ޔުނައިޓެޑަށް މޮޅެއް ނުވެވުނު

އިނގިރޭސި ޕްރިމިއާ ލީގުގެ ދެ ވަނައިގައި އޮތް މެންޗެސްޓާ ޔުނައިޓެޑު ރޭ ކުޅުނު މެޗުންވެސް އެއްވަރުވެއްޖެ އެވެ.

ޔުނައިޓެޑް ރަށުންބޭރުގައި ކްރިސްޓަލް ޕެލަސްއާ އެއްވަރުވީ ލަނޑެއްނުޖެހި އެވެ. ޕެލަސް ދަނޑުގައި ރޭ ކުޅުނު މެޗަށް ޔުނައިޓެޑުން ނުކުތީ އެންމެ ފަހުން މެޗުތަކުގައި އަނިޔާގެ ސަބަބުން ނުކުޅެވުނު ތަޖުރިބާކާރު ފޯވާޑް އެޑިންސަން ކަވާނީ ފުރަތަމަ އެގާރައިގައި ހިމަނައިގެންނެވެ. މެޗުގެ ކުރީކޮޅުގައި ކަވާނީ އަށް ލަނޑު ޖަހަން ރަނގަޅު ފުރުސަތެއް ލިބުނުއިރު، އޭނާ ފޮނުވާލި ބޯޅަ ދިޔައީ ހުރަސްދަނޑިމަތިންނެވެ.

ކްރިސްޓަލް ޕެލަސްގެ ކްރިސްޓިއަން ބެންޓެކޭ ފޮނުވާލި ބޯޅައެއް ވެސް ވަނީ ގޯލުގެ ހުރަސްދަނޑިމަތިން ގޮސްފަ އެވެ. ޔުނައިޓެޑްގެ ނަމަންޏާ މަޓިޗް ފޮނުވާލި ބޯޅައެއް ކްރިސްޓަލް ޕެލަސްގެ ކީޕަރު ވިސެންޓޭ ގައީޓާ ހުއްޓުވިއިރު، އެ ޓީމުގެ ޕެޓްރިކް ވެން އާންހޯލްޓް ފޮނުވާލި ބޯޅައެއް ޔުނައިޓެޑްގެ ކީޕަރު ޑީން ހެންޑަސަން ވަނީ މަތަކޮށްފަ އެވެ.

ލެސްޓާ އާއި ޔުނައިޓެޑްގެ ނަތީޖާއާ އެކު އެންމެ ބޮޑު ހިތްހަމަޖެހުމެއް ލިބޭނީ އެއް ވަނައިގައި އޮތް މެންޗެސްޓާ ސިޓީ އަށެވެ. ސިޓީ މިހާރު އެއް ވަނައިގައި އޮތީ 14 ޕޮއިންޓުގެ ލީޑަކާ އެކީ އެވެ. ލީގު ތާވަލުގެ މަތީގައި އޮތް ތިން ޓީމުން ވެސް 27 މެޗު ކުޅެފައިވާއިރު، އެއް ވަނައިގައި އޮތް ސިޓީ އަށް ވަނީ 65 ޕޮއިންޓް ލިބިފަ އެވެ. ދެ ވަނައިގައި އޮތް ޔުނައިޓެޑަށް 51 ޕޮއިންޓް ލިބިފައިވާއިރު، ތިން ވަނައިގައި އޮތް ލެސްޓާ އަަށް ވަނީ 50 ޕޮއިންޓް ލިބިފަ އެވެ.