ސައުތު އިންޑިއާ، ހާއްސަކޮށް ޓެލަގޫ ސިނަމާގެ މަޝްހޫރު އެކްޓަރ ސަތިޔަދޭވް ބޮލީވުޑަށް ނުކުތުމުގެ އަޑު ގަދަވެފައިވަނިކޮށް އޭނާ ބޮލީވުޑް އަށް ނުކުންނަނީ އަކްޝޭ ކުމާރާއި އެކުގައިކަމަށް ރިޕޯޓްތައް ބުނެފިއެވެ.
ސަތިޔަދޭވްގެ މަގުބޫލް ފިލްމް ތަކުގެ ތެރޭގައި "ޖެޔޯތީ ލަކްޝްމީ"، "ކަޝްނަމާ"، "ބަލްފް މާސްޓަރ" އަދި "މަނާ އޫރީ ރަމަޔާނަމް" ފަދަ ފިލްމުތައް ހިމެނެއެވެ. އޭނާ މަޝްހުރު ވެފައިވަނީ ފިލްމް ތަކުގައި އޭނާ ދައްކުވައިދީފައިވާ މޮޅު އެކްޓިންގެ ސަބަބުންނެވެ.
ސަތިޔަދޭވަކީ ކޮމްޕިއުޓާ އިންޖީނިއަރެކެވެ. އޭނާ އެދާއިރާ ދޫކޮށްލީ ފިލްމީ ދާއިރާއިން ކުރިއަށް ދިއުމަށެވެ. އެއާއެކު އޭނާގެ މޮޅު އެކްޓިން ވަނީ ފިލްމީ ދާއިރާއިން މީހުން ބަލައިގަނެ މަޝްހޫރު ކަމަކާއި މަގުބޫލުކަން ހޯދާފަ އެވެ.
ބޮލީވުޑަށް ތަޢާރަފްވުމަށް އޭނާ ދެކޭ ހުވަފެންތަކުގައި ހަގީގީ ކުލަޖެހިގެން އައީ އަކްޝޭގެ ކުރިއަށް އޮތް ފިލްމު "ރާމް ސެތޫ" އިން ޖާގަ ލިބުމުންނެވެ. މި ފިލްމުގައި އޭނާ އާއި އަކްޝޭގެ އިތުރުން ޖެކޮލިން ފެރްނާންޑޭޒް އާއި ނުސްތަރު ބަރޫޗާ ފެނިގެން ދާނެއެވެ. އަބީޝޭކް ޝަރްމާ ޑައިރެކްޓް ކުރާ މިފިލްމަކީ އެކްޝަން އަދި އެޑްވެންޗަރ ފިލްމެކެވެ. އަދި މި ފިލްމުގައި އިންޑިއާގެ ސަގާފަތާއި ތާރީޚުގެ ތެރެއިން ބައެއް ދައްކުވައިދޭނެ އެވެ.
32 އަަހަރުގެ ސަތިޔަދޭވް މި ވަގުތު ހުރީ މިފުރުސަތު ލިބުމުން ވަރަށް އުފަލުން ކަމަށާއި، ޝޫޓިންގ ފެށުމަށް ކެތް މަދުވެފައިވާ ކަމަށް ހަބަރުތަށް ބުނެއެވެ. ސަތިޔަދޭވް ބޭނުން ވަނީ ހިންދީ، ޓެލަގޫ، ކަންނަޑާ، އަދި މަލަޔާލަމް އިންޑަސްޓްރީގައި ވެސް ނަންހިގާ މަޝްހޫރު މީހަކަށް ވާށެވެ.
View this post on Instagram
ސައުތު އިންޑިއާގެ ނަން މަޝްހުރު ތަރިން ދަނީ ބޮލީވުޑަށް ނުކުންނަމުންނެވެ. އެގޮތުން އާމިރު ޚާންގެ ކުރިއަށް އޮތް ފިލްމް "ލާލްސިންގ ޗައްޑާ"އިން ވެސް ސައުތުގެ މަޝްހޫރު ތަރި ނާގަ ޗައިތަނިޔާ ފެނިގެން ދާނެއެވެ.
