2018 ވަނަ އަހަރު ވެރިކަމަށް އައި ކޯލިޝަން ސަރުކާރު ވެރިކަމަށް އައީ، ގިނަ ޕާޓީތައް އެކުލެވޭ ޕްލެޓް ފޯމެއްގައި ކެމްޕޭންކޮށް، ވައުދުތައްވެ، އަދި ރިޔާސީ އިންތިޚާބުވެސް ކާމިޔާބު ކޮށްގެންނެވެ.

އަދި އޭރުވެސް، ކޯލިޝަންގެ އެންމެ ބޮޑު ޕާޓީއެއްގެ ގޮތުގައި އެމްޑީޕީ އޮތް ނަމަވެސް، އެމްޑިޕީއެކޭ އެއްފަދައިން އެ ކޯލިޝަންގައި ހިމެނޭ އެހެން ހުރިހާ ޕާޓީތަކުންވެސް އޭރު މަސައްކަތް ކޮށްފައިވަނީ، އެއް ރޫޙެއްގައެވެ. އެއީ ރައީސް ޔާމިންގެ "އަނިޔާވެރި ވެރިކަން" ނިމުމަކަށް ގެނައުމަށެވެ.

ރައީސް ޔާމިންގެ "އަނިޔާވެރި ވެރިކަން" ނިމުމަކަށް ގެނައުމަށް މަސައްކަތްކުރި ކޯލިޝަންގެ ޕާޓީތައް އެއްގަލަކަށް 2018 ވަނައަހަރުގެ ރިޔާސީ އިންތިޚާބަށްޓަކާ އަރަންޖެހުނު އެންމެ މުހިންމު އެއް ސަބަބަކަށްވީ، އޭރު އުފެދުނު ކޯލިޝަން ޕާޓްނަރުންގެ ޕާޓީތަކުގެ ލީޑަރުން ރައީސް ޔާމިންގެ ވެރިކަމުގައި ޖަލަށް ލެއްވުމެވެ. އޭގެތެރޭގައި ހިމެނިވަޑައިގަންނަވާ އެއް ބޭފުޅަކީ، މިހާރުވެސް ވެރިކަން ކުރަމުން އަންނަ ކޯލިޝަންގެ އެއް ޕާޓީ ކަމުގައިވާ އަދާލަތު ޕާޓީގެ ލީޑަރު ޝޭޚު އިމްރާންއެވެ.

ނަތީޖާއެއްގެ ގޮތުން، ޝޭޚު އިމްރާން ޖަލުން މިނިވަން ކުރުމަށްޓަކާ އޭރު ކުރެވުނު މަސައްކަތުގައި އެމްޑީޕީ ބައިވެރިވެ، ޒަމާނުއްސުރެ ސިޔާސީ ހަތުރުން ކަމުގައި ބެލެވެމުންއައި، އަދާލަތު ޕާޓީއާއި އެމްޑީޕީ އެކީގައި މަސައްކަތް ކުރަން ފެށިއެވެ.

އަދި ފަހުން އެމްޑީޕީގެ ރައީސްވެސް ރައީސް ޔާމިންގެ ވެރިކަމުގައި ޖަލަށް ލެވުމާއެެކު، އެމްޑީޕީއާއި އަދާލަތު ޕާޓީގެވެސް މަސްލަހަތު އެއްގޮތްވެ، އެއްބަޔަކު އަނެއްބަޔަކަށް މުހިންމުވެ، 4 ލީޑަރުން އެކުލެވޭ ކޯލިޝަނެއްގައި ރައީސް ޔާމިންގެ ވެރިކަން ނިމުމަކަށް ގެނައުމުގެ މަސައްކަތް ފެށިގެން ދިޔައީއެވެ.

އަދި މި ކޯލިޝަންގެ ލީޑަރެއްގެ ގޮތުގައި ރައީސް އިބުރާހިމް މުހައްމަދު ސޯލިހު ހުންނަވާ، 2018ގެ ރިޔާސީ އިންތިޚާބަށް އެމަނިކްފާނު ވެވަޑައިގެންނެވި އެންމެ މުހިންމު ވައުދަކަށް ވެގެންދިޔައީ، ކޯލިޝަން ރޫޅާ ނުލާ، ވެރިކަން ކުރެއްވުމެވުމުގެ ވައުދެވެ.

ކޯލިޝަންވެ ވެރިކަމަށް ދޭއް ބައި އަހަރު، ނަޝީދުގެ އެންމެ ބޮޑު އަމާޒު އަދާލަތާ ދިމާލަށް!

