ހުޅުމާލެއިން ދޫކޮށްފައިވާ ފުލެޓްތަކާއި، ރޯހައުސްތަކާއި، އެނޫންވެސް ކުއްޔަށް ދޫކޮށްފައިވާ ވިޔަފާރި ޔުނިޓްތަކާއި ސިނާޢީ ބިންތަކުން އެޗްޑީސީއަށް ފައިސާ ދައްކާއިރު މަޢުލޫމާތު ފުރިހަމަކުރުމަށް އިލްތިމާސްކޮށްފިއެވެ.
ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ބުނީ އެކުންފުނިން ވިއްކާފައިވާ ފުލެޓްތަކާއި ގޯތިތަކާއި ރޯހައުސްތަކުގެ އިތުރުން ކުއްޔަށް ދޫކޮށްފައިވާ ވިޔަފާރި ޔުނިޓްތަކުންނާއި ސިނާޢި ބިންތަކަށް ފައިސާ ދައްކާފައިވާ ފަރާތްތަކުން ފައިސާ ދައްކަނީ ކޮންތަނަކަށްކަން އެނގޭގޮތަށް ފުރިހަމަ މަޢުލޫމާތު ނުހިމަނައި، ފައިސާ ޖަމާކުރަމުންދާތީ، އެއީ ކޮން ފަރާތަކުން ކޮން ބޭނުމަކު ޖަމާކުރި ފައިސާއެއްކަން ދެނެގަތުމަށް ބޮޑެތި ދަތިތަކަކާ ކުރިމަތިވަމުންދާކަމަށެވެ. އަދި ފައިސާ ދައްކާ ފަރާތުގެ ފުރިހަމަ މަޢުލޫމާތު، ފައިސާ ޖަމާކުރާ ސްލިޕްގައި ހިމެނި ކަމުގައިވިޔަސް، ބައެއް ފަހަރު އެ މަޢުލޫމާތު ބޭންކު ސްޓޭޓްމަންޓްގައި ފުރިހަމަވެފައި ނުހުންނަކަން އެކޯޕަރޭޝަނުން ވަނީ ފާހަގަކޮށްފައެވެ.
އެހެންކަމުން، އެކުންފުންޏަށް ދައްކަންޖެހޭ ފައިސާ، ދެއްކުމުގައި މި އުޞޫލުން ފައިސާގެ މުޢާމަލާތްތައް ކުރިޔަށް ނުގެންދިއުމަށް އެޗް.ޑީ.ސީން ވަނީ އިލްތިމާސްކުރައްވާފައެވެ. އަދި ފައިސާ ދެއްކުމަށްފަހު، އެ ފައިސާ އެޗް.ޑީ.ސީއަށް ލިބުނުކަން ޔަޤީން ކުރުމަކީވެސް މުހިންމު ކަމެއްކަމަށް އެ ކޯޕަރޭޝަނުން ބުނެއެވެ.
އެޗް.ޑީ.ސީން ވަނީ ވޭތުވެދިޔަ ދުވަސްތަކުގައި މިގޮތަށް ފައިސާ ޖަމާކޮށްފައިވާ ފަރާތްތަކުން އެ މަޢުލޫމާތު އެޗް.ޑީ.ސީއާއި މިހާތަނަށް ޙިއްޞާ ކޮށްފައިނުވާނަމަ ފައިސާ ދައްކާފައިވަނީ ކޮން ތަނަކަށްކަން އެނގޭ ގޮތަށް ފައިސާ ޖަމާކުރި ސްލިޕުގެ ކޮޕީއެއް މިމަހުގެ 30 ވަނަ ދުވަހުގެ ކުރިން ހުށައެޅުމަށްވެސް އިލްތިމާސްކޮށްފައެވެ.
