ހަޟާރަތަކަށް ވިޔަސް، އަދި ގައުމަކަށް ވިޔަސް، ތަރައްގީވެ ކުރިއަރައިގެން އަންނަނީ، އެ ހަޟާރަތަކުން ނުވަތަ، އެ ގައުމަކުން އުފެދިގެން އަންނަ ސިޔާސީ ލީޑަރުންގެ ފިކުރުތަކުގެ ނުވަތަ ސިޔާސަތުތަކުގެ މައްޗަށެވެ. ނުވަތަ ލީޑަރުންގެ ލެގަސީގެ މައްޗަށެވެ.

މިގޮތުން ދުނިޔޭގެ ތާރީޚަށްވެސް، އަދި ފަހުގެ ޒަމާންތަކަށް ބެލި ކަމުގައިވި ނަމަވެސް، ތަރައްގީއާއި ތަމައްދުނުގެ ރޮގުން ދެމެހެއްޓެނިވި ގޮތެއްގައި ކުރި އަރައިގެން އައިސްފަައިވަނީ، އިޚްލާސްތެރި ނުވަތަ، ތިމާގެ ޖާހަތާއި ޝައުގައްވުރެ ކުރިއަށް ރައްޔިތުންނާއި ގައުމުތައް އިސްކޮށްގެން ވެރިކަން ކޮށްފައި ތިބި ހަޟާރަތްތައް ނުވަތަ ގައުމުތަކުގައެވެ.

މި ހަގީގަތުގެ މިސާލުތައް އެންމެ ފުރިހަމަޔަށް ފެންނާން ހުރީ މާތްވެގެންވާ އިސްލާމް ދީން ދުނިޔެއަށް ފާޅުވެގެން އައި ޒަމާނުގައެވެ. މާތްނަބިއްޔާ، މާތްވެގެންވާ އިސްލާމް ދީނަށް ގޮވާލައްވަމުން ވަޑައިގެންނެވީ، ޑިމޮކްރަސީގެ އެންމެ ރިވެތި ނަމޫނާ ދައްކަވަމުން، މަޝްވަރާގެ އުސޫލުތަކާއި، މަޢާފް ކުރުމާއި، އަދި އަނެކުންނަށް ތެދުމަގު ދައްކުވާ ދެއްވާ، ދީން ދަމަހައްޓާ އުގަންނާވާ ދެއްވާނޭ ލީޑަރުންތައްވެސް ތަމްރީކުރައްވާ ތަރުބިއްޔަތު ކުރައްވަމުންނެވެ.

އެހެންނަމަވެސް އެއަށްފަހު އެތައް ޒަމާންތަކެއް ފާއިތުވެ، ދުނިޔޭގެ އެތަން މިތަނުގައި ތަޅާފޮޅުމާއި ހަގުރާމަތައް ގިނައިން ހިގައިގެން ގޮސްފައިހުރީ، އަދި ޚާއްސަކޮށް ފަހުގެ ޒަމާންތަކުގައި މިއުސޫލުން ގައުމުތަކުގައި ބޮޑެތި ގަޑުބަޑުތައް ހިގާފައިހުރީ، ގައުމުތަކުގެ ވެރީން ވެރިކަމުގެ ޖާހަތަށްޓަކާ، ރައްޔިތުންގެ ހައްގުތައް ނިގުޅައިގަނެ، ގައުމުތަކުގެ މައްޗަށް ޚުދުމުޚްތާރުކަން އިސްކުރުމުގެ ސަބަބުންނެވެ.

ނަތީޖާއެއްގެ ގޮތުން، މިފަދަ ބައެއް ގައުމުތަކުގައި، ޚުދުމުޚްތާރު ވެރީންނަށް ވެރިކަމުގައި ދެމި ތިބެވުނެއްކަމަކު، އެގައުމުތައް ވަނީ، ނިކަމެތިވެ، އަދި ގައުމުތަކުގެ ތަރައްގީ އެތައް ގުނައެއް ފަހަތަށް ގޮސްފައެވެ.

މީގެ އެންމެ ގިނަ މިސާލުތައް މިއަދު ފެންނާން ހުރީ އަރަބި ގައުމުތަކުގައެވެ. ސީރިއާ، ލީބިޔާ ފަދަ އަރަބި ބައެއް ގައުމުތައް މިއަދު ހިމެނިގެންދަނީ މީގެ ދިރިހުރި، ފުރިހަމަ މިސާލުތައް ކަމުގައެވެ.

