ޑާކް ރެއިން އެންޓަޓެއިންމެންޓުގެ ކާމިޔާބު ފިލްމު "ގޮށްރާޅު"، އަދި "މާމުއި" ބަލާލަން ބޭނުންވާ މީހުންނަށް ރަނުގެ ފުރުސަތެއް ފަހިކޮށްދިނުމަށް ނިންމާފައިވާކަމަށް ޑާކްރެއިނުން ހާމަކޮށްފި އެވެ.

ޑާކްރެއިނުން ބުނީ އެ ދެފިލްމާއެކު މުޅިން އައު ކުރުފިލްމެއްވެސް ވަރަށް އަވަހަށް މީޑިއާނެޓްގެ އޮންލައިން ޕްލެޓްފޯމް "މަލްޓި ސްކްރީން" އަށް ގެންނާނެ ކަމަށެވެ. މިހާތަނަށް ސިނަމާގައި އަޅުވާފައިވާ ގޮށްރާޅާއި، މާމުއިގެ އިތުރުން ދެން މީޑިއާނެޓް މަލްޓި ސްކްރީނަށް ގެންނިންމާފައި ވަނީ ކުރު ފިލްމު "ގުޅުން" ކަމަށް ޑާކްރެއިނުން ބުނެއެވެ.

ފިލްމު ގޮށްރާޅަކީ ޑާކްރެއިންގެ ބްލޮކްބަސްޓާއެކެވެ.

ކްރައިމް ތުރިލާ މި ފިލްމުގެ 30 ޝޯ އޮލިމްޕަހުގައި ދައްކާފައިވާއިރު އޭގެ ތެރެއިން 21 ޝޯ އަކީ ހައުސްފުލް ޝޯ ތަކެއް ކަމަށް ޑާކް ރެއިން އިން ބުނެއެވެ.

މޫމިން ފުއާދުގެ ސްކްރީންޕްލޭ އަކަށް އަޙްމަދު ޝިނާން ޑައިރެކްޓްކޮށް، ވިޝުއަލް އިފެކްޓް ހަދާފައިވާ މި ފިލްމުގެ ކާސްޓަކީ ޖުމައްޔިލް ނިމާލް (ޖުމަލް)، ހަސަން އިރުފާން (ޒަކިއްޓެ)، ތަސްނީމާ، ރަޝްފާ، އަޒާން، ނާސިތް، ހަމްދާން، އަދި ނުޒުހަތު ޝުއައިބް (ނުޒޫ) މަރިޔަމް ޝަކީލާ، ކޮޕީ އިއްސެ، އަޙްމަދު ސަޢީދެވެ. ފިލްމު ރިލީޒްކުރީ 07 ފެބްރުއަރީ 2019 ގައެވެ.

މީގެ އިތުރުން ކޮމެޑީ ފިލްމު މާމުއި އަކީ ވެސް ހައުސްފުލް ގިނަ ޝޯވ ތަކެއް މާލެއާއި އަތޮޅުތެރޭގައި ދައްކާފައިވާ ފިލްމެކެވެ. މިއީ އައިޝަތު ފުއާދު އަދި އަޙްމަދު ތޮލާލުގެ ވާހަކައަކަށް އަލީ ޝިފާއު (ޗިއްޕެ) ޑައިރެކްޓްކޮށްފައިވާ ފިލްމެކެވެ.

"މާމުއި" ގައި ފެނިގެންދިޔަ ތަރިންގެ ތެރޭގައި ޖުމައްޔިލް ނިމާލް (ޖުމަލް)، މަރިޔަމް އައްޒަ، އަޙްމަދު ސަޢީދު، މުހައްމަދު ފައިސަލް، މަރިޔަމް މަޖުދާ (މަޖޫ)، ޝީލާ ނަޖީބް، ނުޒުހަތު ޝުއައިބް (ނުޒޫ)، އިބްރާހީމް ޝާފިއު (ފުބޫ)، އިސްމާއިލް ޖުމައިހް (ޖުމާ)، އަހުމަދު ސުނީ، ހަމްދާން ފާރޫގް، މަރިޔަމް ނޫރާ، އަލީ ޝަޒްލީމް، އާދަމް ރިޒްވީ (ރެކްސް)، އަހުމަދު ޝާކިރު (ޝާއްކޮ އައްމަޑޭ) އަދި އިބްރާހީމް އަމާން ފާހަގަކޮށްލެވެ އެވެ. މީގެ އިތުރުން "މާމުއިި" ގައި މަޝްހޫރު ފިލްމީ ތަރި އިސްމާޢީލް ވަޖީހްގެ ހާއްސަ ފެނިލުމެއްވެސް ހިމެނެއެވެ. މި ފިލްމު ރިލީޒްކުރީ 1 ޖުލައި 2019 ގައެވެ.

މީގެ އިތުރުން "ގުޅުން" މިއީ ގާތްގަނޑަކަށް 20 ވަރަކަށް މިނިޓްގެ ކުރު ފިލްމެކެވެ. ޢާއިޝަތު ފުއާދު ތަޢުފީޤް ލިޔެ ޑައިރެކްޓްކޮށް ގެނެސްދޭ މި ފިލްމުގެ ވިޒުއަލް އިފެކްޓްސް ހަދާފައި ވަނީ ޒުވާން ފަންނާނު ވިޝާލް ޒަކީ އެވެ.

މި ކުރު ފިލްމުގެ ތަރީންގެ ތެރޭގައި ހިމެނެނީ ރިޝްމީ ރަމީޒް، ރަވީ ފާރޫޤް، ޢަބްދުﷲ ޝާފިޢު އިބްރާހިމް (ފުބޫ)، އާމިނަތު ޝަމާނާގެ އިތުރުން އާމިނަތު ރަޝްފާ އެވެ. "ގުޅުން" މިއީ އަދި މިހާތަނަށް އެއްވެސް ޕްލެޓްފޯމެއްގައި ޕްރިމިއާނުކުރާ މުޅިން އާ ފިލްމެކެވެ.

ޑާކްރެއިނުން ގެންދަނީ މަލްޓި ސްކްރީން މެދުވެރިކޮށް އެމީހުންގެ ގިނަ އުފެއްދުންތަކެއް ގެނެސްދެމުންނެވެ. އެގޮތުން ވެބް ސީރީޒް "ރޫމީ އާ ޖަންނަތު" ވެސް ފާހަގަކޮށްލެވެއެވެ.