ޕާޓީގެ މެމްބަރުންގެ މެދުގައި ތަފާތު ދަރަޖަތަކެއް ކަނޑައަޅައި ލޯޔަލްޓީ ތަފާތު ކުރުމަކީ މެމްބަރުންގެ މެދުގައި ކުރެވޭ ދަރަޖައިގެ ތަފާތެއް ކަމުގައި ރައްޔިތުންގެ މަޖިލީހުގެ ހުޅުމާލެ ދާއިރާގެ މެމްބަރު ޢަލީ ނިޔާޒު ވިދާޅުވެއްޖެއެވެ.
ރާއްޖޭގެ ސިޔާސީ ޕާޓީއަކުން ފުރަތަމަ ފަހަރަށް ތަޢާރަފްކުރި "ލޯޔަލިޓީ ކާޑު" އިދިކޮޅު ކޯލިޝަނުން މިއަދު ތަޢާރަފް ކުރުމާއި ގުޅިގެން ޢަލީ ނިޔާޒް ކުރެއްވި ޓްވީޓެއްގައި ވިދާޅުވީ ޕާޓީއެއްގެ ކޮންމެ މެމްބަރަކަށްވެސް އެޕާޓީއެއްގެ ތެރޭގައި ލޯޔަލީޓީ އޮންނަންވާނީ ހަމަހަމަ އުސޫލަކުންކަމަށެވެ. މެމްބަރުންގެ މެދުގައި ތަފާތު އުސޫލަކުން ކަންކަން ކުރެވޭ ގޮތަކަށް ދަރަޖަ ކުރުމަކީ ޕާޓީތަކުގެ މަފްހޫމާއިވެސް ޚިލާފްކަމެއްކަމަށް ޢަލީ ނިޔާޒު ވިދާޅުވިއެވެ.
ޕާޓީ މެމްބަރުން ދަރަޖަ ކުރުމަކީ ހަމަޖެހޭ ކަމެއް ނޫން. ޕާޓީގެ ކޮންމެ މެމްބަރެއްގެވެސް ޕާޓީއަށް ލޯޔަލްޓީ އޮންނަންވާނީ އެއް މިންވަރަކަށް. މި އީ މެމްބަރުން ތަފާާތު ކުރުން.
– އަލީ ނިޔާޒް
ލޯޔަލިޓީ ކާޑް އިފްތިތާހު ކުރުމަށް ފަހު ފުރަތަމަ ޕްލެޓިނަމް ކާޑް، އެ ޕާޓީގެ ރައީސް އަދި ކުރީގެ ރައީސް އަބްދުﷲ ޔާމީނަށް ވަނީ ވެދުމަށް އަރުވާފަ އެވެ. އެ ކާޑާ ހަވާލުވެވަޑައިގެންނެވީ ރައީއް ޔާމީންގެ ދަރިކަލުން ޒޭން އަބްދުﷲ ޔާމީނެވެ.
މިކާޑުތަކުގެ ތަފްސީލް ދެއްވަމުން ޕީއެންސީގެ ނައިބް ރައީސް މުހައްމަދު ސައީދު ވިދާޅުވީ މިއީ ރާއްޖޭގެ އެހެން ސިޔާސީ ޕާޓީތަކަށް ނަގައިގެނެވުނު ފިލާވަޅެއްކަމަށެވެ. ޒަމާނާއި އެއްގޮތަށް ސިޔާސީ ޕާޓީ ހިންގަން މިއަދު ދަސްކުރަން ޖެހޭއިރު މިއީ ސިޔާސީ ގޮތުން ޕާޓީ ހިންގުމަށް ލިބިގެންދާ ވަރަށްބޮޑު ފަސޭހައެއްކަމަށެވެ. ސައީދު ވިދާޅުވީ މިކާޑުތަކުގެ ތެރެއިން މެޖެންޑާ ކާޑަކީ ޕާޓީގެ ހުރިހާ މެމްބަރުންނަށް އަމާޒުކޮށްގެން ތަޢާރަފް ކުރެވިފައިވާ ކާޑެއްކަމަށެވެ.
އަދި ސިލްވާ، ގޯލްޑް، ޕްލެޓިނަމް ކާޑަކީ ވިޔަފާރި ވެރިންނާއި، ޕާޓީއަށް ހެޔޮއެދޭ ފުދުންތެރި ފަރާތްތަކަށް ޚާއްސަކުރެވިގެން ތަޢާރަފް ކުރެވިފައިވާ ކާޑެއްކަމަށެވެ. ރާއްޖޭގެ އެތައްހާސް ބަޔަކު މިއަދުވެސް ޕާޓީއަށް ހެޔޮއެދި އެހީތެރިކަން ފޯރުކޮށްދޭން ތައްޔާރައް ތިބިކަމަށް ސައީދު ވިދާޅުވިއެވެ. އޭނާ ވިދާޅުވީ މިއީ ޕާޓީ ކުރިއަށް ގެންދިއުމަށްޓަކައި އަދި ކުރިއަށް އޮތް ރިޔާސީ އިންތިޚާބް ކާމިޔާބް ކުރުމަށް ލިބިގެންދާ އިތުރު ހިއްވަރެއްކަމަށެވެ. ޕަރޮގްރޮސިވް ކޯލިޝަނުން ކުރިއަށް އޮތްތަނުގައި ޕާޓީއަށް މަންފާ ލިބޭނެ ގިނަ މަސައްކަތްތަކެއް ކުރުމަށް ހަމަޖެހިފައިވާކަމަށްވެސް ސައީދު ވިދާޅުވިއެވެ.
