ރާއްޖޭގައި އޮތީ ހަރުކަށިފިކުރުގެ ދެ ޖަމާއަތެއް ކަމުގައި އިސްލާމިކް މިނިސްޓްރީން މައުލޫމާތު ދީފައިވާކަމަށް ރައީސް ނަޝީދަށް ދިން ހަމަލާގެ ކަންކަން ބެލުމަށް އެމްޑީޕީން އެކުލަވާލި "މެއި6″ ކޮމިޓީގެ މުޤައްރިރު ވިލިފުށި ދާއިރާގެ މެމްބަރު ހަސަން އަފީފް ވިދާޅުވެއްޖެއެވެ.

އެމްޑީޕީގެ ގައުމީ މަޖިލީހުން ވަނީ "މެއި6″ގެ ނަމުގައި ކޮމިޓީއެއް އުފައްދައި، ރައީސް ނަޝީދަށް ދިން ހަމަލާގެ ތަހުގީގުގެ ކަންކަން ދާ ގޮތެއް ބެލުމުގެ މަސައްކަތް ކުރަމުންނެވެ. ރޭ ބޭއްވި އެމްޑީޕީގެ ޤައުމީ މަޖިލީހުގައި އަފީފްވަނީ މިހަފްތާގައި ކުރެއްވި މަސައްކަތުގެ މައުލޫމާތު ދެއްވާފައެވެ. އޭނާ ވިދާޅުވީ ހަރުކަށި ފިކުރާއި ދެކޮޅަށް އިސްލާމިކް މިނިސްޓްރީން ކުރަމުންދާ މަސައްކަތްތަކާއި، ގުޅޭ މައުލޫމާތުތައް ހޯދާފައެވެ.

އިސްލާމިކް މިނިސްޓަރ ޑރ.އަހުމަދު ޒާހިރުއާއި، މިނިސްޓްރީގެ އިސްބޭފުޅުންނާއިއެކު ބޭއްވި ބައްދަލުވުމުގެ ޚުލާސާ ހިއްސާ ކުރައްވަމުން އަފީފް ވިދާޅުވީ މިބައްދަލުވުމުގައި މިނިސްޓްރީން ހަރުކަށި ފިކުރާއި ދެކޮޅަށް ކުރަމުންދާ މަސައްކަތް ކިޔައިދެއްވި ކަމަށެވެ. އެގޮތުން ކުރިއަށް އޮތް 2 އަހަރަށް ރާވާލައިގެން ޚާއްސަ ޕްރޮގްރާމުތަކެއް އެޑިއުކޭޝަން މިނިސްޓްރީއާއި ގުޅިގެން ހިންގުމަށް ނިންމާފައިވާކަމަށެވެ. އަފީފް ވިދާޅުވީ ހަރުކަށި ފިކުރުގެ ގޮތުގައި ރާއްޖޭގައި، އޮތީ ދެ ގްރޫޕެއްކަން މިނިސްޓަރ ވިދާޅުވިކަމަށެވެ. އެއީ "ޑޮޓް" ފިކުރަށް ނިސްބަތްވާ މީހުންނާއި، "ސުޕަރ ސަލަފީ" އިން ކިޔާ ގްރޫޕެއްކަމަށެވެ.

އަފީފް ވިދާޅުވީ މީގެ ތެރެއިން "ޑޮޓް" ގްރޫޕަކީ، ސަރުކާރުވެސް ގަބޫލުނުކުރާ، އެމީހުންގެ އަމިއްލަ މައުލޫމާތުތަކާއި، އަމިއްލަ ވިސްނުމަށް އުޅޭބައެއް ކަމަށެވެ. އަދި ސުޕަރ ސަލަފީންނަކީ ތައުލީމީ ގޮތުންވެސް މޮޅެތި މީހުން ހިމެނޭ، ހަރުކަށި ވިސްނުން ހިމެނޭ ޖަމާއަތެއްކަމަށެވެ. މިމީހުންނަކީ މީހުންނަށް އެކި ވިސްނުން ދީގެން ޖިހާދަށް ފޮނުވައި، ޚާއްސަކޮށް ދިގު މުއްދަތައް ޖަލަށް ލެވޭ މީހުންނަށް، އެވިސްނުން ދީގެން ޖިހާދަށް ފޮނުވުމަށް މަސައްކަތް ކުރާ ޖަމާއަތެއްކަމަށެވެ.

އަފީފް ވިދާޅުވީ ހަރުކަށި ވިސްނުމާއި ދެކޮޅަށް މިނިސްޓްރީން މަސަކަތް ކުރަނީ ފުލުހުންގެ އިންޓަރލިޖެންސުންވެސް ލިބޭ މައުލޫމާތަށް ބަލައިރު، އެވިސްނުން ހުންނަ މީހުންނައި ހަމައަށް ގޮސްގެންކަމަށް މިނިސްޓްރީން ވިދާޅުވެފައިވާކަމަށެވެ.