ފުލުހުންގެ ޒިންމާތަކާއި މަސްއޫލިއްޔަތާއި ހަވާލުވެ ހުންނެވި ހޯމް މިނިސްޓަރ އިމްރާން އަބްދުﷲ ފުލުހުންގެ މުއައްސަސާ ބަދުނާމުމުކޮށް އަގުވެއްޓޭގޮތަށް ދެއްކެވި ވާހަކަތައް ތަޚުގީގު ކުރުމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ގޮވާލައްވައިފިއެވެ.
އިއްޔެ އޮތް ރައްޔިތުންގެ މަޖިލީހުގެ ޖަލްސާގައި ނައިފަރު ދާއިރާގެ މެންބަރު އަޙްމަދު ޝިޔާމް ވަނީ 2015 ވަނަ އަހަރުގެ މޭޑޭ މުޒާހަރާގައި ގެއްލުވާލާފައިވާ ނޫސްވެރިޔާ އަޙްމަދު ރިޞްވާންގެ މައްސަލަ ރައީސް ޔާމިންގެ އިސްތަށިފުޅުގައި އަޅުއްވާ މިހާރުގެ ހޯމް މިނިސްޓަރ ދެއްކެވި ކަރުދާސްތައް ކޮބައިތޯ ސުވާލު ކުރައްވާފައެވެ. މިސުވާލުގެ ޖަވާބުގައި އިމްރާން ވިދާޅުވި އެލިޔުންތައް ނުވަތަ ކަރުދާސްތައް ގެންދެވީ މުޒާހަރާއާއި ގުޅިގެން އެމަނިކުފާނު ހައްޔަރުކުރައްވަން އައި ފުލުހުންކަމަށާއި، މިހާރު އެކަރުދާސްތަކަށް ވީގޮތެއް ހޯދަން ޖެހޭނީ ތަހުގީގެއް ހިންގަންކަމަށެވެ. ނަމަވެސް ވަރަށް ގިނަތަހުގީގުތައް ހިންގަން އެބަހުރިކަމަށާއި، ނަމަވެސް އެތަހުގީގައި ހަމައަށްވެސް އަދި ދެވޭނެކަމަށް މިނިސްޓަރ އިމްރާން ވިދާޅުވިއެވެ.
މިނިސްޓަރ އިމްރާން މިވާހަތަކާއި ގުޅިގެން ޝިޔާމް ކުރެއްވި ޓްވީޓްގައި ވިދާޅުވީ މިއީ ފުލުހުންގެ ޒިންމާތަކާއި ހަވާލުވެ ހުންނެވި ފަރާތުން ފުލުހުން ބަދުނާމުކޮށް ފުލުހުންގެ އިދާރާގެ އަގުވައްޓާލުމަށް ދެއްކެވި ވަރަށް ދަށު ދަރަޖަގައިގެ ވާހަތަކެއްކަމަށެވެ. އަދި މިމައްސަލަޔަކީ ފުލުހުން މިހާރުން މިހާރަށްވެސް ތަޚްގީގު ކުރައްންޖެހޭ މައްސަލައެއްކަމަށް ޝިޔާމް ވިދާޅުވިއެވެ.
ހޯމް މިނިސްޓަރުގެ މަޤާމުގައި ހުންނަވާ މިފަދަ މޭރުމަކުން ދިވެހި ފުލުހުން ބަދުނާމުކޮށް މިފަދަ ބޮޑު އިލްޒާމު އެޅުމުން އެކަން ފުލުހުންގެ އިދާރާއިން ތަޚްޤީގު ކުރަންޖެހޭ
– އަހުމަދު ޝިޔާމް
އިމްރާންގެ މިވާހަތަކާއި ގުޅިގެން ގިނަ ބައެއްގެ ފާޑުކިޔުން އިމްރާނަށް އަމާޒުވެފައިވާއިރު، މިއީ ހޯމް މިނިސްޓަރުގެ މަޤާމުގައި ހުންނަވައިގެން ދައްކަވަން ވަރަށް ޒިންމާދަރުކަން ކުޑަ ވާހަތަކެއްކަމަށް ގިނަބަޔަކު ދަނީ ބުނަމުންނެވެ. އަދި މިއީ ފުލުހުންނަކީ އެއްވެސް ބައެއް ނޫންކަން ހާމަކުރުމަށް ދައްކާފައިވާ ވާހަކަތަކެއްކަމަށްވެސް ބައެއް ފަރާތްތަކުން ވިދާޅުވެއެވެ.
2015 ވަނަ އަހަރުގެ މެއި މަހުގެ ފުރަތަމަ ދުވަހު ނުވަތަ މޭޑޭގައި ކުރި މުޒާހަރާގައި އޭރުގެ ސަރުކާރާއި ދެކޮޅަށް މިހާރުގެ ހޯމް މިނިސްޓަރ އިމްރާން ޢަބްދުﷲ ވަނީ ގިނަ ތުހުމަތުތަކެއް ކުރައްވައި ވާހަކަފުޅު ދައްކަވާފައެވެ. އެގޮތުން ގެއްލުވާލާފައިވާ ނޫސްވެރިޔާ އަޙްމަދު ރިޟްވާންގެ މައްސަލައާއި ގުޅޭ ގިނަ ހެކިތަކެއް ހުރިކަމަށް އެ މުޒާހަރާގެ ތެރެއިން މިނިސްޓަރ އިމްރާން ވިދާޅުވެފައިވެއެވެ.
