ރާއްޖޭގެ ވެކްސިން ޖެހޭ އާބާދީއަށް ބޭނުންވާވަރަށް ކޯވީޑް ދިފާޢު ވެކްސިން ހޯދުމުން ދައްކުވައިދެނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞަލިޙްގެ ލީޑާޝިޕްގެ ހަރުދަނާކަންކަމަށް މޯލްޑިވްސް ތާރޑްވޭ ޑިމޮކްރެޓިކްސް (އެމްޓީޑީ) އިން ބުނެފިއެވެ.
އެމްޓީޑީ އިން ނެރުނު ބަޔާނެއްގައި ބުނެފައިވަނީ، ގިނަ ގައުމުތަކުގެ މިއަދުގެވެސް ހާލަތަކީ އެގައުމުގެ ރައްޔިތުންނަށް ދޭނެ ވެކްސިންވެސް ނުލިބި އެތައް ބަޔަކު ކޮވިޑް-19 ގެ ބަލީގެ ޝިކާރައަކަށްވެ ނިޔާވަމުން ދިއުންކަމަށެވެ. ދިވެހި ރާއްޖެއިން މިވަނީ މިކަމުގައި ބޮޑެތި ކުރިއެރުންތަކެއް ހޯދައިފައިކަމަށާއި، ރައީސް ޞާލިހްގެ ލީޑަރޝިޕްގެ ދަށުން ރާއްޖެއަށް ބޭނުންވާވަރަށް ވެކްސިން ހޯދާފައިވާކަން އެޕާޓިން ވަނީ ފާހަގަކޮށްފައެވެ. އަދި ރައީސް ޞާލިހު އިންސާނިއްޔަތުކަން އިސްކުރައްވާ ރާއްޖޭގައި މަސައްކަތް ކުރާ ބިދޭސީން އިސްތިސްނާނުކޮށް ވެކްސިން އެމީހުނަށްވެސް ހިލޭ ޖަހައިދީ، މިހާރު ރާއްޖޭގެ %61 އާބާދީ ދެޑޯޒް ޖަހާ ވެކްސިނޭޝަން ފުރިހަމަކޮށްފައިވާކަމަށާއި، %70 މީހުން ފުރަތަމަ ޑޯޒް ޖަހާފައިވާކަންވެސް އެޕާޓިން ފާހަގަކޮށްފައިވެއެވެ. އެމްޓީޑީން ބުނީ، މިއީ ދުނިޔާގެ ފެންވަރުން ބެލިނަމަވެސް ވަރަށް ބޮޑުކުރިއެރުމެއްކަމަށެވެ. މި އާލަމީ ވަބާގެ ތެރޭގައި ޑޮކްޓަރުންނާއި ނަރުހުންނާއި ، އެޗް.ޕީއޭ، މޯލްޑިވްސް ރެޑް ކްރެސެންޓް، ޑަބްލިއު.އެޗް.އޯ މާލްޑިވްސް އަދި ފްރަންޓް ލައިންގައި މަސައްކަތް ކުރާ ހުރިހާ ހިދުމަތްތެރިން ކުރައްވަމުންދާ ބުރަ މަސައްކަތް އެޕާރޓީން ހިތުގެ އަޑީން ގަބޫލްކޮށް ޝުކުރުވެރިކަމާއި އެކީ ސެލިއުޓްކުރާކަމަށްވެސް ބުނެފައިވެއެވެ.
ކޮވިޑް-19ގެ އާލަމީ ވަބާ އަކީ ދުނިޔޭގެ ފަހުގެ ތާރީހުގައި ދިމާވި އެންމެ ބޮޑު ސިއްހީ ކާރިސާއެވެ. އަދި ދެމިގެން މިދާ ވަބާގައި އެތައް ބަޔަކު ވަނީ ދުނިޔެދޫކޮށް ގޮސްފައެވެ. މިކަމާއި ގުޅިގެން އެޅަން ޖެހުނު ފުރަބަންދުގެ ސަބަބުން ދަތުރުފަތުރުކުރުމާއި އަދި އެހެން ގޮންޖެހުންތަކުގެ ސަބަބުން ބޭސްފަރުވާއަށް ހުރަސްއެޅި އެތައް ބަޔަކު ވަނީ އެހެން ބަލިތަކުގައި ވެސް ދުނިޔެދޫކޮށް ގޮސްފައެވެ. އަދި ނަފްސާނީ ގޮތުން އެތައް މައްސަލަތަކެއް ދިމާވެ އިގްތިސާދީ ގޮތުން އިއާދަ ނުކުރެވޭނެ ވަރުގެ ގެއްލުންތައް އެތައް ގައުމަކަށާއި އެތައް ބަޔަކަށް ވަނީ ކުރިމަތިވެފައިއެވެ. ދުނިޔޭގެ ގައުމުތަކުގައި ކޮވިޑް-19 އާއި ދެކޮޅަށް ބޭނުން ކުރަމުންދާ އެންމެ ބޮޑު ހަތިޔާރަކީ ވެކްސިނޭޝަން އެވެ.
– އެމްޓީޑީގެ ނޫސްބަޔާނުގައިވެއެވެ.
އެމްޓީޑީން ބުނީ އެޕާޓީގެ އެންމެ ބޮޑު ކަންބޮޑުވުމަކީ އަދިވެސް ތަފާސް ހިސާބުތައް ދައްކާ ގޮތުން ކޮވިޑް-19 ވެކްސިން ނުޖަހާފަރާތްތަކުގެ ތެރޭގައި 18 އަހަރާއި 26 އަހަރުގެ ދެމެދު ޒުވާނުން ގިނަ ޢަދަދަކަށް ތިބުންކަމަށެވެ. އެޕާޓިގެ އެދުމަކީ ރައީސް ޞާލިހު ގޮވާލާފައިވާ ގޮވާލުމާއި އެއްގޮތަށް ފަރުދީ އަދި އާއިލީ ޒިންމާއެއްކަން މިކަން ދެކިގެން ވެކްސިން ފުރިހަމަކުރުމަށް ހުރިހާ ޒުވާނުން އަތުކުރި އޮޅާލާ އިސްނަގައިގެން ވެކްސިންޖަހަން ދިޔުންކަމަށްވެސް ބުނެފައިވެއެވެ.
ރާއްޖެއަކީ ކޯވިޑް ވެކްސިން ކެންޕެއިން އެންމެ ކާމިޔާބުކޮށް ހިންގާ އެއް ގައުމެވެ. ވެކްސިން ހޯދަން ސަރުކާރުން ވަނީ ކާމިޔާބު މަސައްކަތްތަކެއް ކޮށްފައެވެ. އިންޑިއާ އާއި ޗައިނާގެ ގުޅުން ހަރުދަނާކޮށް އެ ދެ ގައުމުންވެސް ވެކްސިންގެ ބޮޑު ސްޓޮކެއް ހިލޭ ހޯދާފައިވެއެވެ. އަދި އެކި ކުންފުނިތަކަށް ފައިސާ ދައްކައިގެން ވެކްސިން ހޯދުމަށް އެކި މަސައްކަތްތައް ކޮށްފައިވެއެވެ.
