ގްރޭޓަރ މާލެ ކަނެކްޝަން ގްރިޑްގެ ދެވަނަ ސާކިޓްގެ މަސައްކަތަށް މިއަދުވެސް ކުރަމުން އަންނާތީ، މާލެ ސަރަހައްދުން ކަރަންޓު ކެނޑުމުގެ ފުރުޞަތު އޮތްކަމަށް ސްޓެލްކޯ އިން ބުނެފިއެވެ. ގްރޭޓަރ މާލެ ކަނެކްޝަން ގްރިޑްގެ ދެވަނަ ސާކިޓް ސްޓެލްކޯއިން އެނަރޖައިޒްކުރުމުގެ މިމަސައްކަތަށް އިއްޔެވެސް މާލެއިންވަނީ ގާތްގަނޑަކަށް ދެގަޑިއިރެއްހާއިރުވަންދެން ކަރަންޓު ކަނޑާލާފައެވެ.
ސްޓެލްކޯއިން ބުނީ، ގްރޭޓާމާލެ ގްރިޑްގެ ދެވަނަ ސާކިޓްގެ މަސައްކަތް މިއަދުވެސް 17:00 އާއި ހަމަޔަށް ކުރަމުންދާނެކަމަށާއި، މި މަސައްކަތުގެ ތެރެއިން މާލެއާއި، ހުޅުމާލެއިން ކަރަންޓު ކެނޑުމުގެ ފުރުސަތުއޮތްކަމަށެވެ. ސްޓެލްކޯއިން ބުނީ، ގްރޭޓާމާލެ ގްރިޑްގެ މަސައްކަތް ކުރިން ރޭވިފައި އޮތް ދުވަސް ތަކުގެ އިތުރުން މިމަހުގެ 23 އަދި 24 ވާ ހުކުރު އަދި ހޮނިހިރުގައިވެސް ކުރާގޮތަށް މިހާރު ހަމަޖެހިފައިވާކަމަށާއި، އިތުރު ޓެކްނިކަލް މައްސަލައެއް ދިމާނުވާކަމަށްވާނަމަ، މިމަހުގެ 24 ވާ ހޮނިހިރު ދުވަހަކީ މި މަސައްކަތުގެ ފަހު ދުވަހަށް ވެގެންދާނެކަމަށެވެ. އަދި މި ދެދުވަހުވެސް ހުޅުމާލެއާއި، މާލެއިން ކަރަންޓު ކެނޑުމުގެ ފުރުސަތު އޮތްކަން ކަސްޓަމަރުންގެ މައުލޫމާތައްޓަކައި ސްޓެލްކޯއިން ވަނީ ފާހަގަކޮށްފައެވެ.
ކަސްޓަމަރުންގެ ސަމާލުކަމަށް: ގްރޭޓާމާލެ ގްރިޑްގެ ދެވަނަ ސާކިޓްގެ މަސައްކަތް މިއަދުވެސް 17:00 އާއި ހަމަޔަށް ކުރަމުންދާނެ. އަދި މި މަސައްކަތުގެ ތެރެއިން މާލެއާއި، ހުޅުމާލެއިން ކަރަންޓު ކެނޑުމުގެ ފުރުސަތު އޮތްވާހަކަ އެންމެހާ ކަސްޓަމަރުންގެ ސަމާލުކަމަށްޓަކައި ދަންނަވާލަން.