ދިވެހިރާއްޖެ ދެތިން ހަތަރު ލީޑަރުންގެ މުށު ތެރޭގައި ބައިގަރުނު

ސިޔާސީ ލީޑަރުން ގިނަފަހަރަށް ވެރިކަމުގެ ބާރުތައް، ނުވަތަ ރައްޔިތުންގެ މައްޗަށް އޮންނަ ނުފޫޒު ދަމަހައްޓަނީ، ގައުމުގެ ރައްޔިތުން ހާލަތު ނިކަމެތިވެ، އެ ނިކަމެތިކަމާއި ޟައީފްކަމުގެ ނާޖާއިޒު ފައިދާތައް ނަގައިގެންނެވެ.

ދިވެހިރާއްޖޭގެ ފަހުގެ ތާރީޚަށް ނަޒަރެއް ހިންގާލުމުން ފެންނާން އޮތް ހަގީގަތަކީ މިއީއެވެ.

ފާއިތުވެދިޔަ 50 ވަރަކަށް އަހަރުދުވަހުގެ ތެރޭގައި، ރާއްޖޭގެ ވެރިކަމުގެ ނިޒާމުގެ ތެރޭގައި ބަސްބުނަމުން އައިސްފައިވަނީ ދެތިން ލީޑަރެކެވެ.

އެންމެ ފުރަތަމަ ރައީސް މައުމޫނުގެ 30 އަހަރުވީ ދިގުވެރިކަމެވެ. 30 އަހަރު ދުވަހުގެ ދިގު މުއްދަތަކަށް އެމަނިކްފާނު ރާއްޖޭގެ ވެރިކަން ކުރައްވުމަށްފަހު އިސްލާހީ ބަދަލުތަކެއް ގެނައުމަށް ފުރުސަތު ދެއްވިކަމީ ދެބަސްވެވެން ނެތް ހަގީގަތެކެވެ. އެހެންނަމަވެސް، ޑިމޮކްރަޓިކް އެތަކެއް ބަދަލުތަކެއް ގެންނަވަން ފުރުސަތު ދެއްވުމަށްފަހު، އިސްލާހީ ބަދަލުތަކާއެކު ބޭއްވި ރިޔާސީ އިންތިޚާބުގައިވެސް އެމަނިކްފާނު ވާދަކުރައްވަން ބޭނުންފުޅުވެ ވާދަވެސް ކުރައްވާފައި ވެއެވެ.

އެހެންނަމަވެސް އެއިންތިޚާބުން ނާކާމިޔާބު ވެވަޑައިގެންނެވި ނަމަވެސް، ސިޔާސީ މަސައްކަތް ގަދަޔަށް ގެންދަވަނީ ކުރިޔަށެވެ. އެންމެ ފަހުން އަމިއްލަފުޅު ޕާޓީ ހައްދަވާ، މިއަދު ރައީސް މައުމޫނަކީ އެމްއާރުއެމްގެ ރައީސްވެސް މެއެވެ. ޕާޓީގެ އިސްސަފަށް އެހެން ބޭފުޅަކު ގެންނަވާ އާލީޑަރުންތަކެއް އުފަންވެގެން އައުމަށް ޖާގަ ދެއްވާކަށް ބޭނުންފުޅު ވެވަޑައެއް ނުގަންނަވައެވެ.

އެއަށްފަހު ދެން އައީ ރައީސް ނަޝީދުގެ ވެރިކަމުގެ ދައުރެވެ. ވެރިކަމުގެ ދައުރު ފުރިހަމަ ނުކުރެއްވުނެއްކަމަކު، އޭގެފަހުން ޖެހިގެން އައި އިންތިޚާބުގައި ވާދަ ކުރެއްވިއެވެ. އެއިންތިޚާބުގައި ނާކާމިޔާބުވެ ވަޑައިގެންވުމަށްފަހު ދެން ޖެހިގެން އައި އިންތިޚާބުގައިވެސް ވާދަކުރައްވަން އިންތިހާއަށް މަސައްކަތް ކުރެއްވިއެވެ. އެހެންނަމަވެސް، ކަންދިމާކުރި ގޮތުން އެއިންތިޚާބުގައި ވާދަކުރެއްވޭ ގޮތް ނުވުމުން، މިހާރުވެސް ވިދާޅުވަމުން ގެންދަވަނީ ދެން އަންނަން އޮތް އިންތިޚާބުގައިވެސް ވާދަކުރައްވާނެ ކަމަށެވެ.

