ގިނަ ހިންދީ ފިލްމުތަކާއި ދެކޮޅަށް އިންޒާރު ދިނުމަށް ފަހު އިންޑިއާގެ ދީނީ ޖަމާއަތް "ކަރްނީ ސޭނާ" އިން މިހާރު ޓާގެޓު ކޮށްފައިވަނީ އަކްޝޭ ކުމާރްގެ ކުރިއަށް އޮތް ފިލްމު "ޕްރިތުވިރާޖް"އަށެވެ. އެގޮތުން ކަރްނީ ސެނާއިން ގޮވަނީ މި ފިލްމުގެ ނަން ބަދަލު ކުރުމަށެވެ.
ލީޑިން ޑެއިލީއާއި ވާހަކަ ދައްކަމުން ކަރްނީ ސެއިނާގެ ޔޫތު ވިންގްގެ ރައީސް ސުޖްރީތު ސިންގ ރާތޯރް ބުނެފައިވަނީ މި ފިލްމަކީ ޕްރިތުވިރާޖް ޗޯހާންގެ ދިރިއުޅުމުގެ މައްޗަށް ކުޅޭ ފިލްމަކަށް ވުމާއިއެކުގައި މި ފިލްމަށް ދޭން ޖެހޭނީ އޭނާގެ ފުރިހަމަ ނަން ކަމަށެވެ. އެއީ ޕްރިތްވިރާޖް ޗޯހާން އަށް ކުރާ ގަދަރާއި އިއްޒަތް ދެމެހެއްޓުމަށެވެ.
މި މީހުން ބޭނުން ވާ ގޮތަށް ކަންތައްތައް ނުކޮށްފިނަމަ "ޕަދްމަވަތު"ގެ ޑައިރެކްޓަރ ސަންޖޭ ލީލާ ބަންސާލީއަށް ވީގޮތް ކުރިމަތިވާނެ ކަމަށް ވެސް ސިންގ ވަނީބުނެފައެވެ. އަދި އެކަމަށް ތައްޔާވެގެން ތިބުމަށް ވެސް ވަނީ ގޮވާލާފައެވެ.
2016 ވަނަ އަހަރު ޕަދްމާވަތުގެ ޝޫޓިން ކުރިޔަށް ދިޔައިރު ކަރްނޭ ސެއިނާއިން ވަނީ މި ފިލްމުގެ ސެޓާއި ބައެއް ކޮސްޓިއުމްތައް ވެސް ހަލާކުކޮށްފަ އެވެ. އަދި ހަމަ އެހެންމެ ސަންޖޭއަށް އަނިޔާކުރުމުގެ އިތުރުން މަރުގެ އިންޒާރުވެސް ވަނީ ދީފައެވެ. އެދުވަސްވަރު ޕަދްމާވަތުގެ ލީޑް ތަރި ދީޕިކާ ޕަޑްކޯނަށްވެސް ވަނީ މަރުގެ އިންޒާރުތައް ލިބިފައެވެ.
އިންޑިއާގައި އާންމުކޮށް އެގައުމުގެ ސަގާފަތާއި ބޯދާ ހިޔާލުތަކާއި ދީންތަކުގެ މައްޗަށް ހެދޭ ފިލްމުތަކަށް މިފަދަ ގިނަ އިންޒާރުތަކާއި، ދެކޮޅުހެދުމުގެ ހަރަކާތްތަކާއި ކުރިމަތިލާންޖެހެއެވެ.