ކޯލިޝަންގެ ޕްލެޓް ފޯމެއްގައި ވެރިކަމަށް ވަޑައިގެންނެވި، ރައީސް އިބުރާހިމް މުހައްމަދު ސޯލިހުގެ ވެރިކަމުގެ ދައުރު ދެބައި ވެގެން ދިޔައީއެވެ.

ފާއިތުދިޔަ ދޭއް ބައި އަަހަރުގެ ތެރޭގައިވެސް، ކޯލިޝަންގައި ހިމެނޭ ޕާޓީތަކުގެ އެތަކެއް ވަޒީރުންނެއް މަގާމުން ދުރު ކުރެވިއްޖެއެވެ. މަގާމުން ދުރުކުރެވުނު ގިނަވަޒީރުން މާގަމުން ދުރުކުރެވިގެން ދިޔައީ، އެވަޒީރުންނަށް ރައްޔިތުންގެ މަޖިލިހުގެ ނުރުހުން އަމާޒު ވެގެންނެވެ.

މިގޮތުންވެސް ފާހަގަ ކޮށްލަންޖެހޭ ނުކުތާއަކީ، ކެބިނެޓުގައި ތިއްބެވި، ޖުމުހޫރީ ޕާޓީއާއި، އަދާލަތު ޕާޓީ އަދި އެމްއާރުއެމްގެ، ވަޒީރުންގެ ތެރެއިން، އެމްއާރުއެމްގެ ފަރާތުން ހައުސިންގެ މިނިސްޓަރު ކަމުގައި ހުންނެވި އާތިފާއާއި އަދި ޖުމުހޫރީ ޕާޓީގެ ފަރާތުން ޓޫއަރިޒަމް މިނިސްޓަރުކަމުގައި ހުންނެވި އަލީ ވަހީދު ފިޔަވާ ދެން މަގާމުން ވަކިވެވަޑައިގެންނެވި ހުރިހާ ވަޒީރުންވެސް މަގާމުން ދުރަށް ޖެހިވަޑައިގަންނަވަން ޖެހިވަޑައިގަތީ އެބޭބޭފުޅުންނަށް ސީދާ ނަޝީދުގެ ނުރުހުން އަމާޒުވެގެން ކަމުގައެވެ.

މިގޮތުން ފާހަގަވާން އޮތް ކަމަކީ، ރައީސް އިބުރާހިމް މުހައްމަދު ސޯލިހުގެ ވެރިކަމުގެ ދައުރު ދެބައިވެގެންދިޔައިރު، އެމްޑީޕީ ފިޔަވާ ކޯލިޝަންގައި ހިމެނޭ ޕާޓީތަކުން ކެބިނެޓުގައި ތިއްބެވި ސިޔާސީގޮތުން އެންމެ ހަރަކާތްތެރި ވަޒީރުން އެކި ސަބަބުތަކާ ހެދިނަމަވެސް، މަގާމުން ދުރަށް ވަޑައިގެންފައިވާ ކަމެވެ.

އަދި އެއަށްފަހު، ވަކީން ޚާއްސަކޮށް، ކޯލިޝަން ތަމްސީލު ކުރުމަށްޓަކާ ޖުމުހޫރީ ޕާޓީއާއި އެމްއާރުއެމްއިން މިހާރު ކެބިނެޓުގައި ތިއްބެވި ވަޒީރުންނަކީ، ކޯލިޝަން ލީޑަރުންގެ އަބިންނާއި އަދި ދަރިންގެ އިތުރުން، ދެން ތިއްބެވި ގިނަ ބޭފުޅުން ފާހަގަ ވެގެން ދަނީ، ސިޔާސީގޮތުން އެހާ ހަރަކާތްތެރި ނޫން ބޭފުޅުންގެ ގޮތުގައެވެ.

އެހެންކަމުން، ރައީސް އިބުރާހިމް މުހައްމަދު ސޯލިހުގެ ކޯލިޝަން ވެރިކަމުގައި ސިޔާސީގޮތުން ހަރަކާތްތެރި، އަދި ރައީސް ސޯލިހުއާއި އެންމެ ގާތުގައި މަސައްކަތް ކުރައްވާ ބޭފުޅުންގެ ގޮތުގައި ތިއްބެވި ވަޒީރުންނާއި އަދި އެހެނިހެން އިސްބައެއް މަގާމްތަކުގައި ތިއްބެވި ބައެއް ބޭފުޅުން ފާހަގަވެގެން ދަނީ، އަދާލަތު ޕާޓީއަށް ނިސްބަތްވާ ބޭފުޅުންގެ ގޮތުގައެވެ.

