ބޮލީވުޑްގެ ޕާފެކްޝަނިސްޓްގެ ގޮތުގައި މަޝްހޫރު ވެފައިވާ ސުޕަސްޓަރ އާމިރު ޚާން އޭނާގެ ދެވަނަ ކައިވެނި ވެސް ނިމުމަކަށް ގެނެސްފި އެވެ.
އާމިރާއި ކިރަން ކައިވެނި ކޮށްފައިވަނީ 2005 ވަނަ އަހަރުއެވެ. މި ކައިވެނިން ސަރޮގޭޓް މެދުވެރިކޮށް 2011 ވަނަ އަހަރު މި ދެމަފިރިން ވަނީ ދަރިއަކު ހޯދާފަ އެވެ. އެއީ މިހާރު އުމުރުން 9 އަހަރު ގެ އަޒާން އެވެ.
މި ދެމީހުންގެ ފަރާތުން ގުޅިގެން ނެރެފައިވާ ބަޔާނެއްގައި ބުނެފައިވަނީ މިއީ އާ ދަތުރެއްގެ ފެށުމެއް ކަމަށެވެ. އަދި ކައިވެނި ރޫޅާލިނަމަވެސް އެމީހުންގެ ދަރިފުޅާއި އަދި ޕްރޮފެޝަނަލް ގޮތުން އޮންނަ ހުރިހާ ގުޅުމެއްވެސް އޮނާނަނެ ކަމަށް މި ބަޔާނުގައި ވަނީ ބުނެފަ އެވެ. އަދި މިދެމީހުން ހިއްސާވެގެން އުފައްދާފައިވާ ޕާނީ ފައުންޑޭޝަންގެ މަސައްކަތްތަށް ވެސް ދެމީހުން އެކުގައި ގުޅިގެން ކުރިއަށް ގެންދާނެ ކަމަށް ވަނީ ބުނެފަ އެވެ.
ރިޕޯޓްތަށް ބުނާގޮތުގައި މި ދެމަފިރިން ވަނީ ކައިވެންޏަށް 15 އަހަރު ފުރުމުން އެކުގައި އެކަން ފާހަގަވެސް ކޮށްފަ އެވެ. މި ދެމީހުން ވަކިވާން ނިންމި ސަބަބެއް މި ބަޔާނުގައި ހާމަކޮށްފައެއް ނުވެއެވެ.
މިއީ އާމިރު ޚާންގެ ދެވަނަ ކައިވެންޏެވެ. ފުރަތަމަ ކައިވެނި ކޮށްފައި ވަނީ 1986 ގައި ރީނާ ދައްތާއާ އެވެ. މިކައިވެނި 2002 ގައި ރޫޅުނުއިރު މި ކައިވެނިން އާމިރަށް ވަނީ ފިރިހެން ކުއްޖަކާއި އަންހެން ކުއްޖަކު ލިބިފަ އެވެ.
އާމިރާއި ކިރަން ގުޅުން ފެށިގެން ގޮސްފައިވަނީ އާމިރުގެ 2001 ގެ ފިލްމް "ލާގަން" ކުޅުނު ދުވަސްވަރުއެވެ. މި ފިލްމުގެ ލީޑް އެކްޓަރަކަށް އާމިރު އުޅުނު އިރު ފިލްމުގެ އެސިސްޓެންޓް ޑައިރެކްޓަރެއްގެ ގޮތުގައި ކިރަން ވަނީ މަސައްކަތް ކޮށްފަ އެވެ. ހަމަ އެހެންމެ ކިރަން ވަނީ 2011 ގައި ފިލްމް "ދޯބީ ގާތު" ޑައިރެކްޓް ކޮށްފަ އެވެ. އަދި މީގެ އިތުރުން ކިރަން ވަނީ ބައެއް ފިލްމުތަށް ޕްރޮޑިއުސްވެސް ކޮށްފަ އެވެ.
އާމިރު މިހާރު ކުރަމުން ގެންދާ މަސައްކަތަކީ އޭނާގެ ކުރިއަށް އޮތް ފިލްމް "ލާލް ސިންގް ޗައްޑާ"ގެ މަސައްކަތެވެ. މި ފިލްމުގައި އާމިރު ފެނިގެން ދާނީ ކަރީނާ ކަޕޫރާއި އެކުގައެވެ.
ކޮމެންޓު ފޮނުވާ