ބައެއް ބާވަތުގެ ކެތްތެރިކަމަކީ އިހުމާލެއް ކަމުގައި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވެއްޖެއެވެ.
ވަހީދު މިހެން ވިދާޅުވެފައިވަނީ، ސިޔާސީ މަސައްކަތް ކުރެއްވުމުގައި ރައީސް ޞާލިހުއާއިއެކު ދެން ކުރިއަށް ނުދެވޭނެކަމަށް ރައީސް ނަޝީދު ވާހަކަ ދެއްކެވި ނަމަވެސް ސަރުކާރުގެ ތަރުޖަމާނު މުހައްމަދު މަބްރޫކް އަޒީޒު ކަމާއި ގުޅިގެން ދައްކަވަމުންދާ ވާހަތަކަށް އިޝާރާތް ކުރައްވައެވެ. މަބްރޫކް ވިދާޅުވެފައިވަނީ ރައީސް ސޯލިހް ވެރިކަމަށް ވަޑައިގަތީ ރައްޔިތުންނަށް ވައުދުތަކެއް ވެވަޑައިގެނެވެ. ރައީސް އެކަމުގައި ބުރަކޮށް އެބަ އުޅުއްވައެވެ. މިހާލަތުގައިވެސް ރައީސް ޞާލިހު މަސައްކަތް ކުރައްވަނީ ވަރަށް ކެތްތެރި ކަމާއި އެކުގައިކަމަށް މަބްރޫކް ވަނީ ވިދާޅުވެފައެެވެ.
ނަމަވެސް އެމްޑީޕީގެ ރައީސް ނަޝީދަށް ތާއީދު ކުރައްވާ ބޭފުޅުން ވިދާޅުވަމުންދަނީ ކެތްތެރިކަން މިހާރު ކޮޅުން ލާފައިވާކަމަށެވެ. އެގޮތުން ރައީސް ނަޝީދަށް ދިން ނުރައްކާތެރި ޓެރަރިސްޓް ހަމަލާގެ ތަހުގީގް އެކަށީގެންވާ މިންވަރަކަށް ނުކުރެވި، ފަންޑު ކުރި މީހުން ނުހޯދޭ މައްސަލާގައި ދަނީ ބޮޑެތި ފާޑުކިޔުންތަކެއް ސަރުކާރަށް އަމާޒު ކުރަމުންނެވެ.
ވައްޑެވެސް ވިދާޅުވެފައިވަނީ ބައެއް ބާވަތުގެ ކެތްތެރިކަމަކީ އެއީ އިހުމާލެއް ކަމުގައެވެ. ރައީސް ނަޝީދަށް ދިން ނުރައްކާތެރި ހަމަލާގެ ތަހުގީގު ކުރިއަށްދާއިރު، މަޖިލީހުންވެސް ވަނީ ޕާލިމަންޓްރީ އިންކުއަރީއެއް ހަދައި، ގިނަ ކަންތައްތަކެއް އިސްލާހު ކުރުމަށް ސަރުކާރަށް ހުށަހަޅާފައެވެ. ސަރުކާރުން ބުނެފައިވަނީ އެކަންކަން އެންމެ ރަނގަޅަށް ކުުރުމަށް މަސައްކަތް ކުރަމުންދާކަމަށެވެ.
ބައެއް ބާވަތުގެ ކެތްތެރިކަމަކީ އިހުމާލެވެ.
— Waddey (@waddey_) July 14, 2021
ރައީސް ނަޝީދާއި ރައީސް ޞާލިހުގެ ސިޔާސީ ވާދަވެރިކަން އިންތިހާއަށް ބޮޑުވެ، ދެބޭފުޅުން އެކީގައި ސިޔާސީ މަސައްކަތް ނުކުރެވޭ ހިސާބަށް ގޮސްފައިވާއިރު، ރައީސް ނަޝީދު ދަނީ އިދިކޮޅު ޕްރޮގްރެސިވް ކޯލިޝަނާއިވެސް ބައިއަތު ހިފުމަށް މަސައްކަތް ކުރަމުންނެވެ.
