ރާއްޖެ ތަރައްޤީކޮށް، ކުރިއެރުވުމަށް ޤާބިލް ހަރުދަނާ ތައުލީމީ ދިވެހި ދަރިން އެބަތިކަމަށާއި، އެފުރުސަތު ދިވެހިންނަށް ތަނަވަސް ކޮށްދެއްވަން ޖެހޭކަމުގައި ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ރާއްޖޭގެ އެންމެ މުހިންހިމު އިދާރަކާއި، ކުންފުނިތަކުގެ ވެރިންނަށް ބޭރު މީހުން އައްޔަން ކުރަމުންދާތީ ކަންބޮޑުވުން ފާޅު ކުރައްވައި ޑރ.ޝަހީމް ކުރެއްވި ޓްވީޓެއްގައި ވިދާޅުވީ ރާއްޖެއަކީ ޢިލްމީ ޤާބިލް ދަރީންތަކެއް ތިބި ޤައުމެއްކަމަށެވެ. ރާއްޖެ ތަރައްޤީކޮށް، ކުރިއަށް ގެންދިއުމުގެ ވިސްނުން އެ ޤާބިލް ތައުލީމީ ބޭފުޅުންގެ ސިކުޑިތަކުގައި ހުންނާނެކަމަށާއި، ނުލިބެނީ ޚިދުމަތްކުރުމުގެ ފުރުސަތުކަމަށް ޑރ.ޝަހީމް ވިދާޅުވިއެވެ.
މިއީ ހާދަ ޢިލްމީ ތަޖުރިބާހުރި ޤާބިލް ދަރީން ތިބި ޤައުމެކޭ މިޤައުމު ތަރައްޤީކުރުމުގެ ޤާބިލްކަން ދިވެހިންގެ ސިކުނޑީގައި ހުންނާނެ.
– ޑރ.ޝަހީމް ވިދާޅުވިއެވެ.
ޝަހީމް ވިދާޅުވީ ރާއްޖޭގެ އެންމެ މުހިންމު ތަންތަނުގެ ގޮތުގައި ފާހަގަކުރެވޭ ޕެންޝަން އޮފީހާއި، ޤައުމީ ބޭންކައި، ރާއްޖޭގެ ބައިނަލް އަޤުވާމީ އެއާޕޯޓާއި، ޤައުމީ އެއާލައިން ހިންގުންވެސް ބޭރު މީހުންނާއި ހަވާލުކުރުމަކީ އެއްގޮތަކަށްވެސް ދިވެހި ރައްޔިތުންނަށް، ދިވެހި ތައުލީމީ ޤާބިލް ބޭފުޅުންނަށް ހައްގު މިންވަރެއް ނޫންކަމަށެވެ. މިފުރުސަތުތައް ދިވެހި ދަރީންތަނަށް ތަނަވަސްވާންޖެހޭކަމަށް ޑރ.ޝަހީމް ވިދާޅުވިއެވެ.
ޕެންޝަން އޮފީހުގެ ވެރިޔަކަށް ބޭރު މީހެއް. ޤައުމީ ބޭންކުގެ ވެރިޔަކަށް ބޭރު މީހެއް. ޤައުމީ އެއާޕޯޓްގެ ވެރިޔަކަށް ބޭރު މީހެއް. ޤައުމީ އެއާލައިންނާ ވެސް ބޭރު ބަޔަކު ޙަވާލުވަނީ،،، އަހަރުމެން ދިވެހިންނަށް ޙައްޤު މިންވަރަކީ މިއީތޯ؟
– ޑރ.ޝަހީމް ވިދާޅުވިއެވެ.
ކޯވިޑް-19 އާއި ގުޅިގެން ގިނަ ޒުވާނުން ވަޒީފާ ނުލިބި މަގުމަތިވެފައިވާއިރު، މިދަނޑިވަޅަކީ ބޭރުގެ މީހުން ވަޒީފާތަކަށް ގެނައުމުގެ ބަދަލުގައި ދިވެހި ޒުވާނުންނަށް ވަޒީފާގެ ފުރުސަތު ތަނަވަސްކޮށްދޭންވީ ވަގުތުކަމަށް ގިނަ ބަޔަކު ދަނީ ބުނަމުންނެވެ. ރާއްޖޭގައި އެކި ދާއިރާތަކުން މަތީ ތައުލީމް ހާސިލްކުރައްވާފައިވާ ގިނަ ބަޔަކު ތިބިއިރު، ކިޔެވި ތައުލީމުގެ ބޭނުން ހިފުމަށް ސިޔާސީ ވުން ނޫންގޮތެއް ނެތްކަމަށްވެސް ގިނަ ބަޔަކު މިއަދު ދަނީ ބުނަމުންނެވެ.
