ނޫސްވެރިޔާ އަހުމަދު ރިޟުވާނު ޢަބްދުﷲ ގެއްލުވާލި މައްސަލާގެ ތަހުގީގަށް ކުރީގެ ކަމިޝަނަރ އޮފް ޕޮލިސް ހުސެއިން ވަހީދު މަރާލާފައިވާ މީހުންނާއި ގެއްލިފައިވާ މީހުންގެ މައްސަލަތައް ބަލާ ކޮމިޝަނަށް ހާޒިރުކޮށް ސުވާލު ކޮށްފިއެވެ
ހުސައިން ވަހީދު މަރު ކޮމިޝަނަށް ހާޒިރުކޮށް ބަޔާން ނަގާފައިވަނީ މިދިޔަ ހަފްތާގެ އަންގާރަ ދުވަހުއެވެ. ރިލްވާން ގެއްލުވައިލިއިރު ފުލުހުންގެ އިސްވެރިއަކަށް ހުންނެވީ ހުސެއިން ވަހީދެވެ. މިމައްސަލާގައި ބައެއް މީޑިއާތަކަށް މައުލޫމާތު ދެއްވަމުން ހުސެއިން ވަހީދު ވިދާޅުވެފައިވަނީ ރިލްވާންގެ މައްސަލަ ފުލުހުން ނުބަލައި ދޫކޮށްލާފައި ނުވާނެ ކަމަށެވެ. އަދި އެއީ ފުލުހުން ލުއި ގޮތަކަށް ނެގި މައްސަލައެއް ނޫން ކަމަށާއި ރިޔާސީ ކޮމިޝަނުން ނެރުނު ޑްރާފްޓް ރިޕޯޓުގައި ހުރީ އޭރު ފުލުހުން ކުރި މަސައްކަތުން ހޯދި މައުލޫމާތު ކަމަށް އޭނާ ވިދާޅުވިއެވެ.
މިމައްސަލާގައި ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ވަނީ މިމަހުގެ 3 ވަނަ ދުވަހު މަރު ކޮމިޝަނަށް ހަޒިރުކޮށްފައެވެ. ރިޔާސީ ކޮމިޝަނުގެ މެމްބަރު މިސްބާހު އައްބާސް ވިދާޅުވީ ރައީސް ޔާމީން ކޮމިޝަނަށް ހާޒިރުކުރީ އެމަނިކުފާނުގެ މައްޗަށް ތުހުމަތުކުރެވޭ ކަންކަމަށް ޖަވާބުދާރީވުމުގެ ފުރުޞަތު ދެއްވުމަށްކަމަށެވެ. ނަމަވެސް އެމަނިކުފާނަށް އެފުރުޞަތު ތަކުރާރުކޮށް އެރުވުމުންވެސް ހުންނެވީ ހަނުކަމަށް މިސްބާހު ވިދާޅުވިއެވެ. މިސްބާހު ވިދާޅުވީ ރައީސް ޔާމީން ރިޔާސީ ކޮމިޝަނަށް ހާޒިރުކުރިއިރު ޤާނޫނީ ވަކީލެއްގެ ފުރުޞަތު ނުދެއްވާކަމަށް ބުނެ އެމަނިކުފާނުގެ ވަކީލު ޑރ. މުހައްމަދު ޖަމީލު ހެއްދެވީ އިތުރުފުޅުކަމަށެވެ. އަދި ޤާނޫނުގައި ކަނޑައަޅާފައިވާ މިންވަރަށް އެ ފުރުޞަތުވެސް އެމަނިކުފާނަށް ދެއްވިކަމަށް މިސްބާހު ވިދާޅުވިއެވެ. މިސްބާހު ވިދާޅުވީ ރިޔާސީ ކޮމިޝަނަށް ރައީސް ޔާމީން އިތުރަށް ހާޒިރުކުރުމާއި މެދު ކޮމިޝަނުގައި މަޝްވަރާކުރުމަށްފަހު ގޮތެއް ނިންމާނެކަމަށެވެ.
މިނިވަން ނޫހުގެ ނޫސްވެރިޔާ އަޙްމަދު ރިޟްވާން ޢަބްދުﷲ ގެއްލުވާލިތާ 6 އަހަރަށްވުރެ ގިނަ ދުވަސްވެފައިވާއިރު، އެ މަރުގެ މައްސަލައަށް އިންސާފް ހޯދައިދެއްވުމަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅެކެވެ. އެގޮތުން ރިޟްވާން ގެއްލުވާލި މައްސަލަ ރިޔާސީ ކޮމިޝަނުން މިހާރު ތަހުޤީޤްކުރަމުންދަނީ ބޭރުގެ އިންވެސްޓިގޭޓަރެއްގެ އެހީއާއިއެކުކަމަށްވެސް އެކޮމިޝަނުން ވަނީ ހާމަކޮށްފައެވެ.
ގެއްލުވާލާފައިވާ މީހުންނާއި މަރާލާފައިވާ މީހުންގެ މައްސަލަތައް ބެލުމަށް ރައީސުލްޖުމްހޫރިއްޔާ އެކުލަވާލާފައިވާ ކޮމިޝަނުން ވަނީ ބައެއް މީހުންގެ މައްސަލަތައް ދައުވާކުރުމަށް ޕީޖީ އޮފީހަށްވެސް ވަނީ ފޮނުވާފައެވެ. ނަމަވެސް ތަޙްޤީޤަށް ބޭނުންވާ ބައެއް ކަންކަން ފުރިހަމަ ނުވުމުން ޕީޖީ އޮފީހުން ވަނީ އެކަންކަން ފުރިހަމަ ކުރުމަށްފަހު ދައުވާކުރުމަށް މައްސަލަ އަބުރާ ކޮމިޝަނަށް ފޮނުވާފައެވެ.