މިގޮތުން ފާހަގަ ކޮށްލެވޭ އެންމެ އިސް ދެބޭފުޅުންނަކީ، ހޯމް މިނިސްޓަރު ކަމުގެ މަގާމުގައި ހުންނެވި ޝޭޚް އިމްރާންއާއި ރައީސުލްޖުމްހޫރިއްޔާގެ ޗީފް އޮފް ސްޓާފްގެ މަގާމުގައި ހުންނެވި އަލީ ޒާހިރެވެ.

އަދާލަތު ޕާޓީއިން ކެބިނެޓްގައި ތަމްސީލު ކުރައްވަމުން ވަޑައިގެންނެވި ޝީދާތާ ޝަރީފް ގަމާމުން ވަކިވެ ދިއުމަށްފަހު، މިހާރުގެ ހާލަތަށް ބަލާއިރު، ރައީސުލްޖުމްހޫރިއްޔާގެ ޗީފް އޮފް ސްޓާފުގެ މަގާމުގައި ހުންނެވި އަލީ ޒާހިރު ނުވަތަ ހޯމް މިނިސްޓަރު ކަމުގެ މަގާމުގައި ހުންނެވި ޝޭޚު އިމްރާން މަގާމުން ދުރަށް ޖެހިވަޑައިގަންނަވާ ހިސާބުން، އަދާލަތު ޕާޓީ ކޯލިޝަންގައި ދެމި އޮތުމުގެ ބޭނުން ވަރަށް ބޮޑުތަނުންވެސް ކުޑަވެގެން ދާނެކަމުގައި ގަބޫލުކުރަން ޖެހެއެވެ.

އެފަދަ ހާލަތެއްގައި، ނަމުގައި ކޯލިޝަން ސަރުކާރެއް އޮތްކަމުގައިވި ނަމަވެސް، އަދާލަތު ޕާޓީ ކޯލިޝަން ސަރުކާރުން ވަކިވެދާ ހިސާބުން އަދި އިތުރަށް ސަރުކާރާއި ކޯލިޝަން ބަލިކަށިވެގެން ދާނެކަމީ ޔަގީންވެ ކަށަވަރު ވާކަމެކެވެ.

އަމާޒަކީ ހަރުކަށި ފިކުރަށް ނިސްބަތް ކޮށް ކޯލިޝަން ރޫޅާލުންތައް؟

ވަކީން ޚާއްސަކޮށް 6 މޭގެ ޓެރަރިސްޓު ހަމަލާއަށްފަހު، ނަޝީދުގެ ހުރިހާވެސް ޝަކުވާއަކީ، ރާއްޖޭގައި ހަރުހަކަށި އިސްލާމީ ފިކުރުގެ ނުފޫޒު ގަދަވެގެން ދާދިއުމުގެ ޝަކުވާއެވެ.

ކަންހިގާފައިވާ ގޮތަށް ބަލާއިރު، ނަޝީދުގެ އުދާސްތަކުގައި ހުއްޖަތެއް އޮތުމުގެ ފުރުސަތު އޮތްކަމަށް ގަބޫލު ކުރަންވެސް ޖެހެއެވެ. ސަބަބަކީ، ނަޝީދުގެ ފުރާނައަށް އަމާޒުކޮށް ދެވުނު ޓެރަރިސްޓް ހަމަލާގެ ތަހުގީގުން، އެ ހަމަލާގެ ފަހަތުގައި ހަރުކަށި ފިކުރުގެ މީހުން ތިބިކަމަށް ދައްކާތީއެވެ.

އެހެންނަމަވެސް، މި ހަގީގަތް މިގޮތުގައި އޮތްނަމަވެސް، ފާއިތުވެދިޔަ ހަފްތާއަށްފަހު، ނަޝީދު ސަރުކާރަށް އަމާޒުކުރައްވަމުން ގެންދަވާ ހުރިހާ ފާޑު ކިޔުއްވުމެއްގައިވެސް، ރައީސް ސޯލިހު، ސަރުކާރުގެ ތެރޭގައި އޮތް އަދާލަތު ޕާޓީގެ ނުފޫޒުގެ ދަށުވެފައި އޮތްކަމަށް މޭރުން ކުރައްވަމުން ގެންދަވާކަން ފާހަގަ ކޮށްލެވެއެވެ.

