ރޭންޖާސް ލީގު ހޯދުމާ ގާތައް

ސްކޮޓިޝް ޕްރިމިއަރ ލީގުގައި ރޭންޖާސް މޮޅުވެ ލީގުގެ ތަށި ހޯދުމާ ހަތަރު ޕޮއިންޓް ގާތައް ޖެހިލައިފިއެވެ.

ރަށުން ބޭރުގައި ލިވިންގްސްޓަން އަތުން ރޭންޖާސް މޮޅުވީ 1-0 ލަނޑުންނެވެ. މެޗުގެ ޖެހި ހަމައެކަނި ލަނޑު ރޭންޖާސްއަށް ކާމިޔާބުކޮށްދިނީ އަލްފްރެޑޯ މޮރެލޮސް އެވެ. މި މޮޅާއެކު ލިވަޕޫލްގެ ކުރީގެ ކެޕްޓަން ސިޓީވަން ޖެރާޑްގެ ކޯޗުކަމުގައި ކުޅުމުންދާ ރޭންޖާސް ވަނީ ލީގު ހޯދުމާ ހަތަރު ޕޮއިންޓް ގާތައް ޖެހިލާފައެވެ. މި މޮޅާއެކު ލީގުގައި އަންނަ ހޮނިހިރު ދުވަހު އެސްޓީ މިރެން އަތުން ރޭންޖާސް މޮޅުވެ ސެލްޓިކް އެދުވަހު ޑަންޑީ ޔުނައިޓެޑު އަތުން ބަލިވެއްޖެ ނަމަ ރޭންޖާސްއަށް ލީގު ލިބޭނެއެވެ.

ލީގުގައި މިހާތަނަށް ކުޅުނު 31 މެޗުން ހޯދި 85 ޕޮއިންޓާއެކު ރޭންޖާސް އޮތީ ތާވަލުގެ އެއްވަނައިގައެވެ. ދެވަނައިގަ އޮތް ސެލްޓިކްއަށް ލިބެނީ 67 ޕޮއިންޓެވެ. ތިންވަނައިގަވާ ހިބާނިއަންއަށް 52 ޕޮއިންޓް ލިބުނު އިރު ހަތަރުވަނައިގަވާ އަބާޑީންއަށް ލިބެނީ 48 ޕޮއިންޓެވެ. ރޭގެ މެޗުން ބަލިވި ލިވިންގްސްޓަން ތާވަލުގެ ފަސްވަނައިގަ އޮތީ ހަވަނާގައިވާ އެސްޓީ މިރެން ވުރެ އެއްޕޮއިންޓު އިތުރަށް ހޯދައިގެން އަދި އެޓީމަށްވުރެ އެއްމެޗު މަދުން ކުޅެގެންނެވެ.