މިއަދު ރާއްޖޭ ވެރިކަމުގައިވެސް އޮތީ އެމްޑީޕީ ކަމަށާއި، އިދިކޮޅުގައިވެސް އޮތީ އެމްޑީޕީ ކަމަށް ވިދާޅުވެ ރައްޔިތުންގެ މަޖިލީހުގެ ތިމަރަފުށީ ދާއިރާގެ ކުރީގެ މެމްބަރު މުޙައްމަދު މުސްތަފާ އެމްޑީޕީއަށް ފާޑުވިދާޅުވެއްޖެ އެވެ.
މުސްތަފާ މަޖިލީހުގައިވެސް މީގެކުރިން ތަމްސީލްކުރި ޕާޓީ އެމްޑީޕީއަށް ފާޑުވިދާޅުވެ ޓްވީޓްކުރައްވާފައި މިވަނީ އެމްޑީޕީގެ އެތެރޭގައި ބައިބައިވުން އުފެދި އަދުގެ ސަރުކާރުގައި ތިއްބެވި އެމްޑީޕީގެ ބޭފުޅުންނާއި އެ ޕާޓީގެ ރައީސް މުޙަައްމަދު ނަޝީދާ ދެމެދު ވަރަށްބޮޑަށް ޚިޔާލުތަފާތުވުން އުފެދި އެކަންކަން ހާމަކޮށްފައިވާ ދަނޑިވަޅެއްގައެވެ. އެގޮތުން އެމްޑީޕީގެ އެންމެ އިސް ލީޑަރު ރައީސް އިބްރާހީމް މުޙައްމަދު ޞާލިޙާއެކު ސިޔާސީ މަސައްކަތް ކުރައްވަން ޕާޓީގެ ރައީސް ނަޝީދަށް ދެން ހުރެވެން ނެތްކަމަށް ނަޝީދު ވަނީ އާންމުކޮށް އިއުުލާންކޮށްފައެވެ.
މިކަންކަމާއި 2019 ވަނަ އަހަރު އެމްޑީޕީއަށް ރައްޔިތުންގެ މަޖިލީހުން ލިބުނު ސުޕަރ މެޖޯރިޓީއާ ގުޅުވައިގެން މުސްތަފާ ވިދާޅުވީ ރާއްޖޭގައި މިވަގުތު މައިނޯރިޓީ އަކީވެސް މެޖޯރިޓީއަކީވެސް އެމްޑީޕީ ކަމަށެވެ. އަދި ވެރިކަމުގައި އޮތީވެސް އިދިކޮޅު ޕާޓީ އަކީވެސް އެމްޑީޕީ ކަމަށާއި މިއީ ފަހުޒަމާނުގެ އަލާމާތެއް ކަމަށް މުސްތަފާ ވަނީ ވިދާޅުވެފަ އެވެ.
Raajjeyge minorty akee MDP. Majority ves MDP, vei kamuga othee ves MDP, indhikolhu party akee hama MDP.
Fahu zamaanuge alaamaatheh.!!— Mohamed Musthafa (@Thimarafushi) July 19, 2021
މުސްތަފާ އެބޭފުޅާގެ ކުރީގެ ޕާޓީއަށް ފާޑުވިދާޅުވެފައި މިވަނީ އެޕާޓިން އިސްވެއޮވެ، އެކުލަވާލާފައިވާ ސަރުކާރަށް ފާޑުވިދާޅުވެ ޕާޓިގެ ރައީސް މުޙައްމަދު ނަޝީދު ބައިނަލްއަގްވާމީ ސަމާލުކަމަށް އެކަންގެނައުމަށް ނެރެފައިވާ ބަޔާނަށް ޕާޓީގެ ކޮމިޓީ ތަކުންނާއި ދާއިރާތަކުން ތާޢީދުކުރަމުން ގެންދާ ދަނޑިވަޅެއްގަ އެވެ.
ރައީސް ނަޝީދު ސަރުކާރާމެދު ނުތަނަވަސްކަން އުފެދިފައިވާ މައިގަނޑު ސަބަބަކީ ނަފުރަތުގެ އަމަލު ބަޔާންކޮށް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅި ޤާނޫނުލްއުޤޫބާތަށް އިސްލާޙު ގެނައުމުގެ ބިލަށް ސަރުކާރު ކޯލިޝަންގެ އެމްޑީޕީ ނޫން އެހެން ހުރިހާ ޕާޓީއަކުން ދެކޮޅުހެދުމުންނެވެ. އަދި ސަރުކާރުގެ އިއްތިހާތުގައި ހިމެނޭ މައިނޯރިޓީ ޕާޓީތަކުން ނުރުހުން ފާޅުކުރި ހިސާބުން، ސަރުކާރުން ފޮނުވި ބިލު ސަރުކާރުން ދިފާއު ނުކޮށް، ޕާޓީގެ އަސާސްތަކާއި ސަރުކާރުން ހިލާފުވެފައި ވާކަމަށް ރައީސް ނަޝީދާއި، ނަޝީދުގެ ސަޕޯޓަރުން ގެންދަނީ ބުނަމުންނެވެ.
