ވިއަރެއާލް އާއި ބައްދަލުކޮށް ޗެލްސީން ސުޕާ ކަޕް ކާމިޔާބު ކޮށްފިއެވެ.
މިދިޔަ ސީޒަންގެ ޕްރިމިއާ ލީގު ޗެމްޕިއަން ޗެލްސީ އާއި ޔޫރަޕާ ލީގުގެ ޗެމްޕިއަން ވިއަރެއާލް ބައްދަލު ކުރި މި މެޗުން ޗެލްސީ މޮޅުވީ ޕެނަލްޓީ ޖަހައިގެންނެވެ.
ވިންޑްސާ ޕާކް ސްޓޭޑިއަމްގައި ކުޅުނު މި މެޗުގައި ފުރަތަމަ ލީޑު ނެގީ ޗެލްސީންނެވެ. ފުރަތަމަ ހާފުގެ 27 ވަނަ މިނެޓުގައި ކައި ހާވެޒް ނަގައިދިން ހުރަހެއް ގޯލުގެ ދުރު ކަނަށް ވައްދާލައިގެން މިގޯލު ޗެލްސީއަށް ކާމިޔާބު ކޮށްދިނީ ހަކީމް ޒިޔެކްއެވެ. ވިއަރެއާލްއިން ނަތީޖާ ހަމަކުރީ ދެވަނަ ހާފުގެ 73 ވަނަ މިނެޓުގައި ޖެރާޑް މޮރޭނޯ އެވެ. މި ގޯލަކީ ބޫލައެ ޑިއާ ދިން ކަޓް ޕާހަކުން މޮރޭނޯ ކާމިޔާބު ކުރި ވަރަށް ރީތި ޓީމް ގޯލެކެވެ.
މެޗުގެ ފުރިހަމަ ވަގުތު ހަމަވީ 1-1 އިން ދެޓީމު އެއްވަރު ވެގެންނެވެ. މެޗުގެ ނަތީޖާ ނެރެފައިވަނީ ޕެނަލްޓީ ޖަހައިގެންނެވެ. ޕެނަލްޓީ ޖަހައިގެން ޗެލްސީ މޮޅުވީ 6-5 އިންނެވެ.
