އިޓާލިއަން ލީގުގައި ފުލުގައި އޮތް ކްރޮޓޯނޭ އަތުން 2-0 އިން ލީގުގެ އެއް ވަނައިގައި އޮތް އިންޓަ މިލާން މޮޅުވެ ޗެމްޕިއަންކަން ހޯދުމާ ގާތަށް ޖެހިލިފިއެވެ.
ރެލިގޭޝަނުގައި އޮތް ކްރޮޓޯނޭ އިން އަމިއްލަ ދަނޑުގައި އިންޓައާ ދެކޮޅަށް ރަނގަޅު ކުޅުމެއް ދެއްކި އެވެ. އިންޓަ އިން ދެ ގޯލު ޖެހީ ވެސް ދެ ވަނަ ހާފުގަ އެވެ. އެ ޓީމަށް ލީޑުނަގައިދިން ގޯލު ޖެހީ މެޗުގެ 69 ވަނަ މިނިޓްގައި ކްރިސްޓިއަން އެރިކްސަން އެވެ. އިތުރު ވަގުތުގައި އިންޓަގެ އަނެއް ގޯލު ޖެހީ ފުލްބެކް އަޝްރަފް ހަކީމީ އެވެ. ސަސުއޯލޯ އަތުން ދެ ވަނައިގައި އޮތް އެޓަލަންޓާ މޮޅުވެއްޖެނަމަ ލީގު ކަށަވަރު ކުރަން ފަހު ހަތަރު މެޗުން އިންޓަ އަށް ބޭނުންވާނީ އެންމެ ޕޮއިންޓެކެވެ.
މި މޮޅާ އެކު އިންޓަ އެއް ވަަނައިގައި އޮތީ 34 މެޗުން 82 ޕޮއިންޓް ހޯދައިގެންނެވެ. ދެ ވަނައިގައި އޮތީ 33 މެޗުން 68 ޕޮއިންޓް ހޯދާފައިވާ އެޓަލަންޓާ އެވެ. ތިން ވަނައިގައި އޮތް ނަޕޯލީ އާއި ހަތަރެއްގައި އޮތް ޔުވެންޓަސް އަދި ފަސް ވަނައިގައި އޮތް އޭސީ މިިލާނަށް ވަނީ 33 މެޗުން 66 ޕޮއިންޓް ލިބިފަ އެވެ. ލީގުގައި ސަސުއޯލޯ އަތުން ދެ ވަނައިގައި އޮތް އެޓަލަންޓާ އަށް މޮޅެއް ނުހޯދިއްޖެނަމަ އިންޓަ އަށް 10 އަހަރު ތެރޭ ފުރަތަމަ ފަހަރަށް ލީގު ޗެމްޕިއަންކަން ލިބޭނެ އެވެ.
މި ނަތީޖާ އެކު ފާއިތުވި 10 އަހަރު ތެރޭ ފުރަތަމަ ފަހަރަށް ޔުވެންޓަސް އަތުން ލީގު ގެއްލިއްފަ އެވެ. އިންޓަ އިން އެންމެ ފަހުން ލީގުގެ ޗެމްޕިއަންކަން ހޯދީ 2010 ވަނަ އަހަރު ހޯސޭ މޮރީނިއޯ އެ ޓީމުގެ ކޯޗަކަށް ހުރިއިރު އެވެ. ޔުވެންޓަސް ނޫން ޓީމަކަށް އެންމެ ފަހުން އިޓާލިއަން ލީގުގެ ތަށި އުފުލާލީ 2011 ވަަނަ އަހަރު އޭސީ މިލާނުންނެވެ.
ކޮމެންޓު ފޮނުވާ