ޔުއެފާ ޗެމްޕިއަންސް ލީގުގެ ސެމީ ފައިނަލުގެ ފުރަތަމަ ލެގުގައި ފަހަތުން އަރާ ފްރާންސްގެ ޕީއެސްޖީ ބަލިކޮށް އިނގިރޭސި ކުލަބް މެންޗެސްޓަރ ސިޓީން ފައިނަލުގެ އުއްމީދު ބޮޑުކޮށްފިއެވެ.
ޕީއެސްޖީގެ ދަނޑުގައި ކުޅުނު މެޗުން ސިޓީ މޮޅުވީ 2-1 ގެ ނަތީޖާއަކުންނެވެ. މިފަހަރުގެ ޗެމްޕިއަންސް ލީގުގެ ސެމީގައި ސިޓީ ވާދަކުރަމުން އަންނައިރު، މިއީ ސިޓީގެ ތާރީޚުގައި އެ ޓީމުން މި މުބާރާތުގެ ސެމީގައި ކުޅޭ ދެވަނަ ފަހަރެވެ. އަދި ސެމީގެ ފުރަތަމަ ލެގުން މޮޅުވެ ފައިނަލާ ގާތަށް ސިޓީ ޖެހިލިއިރު، މިހާތަނަށް ޗެމްޕިއަންސް ލީގުގެ ފައިނަލެއްގައި އެ ޓީމު ވާދަކޮށްފައެއް ނުވެއެވެ.
މެޗުގައި ޕީއެސްޖީން ލީޑު ނަގާފައިވަނީ ވަރަށް ކުރީކޮޅު އެވެ. ފުރަތަމަ ހާފުގެ 15 ވަނަ މިނެޓުގައި އެންހެލް ޑި މާރިއާ ނަގައިދިން ކޯނަރަކުން މި ލަނޑު ޕީއެސްޖީއަށް ކާމިޔާބުކޮށްދިނީ އެ ޓީމުގެ ކެޕްޓަން މާކީނިއޯސްއެވެ. މި ހާފުގައި ސިޓީން އެއްވަރުކުރަން މަސައްކަތް ކުރި ނަމަވެސް ޕީއެސްޖީން ވަރަށް ރަނގަޅަށް ސިޓީ ހިފެހެއްޓި އެވެ.
ނަމަވެސް ނަތީޖާ ހަމަހަމަކުރަން ސިޓީން ކުރަމުންދިޔަ މަސައްކަތް މެޗުގެ 64 ވަނަ މިނެޓުގައި ވަނީ ކާމިޔާބުވެފައެވެ. އޭރިއާ ބޭރުން ސިޓީގެ ކެޕްޓަން ކެވިން ޑިބްރޭނާ ހުރަސްކޮށްދިން ބޯޅަ ގޯލަށް ވަނީ އެއްވެސް ކުޅުންތެރިއަކު ގައިގައި ނުޖެހިއެވެ. އަދި އޭގެ ހަތް މިނެޓު ފަހުން ހިލޭ ޖެހުމަކުން ރިޔާދު މާރޭޒް ވަނީ ސިޓީއަށް ލީޑު ނަގާދީފައެވެ.
މި މޮޅާއެކު ޗެމްޕިއަންސް ލީގުގެ ފައިނަލާ ގާތަށް ސިޓީ ޖެހިލިއިރު، ސިޓީ އާއި ޕީއެސްޖީ ބައްދަލުކުރާ ދެވަނަ ލެގުގެ މެޗު ކުޅޭނީ އަންނަ ހަފުތާގެ އަންގާރަ ދުވަހުގެރޭ ސިޓީގެ ދަނޑުގައެވެ. އެ މެޗު އެއްވަރުކޮށްލައިގެން ނުވަތަ އެ މެޗުން 1-0 ގެ ނަތީޖާއަކުން ޕީއެސްޖީ މޮޅުވިޔަސް، ފައިނަލުގެ ޖާގައެއް ސިޓީއަށް ލިބިގެންދާނެއެވެ.
