޗިން ސްޓާފުންނާއި، ވާހަކަ ދައްކައި ތަށި ރާއްޖޭގައި ބެހެއްޓުމަށް ކުރަންޖެހޭ ހުރިހާ ކަމެއް އެފްއޭއެމްއިން ހަމަޖައްސަމުންދާކަމަށެވެ.
ކޯޗަކު ހަމަޖެއްސުމާއި ގުޅޭގޮތުން ބައްސާމް ވިދާޅުވީ މިފަހަރުގެ މުބާރާތުގައި ދިވެހި ޓީމަކީ ސައްތައިން ސައްތަ ދިވެހި ޓީމަކަށް ވުމަކީ ގާތްކަމެއްކަމަށެވެ. އެހެންކަމަށްވާނަމަ ދިވެހި ޓީމުގެ ކޯޗިން ސްޓާފުންނަކީ މުޅިން ދިވެހިން ކަމަށް ވެގެންދާނެއެވެ. ރާއްޖޭގައި މުބާރާތް ބާއްވައި، ރާއްޖޭގެ ރައްޔިތުން ތަށި ނޫން އެއްޗެއް ބޭނުންނުވާނެކަން އެގޭކަމަށް ބައްސާމް ވިދާޅުވިއެވެ. ދިވެހި ސަޕޯޓަރުންނާއި، ރައްޔިތުންގެ އުންމީދު ހާސިލްކުރުމަށް ކުޅުންތެރިންވެސް ކެތްމެދުވެފައިވާކަމަށް ބައްސާމް ވިދާޅުވިއެވެ.
އޭނާ ވިދާޅުވީ ސާފް ޗެންޕިއަންޝިޕަށް ތަައްޔާރުވަމުންދާއިރު އޮތް އެންމެބޮޑު ހިތްހަމަޖެހުމަކީ، ޤައުމީ ޓީމުގެ ސްކޮޑްގައި ހިމެނޭ ގިނަ ކުޅުންތެރިން އޭފްސީ ކަޕްގައި ކުޅޭ މާޒިޔާއާއި، އީގަލްސްގައި ހިމެނުންކަމަށެވެ. މިމެޗުތަކަށްފަހު ޤައުމީ ޓީމު ގަތަރު ނޫނީ މެދު އިރުމަތީގެ ޤައުމެއްގައި އެއްބަސްދުވަހުގެ ތަމްރީން ފުރިހަމަ ކުރުމަށް މަސައްކަތް ކުރަމުންދާކަމަށެވެ.
ބައްސާމް ވިދާޅުވީ މުބާރާތް ބޭއްވުމަށް، ސަރުކާރުން ވަރަށް ބޮޑު އެހީތެރިކަމެއް ދެއްވާކަމަށެވެ. އަދި މުބާރާތް އެންމެ ފުރިހަމައަށް ގެންދެވޭނީ، ސަޕޯޓަރުންނާއި، އެކުގައިކަމަށްވާއިރު، މިއޮތް މުއްދަތުގައި ރާއްޖޭގެ ހުރިހާ ރައްޔިތުންވެސް ވެކްސިން ޖަހައިގެން، ދަނޑަށް ވަދެގެން ޓީމަށް ސަޕޯޓް ކުރެވޭނެ މަގު ހޯދުމަށް ބައްސާމް ވަނީ އިލްތިމާސް ކުރައްވާފައެވެ.