ހަމަ އެފަދައިން އެމްޑީޕީ އުފެދުމަށްފަހުވެސް އެޕާޓީގެ ލީޑަރަކީވެސް އެމަނިކްފާނެވެ. ޕާޓީގެ ރައީސްކަމަށް ވަޑައިގެންވިހާ ބަޔަކު، އެމަނިކްފާނާ ޚިޔާލު ތަފާތުވެ، އެގޮތް މިގޮތްވެ، ޕާޓީވެސް ދޫކޮށް ޖެހުނީ ދުރަށް ދާށެވެ. ރަސްމީގޮތުން ޕާޓީގެ ރައީސްކަމުގައި ހުންނަވާތާ މިއީ ދެވަނަ ދައުރެވެ.

އާ ސިޔާސީ ލީޑަރަކަށް، ނުވަތަ ފިކުރަކަށް ވިސްނުވުމަކަށް ކުޑަވެސް ފުރުސަތެއް ނެތެވެ.

މިއުސޫލުން ބަލާއިރު، ދެންހުރި ޕާޓީތަކުގެ ތެރެއިންވެސް ފެންނަމުންދަނީ ހަމަ މިހަގީގަތެވެ. ތަފްސީލުތަކަކަށް ދާން ނުޖެހުނު ނަމަވެސް، ޖުމްހޫރީ ޕާޓީ އުފެދުނީއްސުރެ، އެޕާޓީގެ ލީޑަރަކީ މަހުޖަނު ގާސިމް އިބުރާހިމްއެވެ. ރާއްޖެއަށް ޑިމޮކްރަސީ އައުމަށްފަހު، 2018ގެ ރިޔާސީ އިންތިޚާބު ފިޔަވާ އެހެން ހުރިހާ އިންތިޚާބެއްގައި ވަނީ ވާދަ ކުރައްވާފައެވެ. 2018ވަނަ އަހަރުވެސް ވާދަކުރައްވަން ބޭނުންފުޅު ކަމުގައި ވިދާޅުވިއެއްކަމަކު، އޭރުގެ ހާލަތު އޮތްގޮތުން އެފުރުސަތު ލިބިވަޑައި ނުގެންނެވީއެވެ. ޕާޓީގެ އެތެރޭގައި، އާ ސިޔާސީ ފިކުރަކަށް، އިތުރު ލީޑަރޝިޕަކަށް ކުޑަވެސް ފުރުސަތެއް ނެތެވެ.

އަދާލަތު ޕާޓީގެ އެތެރެވެސް އޮތީ ހަމަ މިހާލެއްގައެވެ. މިހާރުގެ އިދިކޮޅު ޕާޓީ ޕީޕީއެމްގެ ހާލަތު ރަގަޅަށް ބަލާ ދިރާސާ ކޮށްލުމުން ސާފުވާން އޮތީވެވެސް ހަމަ އެއް ހަގީގަތެކެވެ.

ފާއިތުވެދި ރިޔާސީ އިންތިޚާބު އޮޅުވާލިކަމަށް ވިދާޅުވެ، ވެރިކަމުން ދުރަށް ވަޑައި ނުގަންނަވަން ރައީސް ޔާމީން އިންތިހާއަށް މަސައްކަތް ކުރެއްވިއެވެ. އަދި އެއަށްފަހުވެސް، މިއަދުވެސް، ޕާޓީގެ އިސް ސަފުގައި ތިއްބެވި ހުރިހާ ބޭފުޅުންނަށްވެސް ޖެހިވަޑައިގެންފައިވަނީ، 2023ގެ ރިޔާސީ އިންތިޚާބުގަވެސް ވާދަކުރައްވާނީ އެމަނިކްފާނުކަމަށް ވިދާޅުވެ، ޕޯޑިއަމަށް އަރުއްވާ ކޮންމެ ފަހަރަކުވެސް އެކަމަށް އަހުދު ކަށްވަރު ހިއްޕަވާ، އެހުވާ އާ ކުރެއްވުމަށެވެ.

މިބީދައިން ކަން އޮތްއިރު، މި ހުރިހާ ޕާޓީތަކެއްގެ ލީޑަރުންވެސް، ޕާޓީތަކުގެ ލީޑަރުންގެ ގޮތުގައި ތިއްބަވައިގެން، ކޮންމެ ރިޔާސީ އިންތިޚާބެއްގައިވެސް، ފާއިތުވެދިޔަ 15 ވަރަކަށް އަހަރު ދުވަހުގެ ތެރޭގައި ރައްޔިތުންނަށް ގުނާ އަދަދު ނުކުރެވޭހާ ގިނަގުނަ ވައުދުތަކާ އަހުދުތައް ވަނީ ވެވަޑައިގެންފައެވެ.

