ކުލުދުއްފުށީން އިތުރު ދެ ފުލުހަކު ކޯވިޑް-19އަށް ޕޮޒިޓިވްވެ ކުޅުދުއްފުށީ ޕޮލިސް ކްލަސްޓާއިން ޕޮޒިޓިވްވި މީހުންގެ ޢަދަދު 13 އަށް އިތުރުވެއްޖެ އެވެ.
މިދެފުލުހުން ކޯވިޑަށް ޕޮޒިޓިވްވެފައިވަނީ ކުޅުދުއްފުށީ ޕޮލިސް ސްޓޭޝަންގައި ކޭޓަރިންގެ ޚިދުމަތް ދެމުންއަންނަ ކާނިވަލް ކުންފުނީގެ 3 ބިދޭސީއެއް ޕޮޒިޓިވް ވުމާއި ގުޅިގެން ނެގި ރޭންޑަމް ސާމްޕަލް ތަކުންނެވެ. އެގޮތުން ކުޅުދުއްފުށީގައި މަސައްކަތްކުރާ ފުލުހުންނާއި ސިފައިން ހިމެނޭހެން 75 ރޭންޑަމް ސާމްޕަލް ނަގާފައިވެއެވެ.
މި ރެންޑަމް ސާމްޕަލް ތަކުގެ ތެރެއިން ޕޮޒިޓިވްވި ދެ ފުލުހުންނަކީ ކަރަންޓީންގައި ތިބި ބަޔަކަށް ނުވާތީ އެ ދެފުލުހުންގެ ކޮންޓެކްޓް ޓްރޭސިންގެ މަސައްކަތް މިހާރު ކުޅުދުއްފުށީގައި އަންނަނީ ކުރަމުންނެވެ.
ކުޅުދުއްފުށީ ޕޮލިސް ކްލަސްޓަރގައި ފުރަތަމަ ކޯވިޑް-19އަށް ޕޮޒިޓިވް ވެފައިވަނީ ކުޅުދުއްފުށީ ޕޮލިސް ސްޓޭޝަންގައި މަސައްކަތްކުރާ، ކުރިނބީއަށް ނިސްބަތްވާ ފުލުހެކެވެ. އޭނާއަކީ ފަހުގެ ތާރީޚެއްގައި މާލެއަށް ދަތުރުކޮށްފައިވާ މީހަކަށް ނުވާތީ އޭނާގެ ކޮންޓެކްޓް ޓްރޭސް ހަދައި ކުޅުދުއްފުށީގެ އިތުރުން 9 ރަށަކުން ޑައިރެކްޓް ކޮންޓެކްޓުން ވަނީ ދެނެގަނެފައެވެ.
ކުޅުދުއްފުށީ ޕޮލިސް ކްލަސްޓައާއި ގުޅުންހުރި ބަޔަކު ދިއްދުއިންވެސް ޕޮޒިޓިވްވެފައިވެ އެވެ.
ކޮމެންޓު ފޮނުވާ