އަދި އަމުދުން ސަރުކާރުގެ ތެރޭގައި ހަރުކަށި ފިކުރަށް ނިސްބަތްވާ މީހުން ތިބިކަމަށް ވިދާޅުވެ އެތެރެއާއި ބޭރުގައި ނަޝީދު ދައްކަވަމުން ގެންދަވާ ވާހަކަ ފުޅުތަކުގައި، ތުހުމަތުގެ އިގިލި އަދާލަތު ޕާޓީއަށް އަމާޒުކުރައްވާކަން، އެވާހަކަފުޅުތައް ތަރުޖަމާ ކޮށްލުމުން ވަރަށް ރަގަޅަށް މޭރުން ކުރެވިގެން ދެއެވެ.

އަދި ހަމައެއާއެކު، އަދާލަތު ޕާޓީގެ އިސް ބޭފުޅުންގެ ބޮލުގައި ނަޝީދު އަޅުއްވަމުން ގެންދަވާ އެހެން ތުހުމަތެއްވެސް ފާހަގަ ކޮށްލަން ޖެހެއެވެ. ރައްޔިތުންގެ މަޖިލިހުން ފާސްކުރުމަށް ނަޝީދު މަސައްކަތް ކުރައްވަމުން ގެންދަވާ ނަފްރަތުގެ ބިލެވެ.

ސަރުކާރުން މިބިލް މަޖިލީހަށް ހުށަހެއްޅުއްވުމަށްފަހު، ނަޝީދު ގަބޫލު ކުރައްވާގޮތުގައި، މިބިލަށް ރައީސް ސޯލިހު ކުރައްވަމުން ގެންދެވި ތާޢީދު އަބުރާ ގެންދެވީ އަދާލަތު ޕާޓީގެ ނުފޫޒުންނެވެ. މާނައަކީ، ނަޝީދު ގަބޫލުކުރައްވާ ހަރުކަށި ފިކުރު ނައްތާލުމަށް، މިސަރުކާރުގައި ތަންފީޒުކުރައްވަން ބޭނުންފުޅުވާ ސިޔާސަތު ތަންފީޒު ކުރެއްވުމަށް އޮތް ހުރަހެއްގެ ގޮތުގައި ނަޝީދަށް އަދާލަތު ޕާޓީ ސިފަކުރެވިފައިވާކަން މިއީ ސާފުކޮށް ފެންނާން އޮތް ހަގީގަތެކެވެ.

އަދާލަތު ޕާޓީ ކޯލިޝަން ވަކިވެއްޖެ ނަމަ ސިޔާސީ ގޮތުން ސަރުކާރު ބަލިކަށިވާނެތަ؟

ކޯލިޝަންގެ އެންމެ ބޮޑު ޕާޓީއެއްގެ ގޮތުގައި އަދިވެސް އޮތް އެމްޑީޕީގެ ލީޑަރޝިޕްގެ އިސް ބޭފުޅުންނާއި އަދި މަޖިލިސް ރައީސް ނަޝީދުގެ ފާޑުކިއުން މެދުކެޑުމެއްނެތި އަދާލަތު ޕާޓީއަށް އަމާޒުވަމުން ދާއިރު، އަދިވެސް އެޕާޓީ އޮތީ ކޯލިޝަންގެ މުހިންމު ޕާޓްނަރެއްގެ ގޮތުގައެވެ.

އެހެންނަމަވެސް، މަޖިލިސް ރައީސް ތުހުމަތު ކުރައްވަމުން ގެންދަވަނީ ރައީސް އިބުރާހިމް މުހައްމަދު ސޯލިހު ހުންނެވީ ހަރުކަށި ފިކުރުގެ މީހުންގެ މެދުގައި ތާށިވެފައިކަމުގައެވެ. އަދި އެއަށްފަހު ވިދާޅުވަމުން ގެންދަވަނީ، އަދާލަތުޕާޓީން ރައީސް އިބުރާހިމް މުހައްމަދު ސޯލިހުގެ ނިންމެވުންތަކަށް ނުފޫޒު ފޯރުވަމުން ގެންދަވާ ކަމަށެވެ.