އަދި ފެންނާން އޮތް ހަގީގަތަކީ، މި ވައުދުތަކާއި އަހުދުތަކަށް އަމަލީ ސިފަ ނުގެނެވި އެތައް ފަހަރަކު ފެއިލްވެ، އަދި ލީޑަރުން އެކަކު އަނެކެއްގެ ކަރުގައި ކިތަންމެފަހަރު ހިފާ، އެތައް ހައިޖާނެއް ހެދިޔަސްވެސް، ހަމަ މި ލީޑަރުންނަށް ރައްޔިތުންގެ ތާޢީދުވެސް ހޯދޭކަމެވެ.

އަދި ފަހަތުން އަރައިގެން އަންނަ ސިޔާސީ އެއްވެސް މީހަކަށް، ވެރިކަމަށް ބަސް ނުބުނެވޭހާ ގޮތެއް ޕާޓީތަކުގެ ތެރެއިން އިންތިޒާމުކޮށް، އަލުން އަބުރާ ވެރިކަމަށް އާދެވޭނެހާ ގޮތްތަކެއް ރޭވުމަކީ، މިއީ ފާއިތުވެދިޔަ ބައި ގަރުނުގެވެސް ދިވެހިރާއްޖޭގެ ސިޔާސީ ހަގީތަވެ.

މިވަނީ ކިހިނެއް؟

ދިވެހިރާއްޖޭގައި، ޑިމޮކްރަސީގެ ހެޔޮބަދަލުތައް ދައުލަތުގެ އޮނިގަޑުގެތެރެއަށް އައިސްފައިވީ ނަމަވެސް، މި ޑޮމޮކްރަސީއަކަށް ރައްޔިތުން ހޭލުންތެރިއެއް ނޫނެވެ. އަދި ހަމ އެފަދައިން އިގްތިސާދީ ގޮތުން ދިވެހިރާއްޖެ ކުރިއައިގެން ގޮސްފައިވާ ކަމަށް ގިނަބަޔަކު ގަބޫލުކުރިޔަސްވެސް، ރައްޔިތުންގެ ހާލަތު ބަދަލުވެގެން ގޮސްފައެއް ނުވެއެވެ.

ދިވެހި ރާއްޖޭގެ މުޅި އާބާދީގެ ބޮޑު އިންސައްތައަކީ، އަދިވެސް، ފުރަ މާލޭގައި، ބޮޑު ކުލި ދައްކައިގެން، ކިރިޔާ އުޅެވޭ، ނޫޅެވޭ ވަރުގައި ދިރިއުޅެމުންދާ ރައްޔިތުންނެވެ. ގައުމުގެ މަސައްކަތު އާބާދީގެ ބޮޑު އިންސައްތައަކީ، އެވްރެޖްކޮށް 6،000 ރުފިޔާގެ މުސާރައެއްގައި މަސައްކަތް ކުރާ ރައްޔިތުންނެވެ.

އެހެންކަމުން، މިއަދުގެ ހަގީގަތަކީ، އާބާދީގެ މެޖޯރިޓީއަކީ، ކިރިޔާ ފުދޭވަރުވެގެން ދިރިއުޅެމުންދާ ރައްޔިތުންނެވެ. ނަތީޖާއަކަށްވެގެން ދަނީ، ފުރިހަމަ މިނިވަނަކަށް ވާކަށް ގިނަބައެއްގެ އަމިއްލަ ހާލަތު ތަނެއް ނުދެއެވެ. އަދި ލިބިފައިވާ ތައުލީމާ ތަރުބިއްޔަތުގެ އަލީގައި، އަމިއްލަ ފައިމައްޗަށް ކޮޅަށް ތެދުވުމުގެ ފިކުރެއް ވިސްނުމެއް ނެތް މީހުން އާބާދީގައި ނުހަނު ގިނަގުނައެވެ.

