ޔޫރޯ ފުޓްބޯޅަ މުބާރާތުގައި މިރޭ ސްލޮވާކިއާ ކޮޅަށް 5 ލަނޑު ޖަހައި، ސްޕެއިން މުބާރާތުގެ ދެވަނަ ބުރަށް ދަތުރުކޮށްފިއެވެ.
ސްޕެއިންގައި ކުޅުނު މި މެޗު ނިމުނީ 0-5 ގެ ނަތީޖާ އަކުންނެވެ.
މިރޭ ސްޕެއިން މި ހޯދި މޮޅަކީ ރެކޯޑް މޮޅެކެއެވެ. އެއީ އެންމެ ފަހުން އެޓީމު ކުޅުނު 42 މެޗުގައިވެސް 5 ލަނޑު ޖެހިފައި ނުވާތީއެވެ.
ސްލޮވާކިއާ އަތުން ހޯދި ބޮޑު މޮޅާއެކު ސްޕެއިން މުބާރާތުގެ ދެވަނަ ބުރުން ޖާގައެއް ކަށަވަރުކުރީ، ގްރޫޕް އީ ގެ 2 ވަނަ ޓީމުގެ ގޮތުގައެވެ. އެއީ 3 މެޗުން ލިބުނު 5 ޕޮއިންޓާްއެކުއެވެ. ގްރޫޕް ސްޓޭޖުގައި ސްޕެއިން ކުޅުނު ފުރަތަމަ 2 މެޗު ނިމުނީ އެއްވަރު ވެގެންނެވެ. މި ގްރޫޕުން 1 ވަނަ ޓީމުގެ ގޮތުގައި 2 ވަނަ ބުރަށް ދަތުރުކުރީ މިރޭ ޕޮލެންޑް ބަލިކުރި ސްވިޑެންއެވެ. ސްވިޑެން ވަނީ 7 ޕޮއިންޓް ހޯދާފައެވެ. ގްރޫޕްގެ 3 ވަނަ ލިބުނީ 3 ޕޮއިންޓާއެކު ސްލޮވާކިއާއަށެވެ. ފުލުގައި 1 ޕޮއިންޓާއެކު އޮތީ ޕޮލެންޑެއެވެ.
މިރޭގެ މެޗު ފަށައިގެން، ރަނގަޅަށް ކުޅެ ލަނޑު ޖަހާނެ ފުރުޞަތުތައް ތަނަވަސްކުރީވެސް ސްޕެއިން ޓީމުންނެވެ. އެގޮތުން މެޗުގެ 10 ވަނަ މިނެޓުގައި ސްޕެއިންނަށް ވަނީ ޕެނަލްޓީއެއް ލިބިފައެވެ. ރެފްރީ މި ޕެނަލްޓީ ދިނީ ސްޕެއިންގެ ކޯކޭއަށް ކުރި ފައުލަކާއި ގުޅިގެން ވީއޭއާރު ބެލުމަށްފަހުއެވެ. ނަމަވެސް މޮރާޓާ ފޮނުވާލި ޕެނަލްޓީ ސްލޮވާކިއާގެ ކީޕަރ ވަނީ ހުށިޔާރުކަމާއެކު ދިފާޢުކޮށްފައެވެ.
ޕެނަލްޓީއަށް ފަހުވެސް ސްޕެއިން އަށް ވަނީ ލަނޑު ޖަހާނެ 2 ފުރުޞަތެއް ލިބިފައެވެ. އޭގެ ތެރެއިން ގޯލާއި އަމާޒުކޮށް އަލްވާރޯ މޮރާޓާ ފޮނުވާލި ބާރު ހަމަލާއެއް ކީޕަރ ވަނީ އަތުން ޖައްސާ ކޯނަރަކަށް ބޯޅަ ބޭރުކޮށްލާފައެވެ. މެޗުގައި ސްޕެއިންއަށް ލީޑު ނެގޭވަރުވީ 30 ވަނަ މިނެޓުގައެވެ. މި ލަނޑަކީ ސްޕެއިންގެ ސަރާބިއާ ފޮނުވާލި ބާރު ބޯޅަ ގޯލުގެ ހުރަސް ދަނޑީގައި ޖެހިފައި މަތިން ވެއްޓުނު ވަގުތު ކީޕަރ ބޯޅަ ބޭރުކޮށްލަން އުޅުމުގެ ތެރޭގައި ބައިކޮޅަށް ވަން ލަނޑެކެއެވެ. ސްޕެއިނުން ވަނީ ފުރަތަމަ ހާފް ނިމުމުގެ ކުރިން އަދި އިތުރު 1 ލަނޑު ޖަހާ ލީޑު ފުޅާކޮށްފައެވެ. ފުރަތަމަ ހާފުގެ އިތުރު ވަގުތުގެ ތެރޭގައި މި ލަނޑު ސްޕެއިނަށް ކާމިޔާުބުކޮށްދިނީ، އައިމެރިކް ލަޕޯޓްއެވެ.
ދެވަނަ ހާފް ފަށައިގެން މާގިނައިރުތަކެއް ނުވަނީސް ސްޕެއިނުން ވަނީ އެޓީމުގެ 3 ވަނަ ލަނޑު ޖަހާފައެވެ. މި ލަނޑު މެޗުގެ 56 ވަނަ މިނެޓުގައި އެޓީމަށް ކާމިޔާބުކޮށްދިނީ ސަރާބިއާއެވެ. އޭނާ މި ލަނޑު ކާމިޔާބުކޮށްދިނީ، ޖޯޑީ އަލްބާ ގޯލު ކުރިމައްޗަށް ހުރަސްކޮށްދިން ބޯޅަ ގޯލުގެ އަރިމަތި ދަނޑީގައި ޖައްސާފައި ގޯލުގެ ތެރެއަށް ވައްދާލައިގެންނެވެ. ސްޕެއިންގެ 4 ވަނަ ލަނޑު 67 ވަނަ މިނެޓުގައި ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް ފެރަން ޓޮރޭޒްއެވެ. 4 ވަނަ ލަނޑު ޖެހިތާ 4 މިނެޓު ފަހުން ސްލޮވާކިއާގެ ޖޫރަޖް ކުޗްކާ ފައިގައި ޖެހިފައި ބައިކޮޅަށް ލަނޑެއް ވަދެ މެޗުގެ ނަތީޖާ 0-5 އަކަށް ބަދަލުވެގެން ދިޔައެވެ.
މުބާރާތުގެ ދެވަނަ ބުރުުގައި ސްޕެއިން ވާދަކުރަން ޖެހޭނީ ގްރޫޕް ޑީ ގެ ދެވަނައަށް ދިޔަ ކްރޮއޭޝިއާ އާއި ދެކޮޅަށެވެ.