އަދި އެއަށްފަހު، ނަޝީދު ވިދާޅުވެފައިވަނީ، ސަރުކާރުން ދެން ކޯލިޝަން ރުއްސަން އުޅެފިނަމަ، އެމްޑީޕީއަށް ވާނީ ގެއްލުން ކަމުގައެވެ. އެހެންކަމުން، ނަޝީދުގެ މިހުރިހާ ވާހަކަތަށް ޖުމްލަކޮށް ތަރުޖަމާ ކޮށްލާއިރު، ނަޝީދުގެ މިހާރުގެ ހުރިހާވެސް އެދުމަކީ އަދާލަތު ޕާޓީ ސަރުކާރު ކޯލިޝަނާ ދުރަށްދިއުން، ނުވަތަ ރައީސް ސޯލިހު ކޯލިޝަން ރޫޅާލާ، ވަކީން ޚާއްސަކޮށް އަދާލަތު ޕާޓީ ދުރަށްލުން ކަމުގައި ދަންނަވަން ޖެހެއެވެ.

ފާހަގަ ކޮށްލަންޖެހޭ ނުކުތާއަކީ، ރައީސް އިބުރާހިމް މުހައްމަދު ސާލިހުގެ ކެބިނެޓުގައި މިހާރުވެސް ސިޔާސީ ގޮތުން ހަރަކާތްތެރި ވަޒީރުން މަދުކަމެވެ. މީޑިއާއަށް އަރުއްވާ، ސަރުކާރުގެ ސިޔާސަތުތައް ދިފާއުކޮށްލަން ކެރޭވަރުގެ ވަޒީރުންވެސް މަދުކަމެވެ. ހަރަކާތްތެރި ގިނަ ވަޒީރުން ނަޝީދުގެ ނުރުހުމުގެ އަމާޒުފަތްގަޑަކަށްވެ ދުރަށް ވަޑައިގަންނަވަން ޖެހިވަޑައިގަތީއެވެ.

އެހެންނަމަވެސް، ގަބޫލުރަން ޖެހޭ ހަގީގަތަކީ، ރައީސުލްޖުމްހޫރިއްޔާގެ ކެބިނެޓްގައި ސިޔާސީ ހަކަތަ ހުންނަން ޖެހޭކަމެވެ. ކެބިނެޓަކީ ރައީސުލްޖުމްހޫރިއްޔާގެ ސިޔާސީ އައްޑަނަކަމެވެ.

އެއާއި ޚިލާފަށް، ކެބިނެޓުގައި މިހާރު ތިއްބެވި ވަޒީރުންގެ ތެެރެއިން، އަދާލތު ޕާޓީ ދުރަށް ލައި، ރައީސް އިބުރާހިމް މުހައްމަދު ސޯލިހު ކޯލިޝަން ރޫޅާލާ ހިސާބުން، އެމަނިކްފާނުގެ ކެބިނެޓްގައި، މިހާރުވެސް ސިޔާސީގޮތުން ހަރަކާތްތެރި ވަޒީރުން ނެތްތާގައި، ޝޭޚް އިމްރާން ދުރަށް ޖެހިވަޑައިގަންނަވައިފިނަމަ، އެކަން ވެގެންދާނީ ހުރިހާ ގޮތަކުން ރައީސް ސޯލިހުގެ ބަލިކަށި ކަމަކަށް ކަމުގައި ގަބޫލުކުރަން ޖެހެއެވެ.

މިއުސޫލުން ކޯލިޝަން ރޫޅާލެވިއްޖެނަމަ، ހަގީގަތުގައިވެސް، ވެރިކަން ދެމެހެއްޓުމުގައި ރައީސް ސޯލިހަށް، ބޮޑުތަނުން ރައީސް ނަޝީދަށް ބަރޯސާވާން މަޖުބޫރު ވާނެއެވެ. އަދި މި ފޯމިއުލާގެ ތެރެއިން، ނަޝީދު، ތަންފީޒު ކުރުމަށް ބޭނުންވާ ގިނަ ސިޔާސަތުތަކެއް، ނަޝީދުގެ އެދުމާއެއްގޮތަށް ތަންފީޒުކޮށް، އެއަށް އަމަލީސިފަ ގެނައުމުގައި ރައީސް ސޯލިހުގެ މައްޗަށް އޮންނާނެ މަޖުބޫރީ ހާލަތު ނުހަނު ބޮޑުތަނުން އިތުރުވެގެން ދާނެއެވެ.

ސާފުވާން ނެތްކަމަކީ، ނަޝީދު ޖައްސަވަމުން ގެންދަވާ މި ފޯމިއުލާއަށް ރައީސް ސޯލިހު ދެއްވާނެ ޖަވާބެވެ. މިއީ ގިނަ ބަޔަކު ޝައުގުވެރިކަމާއެކު ބަލަން ތިބި މަންޒަރެކެވެ.