ނަޖީތާއަކީ، ގައުމަށް އައިސްފައިވާ ޑިމޮކްރަޓިކް ބަދަލުތަކާއެކީވެސް، ކޮންމެވެސް ސިޔާސީ މީހެއްގެ ފަސްބައިގައި އެލިގަނެގެން މެނުވީ ދިރި ނޫޅެވޭނަކަމަށް ފެންނަ މީހުން މިއަދުގެ ދިވެހި މުޖުތަމަޢުގައި ނުގަނު ގިނައެވެ. އަދި ގައުމުގެ މިއަދުގެ ގިނަ ސިޔާސީ ލީޑަރުންނަކީ، ރައްޔިތުންގެ މި ނިކަމެތިކަމުގެ ނާޖާއިޒު ފައިދާ ނަގައިގެން އަމިއްލަ ޖާހަތު މަތިވެރި ކުރުމަށް ކަމަރު ބަދެގެން ތިއްބެވި ސިޔާސީ ލީޑަރުން ކަންވެސް ފާހަގަ ކޮށްލަން ޖެހެއެެވެ.

އޭގެ ނަތީޖާއެއްގެ ގޮތުން، ދިވެހިރާއްޖޭގެ މިއަދުގެ މުޅި ސިޔާސީ މަސްރަހު ބައްޓަންވެފައ އޮތީ، މިދެންނެވުނު އުސޫލުގެ މަތިން، ރައްޔިތުން ސިޔާސީ ލީޑަރުންނަަށް ސަނާކިޔުމާއި، އެ ސިޔާސީ ލީޑަރުންގެ ވަށައިގެން އެބުރުމުގެ ސަގާފަތުގެ މައްޗަށެވެ. އޮތީ، ގައުމަށް ތަރައްގީއެއް ނަޔަސްވެސް، ތަރައްގީ ގެނައުމަށް އެލީޑަރުން ވާ ވައުތަކަށް ރައްޔިތުންވެސް އިތުބާރުކޮށް، އެއްބަޔަކު އަނެއްބައެއްގެ ކިބައި ފައިދާ ލިބިގަތުމުގެ ސަގާފަތެކެވެ.

ގައުމާމެދު ވިސްނުމެއް ނެތެވެ. ފިކުރު ކުރުމެއްވެސް ނެތެވެ.

މިނޫން ދުވަހެއް ފެންނާން އެބަޖެހޭ!

ދުނިޔޭގެ އެކި ކަންކޮޅުތަކަށް ނަޒަރެއް ހިންގާލުމުން ފެންނާން އޮތް ހަގީގަތަކީ، މިއަދުގެ ދުނިޔޭގައި އެންމެ ކުރިއަރާފައިވާ ހުޅަގުގެ ގައުމުތަކާއި އަދި ޔޫރަޕްގެ ގައުމުތަކަކީ، އެގައުމުތަކުގައި، ޖަވާބު ދާރީ ކުރުވޭ، ޑިމޮކްރަސީގެ ނިޒާމުތައް އޮތް ގައުމުތައް ކަމެވެ.

ދުނިޔޭގެ މިވަގުތުއޮތް އެންމެ ފުރިހަމަ އެއް ޑިމިކްރަސީ އޮތް އެމެރިކާއަށް ބަލާލަމާ ތޯއެވެ. ފާއިތުވެދިޔަ ދައުރުގައި އެގައުމުގައި ވެރިކަންކުރި ޑޮނަލްޑް ޓްރަމްޕަކީ، މުޅި އެމެރިކާގެ ތާރީޚުގައިވެސް، އެގައުމުގެ ވެރިކަމުގައި ހުންނަވައިގެން އެންމެ ޚުދުމުޚްތާރު ސިފތައްތައް ގެންގުޅުއްވި ލީޑަރެވެ. އަދި ވެރިކަމުގެ ފުރަތަމަ ދައުރަށްފަހު، އިންތިޚާބުގައި ބަލިވުމުންވެސް، ވެރިކަމުގައި ދެމިހުންނެވުމަށް މަސައްކަތް ކުރެއްވިއެވެ.

އެހެންނަމެވެސް، އެމެރިކާގެ ވެރިކަމުގެ އޮނިގަޑުގެ ތެރޭގައި، އެގައުމުގެ ޑިމޮކްރަސީ ނެގެހެއްޓުމަށް ޖަހާފައިހުރި ތަނބުތައް ޓްރަމްޕަށް މުގުރައެއް ނުލެވުނެވެ. އަދި އެންމެފަހުން، އެގައުމުގެ އަސްކަރިއްޔާއިންވެސް ބަސް ބުނެފައިވަނީ، ދައުރު ބަދަލުވާން އޭރުގެ ރައީސް ޓްރަމްޕް ފުރުސަތު ނުދެެއްވަފިނަމަ، އެމެރިކާގެ ގާނޫނު އަސާސީ ނެގެއްޓުމަށް އަސްކަރިއްޔާއިން ތެދުވާނެކަމަށެވެ.

