އޭޝިއަން އެކެޑެމީ އޮފް އެއިރޮނޯޓިކްސް (އޭއޭއޭ)ގެ ފަރާތުން އައްޑޫ ސިޓީގައި ހިންގި ފްލައިން ސްކޫލްގެ ދަރިވަރުން ސިވިލްކޯޓަށް ހުށަހަޅާފައިވާ މައްސަލާގައި އެދުނު ވަގުތީ އަމުރު ނެރެދެވެން ނެތްކަމަށް އެކޯޓުން ކަނޑައަޅައިފި އެވެ.
އޭއޭއޭގެ އަތުން ބޮޑު ބަދަލެއް ހޯދަން ސިވިލް ކޯޓަށް ހުށަހެޅި 48 ދަރިވަރުން އެދިފައިވަނީ ބަދަލުހޯދުމުގެ މައްސަލަ ނިމުމުގެ ކުރިން އެކުންފުނީގެ ވިޔަފާރި ވިއްކައި ނުލެވޭނެ ނުވަތަ އެ ފަރާތުގެ ވިޔަފާރީގެ ހައްގުތައް އެހެން ފަރާތަކަށް ބަދަލުކޮށް ވިއްކާލުމުގެ އެއްވެސް މުއާމަލާތެއް އެއްވެސް ފަރާތަކާއެކު ނުކުރުމަށް އަމުރެއް ނެރެދިނުމަށެވެ.
މި މައްސަލާގައި ވަގުތީ އަމުރު ނެރެދެވެން ނެތްކަމަށް ނިންމީ އިއްޔެ ސިވިލް ކޯޓުގައި ބޭއްވި މައްސަލައިގެ އަޑުއެހުމުގައެވެ.
ސިވިލް ކޯޓުން ނިންމި ނިންމުމުގައި ބުނެފައިވަނީ އޭއޭއޭގެ މުދަލާއި ވަސީލަތްތައް ރާއްޖޭގެ އިހްތިސޯސް ނުހިނގާ ފަދަ ސަރަހައްދަކަށް ގެންދަން ނުވަތަ ބަދަލު ކުރަން ނުވަތަ ވިއްކާލަން މަސައްކަތް ކުރާކަން އެނގެން ނެތް ކަމަށެވެ.
އެހެންކަމުން މި މައްސަލައިގައި ދައުވާ ސާބިތުވެއްޖެ ހާލަތެއްގައި ވެސް، މި އަމުރު ނެރުމުގެ ސަބަބުން ކޯޓުގެ ހުކުމް ތަންފީޒުވުމަށް ހުރަސްއެޅިދާނެ ފަދަ ހާލަތެއް މެދުވެރިވާނެ ކަމަށް ޝަރީއަތަކަށް ބުރަވެވެން ނެތް ކަމަށް ސިވިލްކޯޓުގެ ނިންމުމުގައި ބުނެފައި ވެއެވެ.
އޭއޭއޭ އާއި ދެކޮޅަށް މައްސަލަ ހުށަހެޅި ދަރިވަރުން އެދިފައިވަނީ އެކި ގޮތްގޮތުން ދަރިވަރުންނަށް ލިބިފައިވާ ގެއްލުމުގެ ބަދަލެއްގެ ގޮތުގައި އެކު ޖުމްލަ 1.8 މިލިޔަން ޑޮލަރު އޭއޭއޭގެ އަތުން ނަގައި ދިނުމަށެވެ.
އައްޑޫ ފްލައިން ސްކޫލުގައި ހުރި ގިނަ މައްސަލަތަކެއް ފެންމަތިވެ، އެތަން އެގޮތުގައި ކުރިއަށް ނުގެންދެވޭނެކަން ސަރުކާރުން ޓްރިޕަލް އޭ ކުންފުންޏަށް އަންގާ އިންޒާރު ދިންފަހުން އެކުންފުޏާއި އެކު ވީ އެއްބަސްވުމެއްގެ ދަށުން ފްލައިން ސްކޫލް ހިންގުމާއި ހަވާލުވެފައި ވަނީ ރާއްޖޭގައި މަތީ ތަޢުލީމްގެ ކޯސްތައް ހިންގަމުން އަންނަ އެވިޑް ކޮލެޖުން ނެވެ. އެކޮލެޖުން ފްލައިން ސްކޫލާ ހަވާލުވީ މިދިޔަ ޖޫން މަހުގެ 24 ވަނަ ދުވަހު އެވެ.
ކޮމެންޓު ފޮނުވާ