— STELCO (@STELCOMALDIVES) July 22, 2021
ގްރޭޓަރ މާލޭ ކަނެކްޝަން ގްރިޑް މަޝްރޫއަކީ ހަކަތައިގެ ދާއިރާއިން ރާއްޖޭގައި މިހާތަނަށް ހިންގޭ އެންމެ ބިޔަ މަޝްރޫޢުކަމަށް ސްޓެލްކޯއިން ބުނެފައިވެއެވެ. ސްޓެލްކޯއިން ބުނީ، ދެމެހެއްޓެނިވިގޮތެއްގައި ރައްޔިތުންނަށް ފަސޭހަ ނިޒާމަކުން ކަރަންޓުގެ ޚިދުމަތް ދިނުމަށް ކުރިއަށްގެންދާ މިމަޝްރޫއާއެކު ގިނަ ފަސޭހަތަކެއް ލިބިގެން ދާނެކަމަށެވެ. އަދި މިކަން ކުރުމުގައި މިވަގުތު ކޮންމެވެސް ވަރެއްގެ ދަތިތަކެއް ރައްޔިތުންނަށް އުފުލަންޖެހިދާނެކަމަށް ސްޓެލްކޯއިން ވިދާޅުވެއެވެ. ސްޓެލްކޯއިންވަނީ ގްރޭޓަރ މާލޭ ކަނެކްޝަން ގްރިޑްގެ ދެވަނަ މަރުޙަލާގެ މަސައްކަތް ކަމުގައިވާ މަޝްރޫޢުގައި ހިމެނޭ ދެވަނަ ސަރކެޓް އެނަރޖައިޒްކުރުމުގެ މަސައްކަތް ނިންމާލާފައެވެ.
ފަހު ދުވަހަށް ވެގެންދާނެ. އަދި މި ދެދުވަހުވެސް ހުޅުމާލެއާއި، މާލެއިން ކަރަންޓު ކެނޑުމުގެ ފުރުސަތު އޮތްވާހަކަ އެންމެހާ ކަސްޓަމަރުންގެ މައުލޫމާތައްޓަކައި ދަންނަވާލަން. 2/2
— STELCO (@STELCOMALDIVES) July 22, 2021
ސްޓެލްކޯއިން ބުނީ، މިމަޝްރޫޢުގެ ދަށުން ކުރިއަށްގެންދާ އެންމެ ފަހުގެ މަސައްކަތް ކުރުމަށް ހަމަޖެހިފައިވަނީ ބުރާސްފަތި ދުވަހުކަމަށެވެ. އެގޮތުން ބުރާސްފަތި ދުވަހު ހުޅުލޭގެ ސަބްސްޓޭޝަން އެނަރޖައިޒްކުރުމުގެ މަސައްކަތް ކުރުމަށް ހަމަޖެހިފައިވާކަމަށް ސްޓެލްކޯއިން ބުންޏެވެ.
މާލެއާއި، ހުޅުމާލެ އަދި ހުޅުލޭގެ ކަރަންޓު ވިއުގަ 132 ކިލޯ ވޮޓްގެ 7 ކިލޯމީޓަރުގެ ދެ ސާރކިޓުން ގުޅާލާ މަޝްރޫޢެކެވެ. މިއާއެކު ގްރޭޓަރ މާލޭގެ ކަރަންޓުގެ ޚިދުމަތް އެއްވިއުގައަކުން ގުޅާލެވުނީއެވެ. މިއީ މިސަރަޙައްދުގެ ކަރަންޓުގެ މައްސަލަތައް ޙައްލުކުރުމަށް ސަރުކާރުން ކުރިއަށްގެންދާ ބޮޑު މަޝްރޫއެކެވެ. މިއާއެކު 100 މެގަ ވޮޓްގެ ހަކަތަ ފޮނުވުމުގެ ޤާބިލުކަން ލިބޭ ކަރަންޓު ކަނެކްޝަނާއެކު މިއިން ކޮންމެ ސަރަޙައްދަކުން ކަރަންޓު ކެނޑުނުކަމުގައިވީނަމަވެސް މަދު ވަގުތުކޮޅެއްގެ ތެރޭގައި އަނެއް ސަރަޙައްދުގައި ޤާއިމުކޮށްފައިވާ ގްރިޑުން ހަކަތަ ފޯރުކޮށްދީ ކަރަންޓުގެ މައްސަލަ ޙައްލުކުރެވޭނެކަމަށް ސްޓެލްކޯއިން ބުނެފައިވެއެވެ.