އެހެންކަމުން، ހުޅަގާއި ޔޫރަޕް ތަރައްގީއާއި ތަމައްދުނުގެ ރޮގުގައި ފާއިތުވެދިޔަ ޒަމާންތަކުގައި ކުރިއަރައިގެން ގޮސްފައިވަނީ، އަދި ރައްޔިތުންގެ ހާލަތު ރަގަޅުވެ، މިނިވަންކަންވެސް ލިބިގެންދިޔައީ، ހަގީގަތުގައިވެސް އެގައުމުތަކުގައި ފުރިހަމަ މާނާގައި ޑިމޮކްރަސީ ދެމެހެއްޓިގެންނެވެ. ވެރީންގެ ވެރިކަން ދައުރަކަށްފަހު ދައުރަަކަށް ބަދަލުވަމުން އައި އައުމުގެ ނަތީޖާއެއްގެ ގޮތުންނެވެ.

އާ ސިޔާސީ ފިކުރުތަަކަށް، ނުވަތަ ތާޒާކަން ހުރި ވިސްނުމާއި، ތާޒާ ލޭ ހުރި، އާ ލީޑަރުންނަށް އެގައުމުތަކުގެ ލީޑަރޝިޕުން ޖާގަލިބިގެން ދިއުމުގެ ނަތީޖާއެެއްގެ ގޮތުންނެވެ.

އެއްވިސްނުމެއް، އެއް ފިކުރެއްގެ މަތީގައި، ނުވަނަ އެއް ލެގަސީއެއްގައި އެތައް އަހަރެއް ފާއިތުވެގެން ދިިޔަނުދީ، ގައުމުގެ ކުރިމަގާމެދު ވިސްނާނޭ މުޅިން އާ ހަކަތައް އެގައުމުތަކުގެ ވެރިކަމުގެ ނިޒާމުގެތެރެއަށް ގެނެސްގެންނެވެ.

އެހެންކަމުން، މިއަދު ގަބޫލުކުރަން ޖެހިފަ އޮތް ހަގީގަތަކީ، ދެތިން ހަތަރު ލީޑަރެއްގެ މުށުތެރޭގައި ދިވެހިރާއްޖެ ބައި ގަރުނު ކަޑައްތު ކޮށްފިކަމެވެ. އަދި ފާއިތުވެދިޔަ ދިގު މުއްދަތުގައި، ހަގީގަތުގައިވެސް ރައްޔިތުންގެ ހާލަތު ބަދަލުވެގެން ނުދިޔަކަމެވެ. ތަރައްގީގެ އެތަކެއް ވައުދުތަކެއްވެ، ތަރައްގީގެ އެތަކެއް އަގުބޮޑު މަޝްރޫޢޫތަކެއް ހިންގަމުން އައިކަމުގައިވި ނަމަވެސް، ޒަމާނީ ތަރައްގީ ދިވެހިރާއްޖެއައް ނައިކަމެވެ.

މިއަދު މިކަންކަމާމެދު ވިސްނާ ފިކުރުކޮށް، ވެރީންގެ ވަށައިގެން ރައްޔިތުން ތާއަބަދަށް ކުރުނީސްކޮށް، ވަށައިގެން ތަވާފްކުރުމުގެ ސަގާފަތް ދޫކޮށް، އެ ސަގާފަތް ބަދަލުކޮށް، އާ ވިސްނުންތަކަށް ޖާގަދީ، އާ ހަކަތާގައި އާ ލީޑަރުންތަކަކަށް ރައްޔިޔުން ޖާގަ ނުދީފިނަމަ، ދެންވެސް ގައުމުގެ މުސްތަގުބަލުން ފެންނާން އޮތީ ބަނަކަމާއި، ނުތަނަވަސްކަމާއި ނާއުންމީދެވެ.

މިނޫން ދުވަހެއް ފެންނާނީ، ރައްޔިތުންނަށް ހެޔޮވިސްނި، ރައްޔިތުން ކަށީގެ މަދުން ހިތްވަރު ނެރެގެންކަމީ ކަށަވަރުވެ ޔަގީންވާ ކަމެކެވެ. ވަކިވަކި ފަރުދުންނަށް ތާއީދުކޮށް ކޮޅުނެތްކޮޅަށް ތާއަބަދު ކުރުނީސް ކުރުމުގެ ބަދަލުގައި، ސިޔާސަތުތަކަށް ތާއީދު ކޮށްގެންނެވެ.