އަންނަ ދިރާސީ އައު އަހަރު ކުރިއެކޭވެސް އެއްގޮތަށް ޖެނުއަރީމަހު ފަށާ ދެވަނަ ދިރާސީ އަހަރު އޯގަސްޓްމަހު ފަށާގޮތަށް އެދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ޕެޓިޝަނެއް ހުށައަޅާން ބެލެނިވެރިން ތައްޔާރުވެއްޖެއެވެ. ބެލެނިވެރިން މިހާރު ތައްޔާރުކުރަމުން އަންނަ ޕެޓިޝަނުގައި ވަނީ ދަރިވަރުން އެއްވެސް ގްރޭޑެއްގައި ރިޕީޓް ނުކުރުމަށްވެސް ރައީސްއަށް ދަންނަވާފައެވެ.
ބެލެނިވެރިން އެޕެޓިޝަންގައި ފާހަގަކޮށްފައިވާ ކަންކަމުގެ ތެރޭގައި ދަރިވަރުންގެ ތަޢުލީމާއި، އެކުދިންގެ ޢުމުރާ އެކުދިންގެ މުޅި މުސްތަޤްބަލު ގުޅިފައިވާކަމަށް ބުނެފައިވެއެވެ. އެހެންކަމުން އަންނަ އަހަރުގެ ދިރާސީ އަހަރު ނިމޭ ތާރީޚް ފަސްކުރުމުން ގްރޭޑް 10 ނިމޭ ޢުމުރު 16 އަހަރުން 17 އަށް ކުރިއަށް އޮތް ނުވަ އަހަރު ބަދަލުވެގެންދާނެކަމަށާއި، ކުރިއަށް އޮތް ތިން އަހަރު ނާސަރީއާއި ޖޭކޭޖީ އަދި އެސްކޭޖީގައި ކިޔަވާ ދަރިވަރުން ގްރޭޑް 1 އަށް ވަދެވޭނީ 8 އަހަރުގައިކަމަށް މި ޕެޓިޝަންގައި ބެލެނިވެރިން ވަނީ ފާހަގަކޮށްފައެވެ. މިހާރު ގްރޭޑް 1 އަށް ކުދިން ވައްދަނީ ޢުމުރުން 7 އަހަރުގަ އެވެ.
ބެލެނިވެރިންގެ ކަންބޮޑުވުންތަކުގެ ތެރޭގައި މިކަމުގެ ސަބަބުން ސާނަވީ ތައުލީމް ނިންމާ ޔުނިވާސިޓީ ތަޢުލީމް ފެށޭ ޢުމުރު 20 އަހަރަށް ބަދަލުވެގެންދާނެކަމަށާއި، އޭގެ ބަދަލުގައި ދުނިޔޭގެ އެހެން ގައުމުތަކުގައި ވެސް ކޯވިޑް-19 ގެ ބަލިމަޑުކަމާއި ގުޅިގެން ޢަމަލުކުރި އުސޫލާ އެއްގޮތަށް ކިޔަވާ ކުދިންނަށް 2021 ވަނަ އަހަރުގެ ޖެނުއަރީ މަހު އައު ދިރާސީ އަހަރަަށް ޕްރޮމޯޓްވެވޭނެ ގޮތެއް ހަމަޖައްސައި ދިނު،މަކީވެސް މުހިންމުކަމެއްކަމަށް ރައީސްއަށް ދެންނެވުމަށް ތައްޔާރުކުރާ ޕެޓިޝަންގައި ބުނެފައިވެ އެވެ.
ކޯވިޑް-19ގެ ޙާލަތާއި ގުޅިގެން އެކަޑަމިކް ކަލަންޑަރަށް ބަދަލުގެނެސް އެޑިއުކޭޝަން މިނިސްޓްރީން އައު ކަލަންޑަރު ޢާންމުކޮށްފައިވަނީ އޯގަސްޓްމަހުގެ 13 ވަނަ ދުވަހު އެވެ. އައު އެކަޑަމިކް ކަލަންޑަރުގައިވާގޮތުން މިއަހަރުގެ ފުރަތަމަ ޓާމްގެ ކިޔެވުން ނިމޭނީ ޑިސެމްބަރު މަހުގެ 3 ވަނަ ދުވަހު އެވެ. އަދި މިއަހަރުގެ ދިރާސީ އަހަރުގެ ކިޔެވުން ނިމޭނީ އަންނަ އަހަރުގެ ޖޫންމަހުގެ 24ގައެވެ. އަދި އައު ދިރާސީ އަހަރު ފެެށޭނީ އަނަން އަހަރުގެ އޮގަސްޓު މަހުގެ 10 ވަނަ ދުވަހު އެވެ.
ކޯވިޑް-19ގެ ޙާލަތާއި ގުޅިގެން ގެނައި މިބަދަލަކީ ދާއިމީކޮށް ގެންނަ ބަދަލެއްގެ ގޮތުގައި އަދި ކަނޑަނާޅާކަމަށް އެޑިއުކޭޝަން މިނިސްޓްރީން ވިދާޅުވެއެވެ.
ކޮމެންޓު ފޮނުވާ