މާލެ ސަރަޙައްދުގައި ކަރަންޓުގެ ޚިދުމަތުގެ ފެންވަރު ރަނގަޅުކުރުމަށް ކުރިއަށްގެންދާ ގްރޭޓަރ މާލޭ އިންޓަރކަނެކްޝަން މަޝްރޫޢުގެ ދަށުން މިއަދު ފުރަތަމަ ފަހަރަށް ސްޓެލްކޯގެ މާލޭ އިންޖީނުގެއާއި ހުޅުމާލޭ އިންޖީނުގެ ގުޅާލައިފި އެވެ.
ސްޓެލްކޯއިން ބުނީ މާލެއާއި، ހުޅުމާލޭގެ އިންޖީނުގެ މިހާރު ގްރޭޓާ މާލެ ގްރިޑް މެދުވެރިކޮށް ކާމިޔާބު ކަމާއެކު ސިންކްރޮނައިޒް ކުރެވިފައި ވާކަމަށެވެ. މި ތާރީހީ ވަގުތުކޮޅު ސްޓެކްލޯގެ ކޮންޓްރޯލް ރޫމުން ވަނީ އުފާވެރިކަމާއެކު ފާހަގަކޮށްފަ އެވެ. ސްޓެލްކޯ އިން ބުނީ މިހާރު މާލެއިން ހުޅުމާލެއަށް އަދި ހުޅުމާލެއިން މާލެއަށް ކަރަންޓު ފޯރުކޮށްދެވޭނެ ކަމަށެވެ. ނަމަވެސް ގްރޭޓާ މާލެ ގްރިޑް ގުޅާލުމުގެ މަސައްކަތް އަދި އެއްކޮށް ނިންމައެއް ނުލައެވެ. ކުރިއަށް އޮތް 3 ދުވަހުވެސް ސްޓެލްކޯއިން އަދި މި މަސައްކަތް ކުރިއަށް ގެންދާނެ އެވެ.
الحمد لله. ވަރަށްވެސް ތާރީހީ ވަގުތުކޮޅެއް. މާލެއާއި، ހުޅުމާލޭގެ އިންޖީނުގެ މިހާރު ވަނީ ގްރޭޓާ މާލެ ގްރިޑް މެދުވެރިކޮށް ކާމިޔާބު ކަމާއެކު ސިންކްރޮނައިޒް ކުރެވިފައި. މިހާރު މާލެއިން ހުޅުމާލެއަށް އަދި ހުޅުމާލެއިން މާލެއަށް ކަރަންޓު ފޯރުކޮށްދެވޭނެ. pic.twitter.com/R0wvfMOqLm
— STELCO (@STELCOMALDIVES) July 18, 2021
ސްޓެލްކޯއިން ބުނީ ގްރޭޓާމާލެ ގްރިޑާއިއެކު އެކުންފުނިން ހަކަތައިގެ ސިނާއަތުގެ މުޅިން އައު ހަރުފަތެއް ގިރާކޮށްފައި ވާކަމަށެވެ. އަދި މި ގްރިޑާއެކު އެކުންފުނިން ދެމުންގެންދާ ހިދުމަތުގެ ފެންވަރު އިތުރަށް ރަނގަޅުވެ، އެކަމުގެ ފައިދާތައް ރައްޔިތުންނަށް ލިބެމުންދާނެ ކަމަށްވެސް ސްޓެލްކޯއިން ބުނެއެވެ.
ކޯވިޑްގެ ދަތި ހާލަތުގައިވެސް މަސައްކަތައް ހުއްޓުމެއް ނައިސް މި މަސައްކަތް ކާމިޔާބުކަމާއެކު، ނިންމާލުމަށްޓަކައި ރެއާއި ދުވާލު މަސައްކަތް ކުރަމުންގެންދާ ކުންފުނީގެ އެންމެހާ މުވައްޒަފުންގެ މިންނެތް މަސައްކަތް ސްޓެލްކޯއިން ވަނީ ފާހަގަކޮށްފަ އެވެ.
އަދި މި މަޝްރޫޢުގައި އެންމެ އިސްކޮށް ހަރަކާތްތެރި ވަމުންދަނީ ސްޓެލްކޯގެ ޒުވާން ޓީމުކަމަށާއި މިފަދަ ބޮޑު މަސައްކަތެއްގައި އެކުފުންނީގެ ޒުވާން ޓީމުން ދެއްވާ އެއްބާރުލުމާއި، ބަހައްޓަވާ ޝައުގުވެރިކަމަކީ ކުންފުންޏަށް ލިބޭ ވަރަށްބޮޑު ހިތްހަމަޖެހުމެއްކަމަށް އެކުންފުނިން ވަނީ ބުނެފަ އެވެ. މިފަދަ މަލްޓިމިލިއަން ޑޮލަރުގެ މަޝްރޫއުތަކުގައި ކުންފުނީގެ ޒުވާނުން އިސްކޮށް ތިބޭކަމީ ކުންފުނިން ނުހަނު ފަޚުރުވެރިވާ ކަމެއްކަމަށް ސްޓެލްކޯއިން ބުނެއެވެ.
