މި ސަރުކާރުގެ މިނިސްޓަރ އޮފް ކޮމިއުނިކޭޝަންސް ސައިނސްް އެންޑް ޓެކްނޮލޮޖީގެ މަގާމުގައި ހުންނެވި، މުޙައްމަދު މަލީހު ޖަމާލުގެ އިތުބާރު ނެތްކަމުގެ މައްސަލާގައި އޭނާ ވަކިކުރުމަށް، ރައްޔިތުންގެ މަޖިލީހުގައި އިއްޔެ ނެގުނު ވޯޓުގައި، އޭނާ މަގާމުން ވަކިކުރުމަށް އެމްޑީޕީގެ ޕާލިމަންޓްރީ ގްރޫޕުން ނެރުނު ތްރީލައިން ވިޕާ އެއްގޮތަށް، ތުޅާދޫ ދާއިރާގެ މެމްބަރު ހިސާން ހުސެއިން ވޯޓު ދެއްވާފައި ނުވާކަން ހާމަވެއްޖެއެވެ.

މަލީހު ޖަމާލް މަގާމުން ދުރުކުރުމުގެ އެމްޑީޕީން ތްރީލައިން ވިޕެއް ނެރެފައިވަނީ، މިނިސްޓްރީ އޮފް ކޮމިއުނިކޭޝަންސް ސައިންސްް އެންޑް ޓެކްނޮލޮޖީއިން، މަލީހުގެ މިނިސްތަރުކަމުގައި ހަދަންޖެހޭ ގަވައިދުތަކެއް ހަދާފައި ނުވާތީ، އޭނާ މަގާމުގެ މަސްއޫލިއްޔަތު އަދާ ނުކުރާކަމަށް ތުހުމަތުކޮށެވެ. އަދި، އެމްޑީޕީގެ 14 މެމްބަރަކު ސޮއިކޮށް މަޖިލީހަށް ހުށަހެޅި އިތުބާރު ނެތްކަމުގެ މައްސަލައަށް ޖަވާބު ދާރީވުމުގެ ފުރުސަތުވެސް އިއްޔެގެ މަޖިލީހުގައި މަލީހުއަށް ވަނީ ދީފައެވެ.

މިމައްސަލާގައި ޖަވާބު ދާރީވަމުން މަލީހުވަނީ އޭނާގެ މައްޗަށް އެމްޑިޕީގެ ޕާލަމެންޓްރީ ގުރޫޕުން ކޮށްފައިވާ މިތުހުމަތުތައް ދޮގުކޮށްފައެވެ. އަދި މަލީހު ވިދާޅުވެފައިވަނީ، މިމައްސައަކީ ދޮގާ މަކަރު އެކުލެވިގެންވާ، އަދި އޭނާގެ އަބުރު ކަތިލުމަށް އަމާޒުކޮށް މަޖިލީހަށް ހުށަހެޅިފައިވާ މައްސަލައެއް ކަމުގައެވެ.

މަލީހު މަގާމުން ވަކިކުރުމަށް އެންޑީޕީން ނެރުނު ތްރީލައިން ވިޕާ ހިސާން ޚިލާފު ވެވަޑައިގެންފައިވާއިރު، އިއްޔެ ނެގުނު މި ވޯޓަށް އެމްޑީޕީގެ ޕާލަމެންޓަރީ ގްރޫޕުގެ މަރަދޫ ދާއިރާގެ މެމްބަރު އިބްރާހިމް ޝަރީފްވެސް ވަޑައިގެންފައެއް ނުވައެވެ.

މަޖިލީހުގައި ވޯޓު ދޭނެގޮތް ކަޑައަޅާ ޕާލަމެންޓްރީ ގުރޫޕްތަކުން ނެރޭ ތްރީލައިން ވިޕްތަކަކީ، މެންބަރުން ވިޕާ އެއްގޮތަށް ވޯޓުލުން މަޖުބޫކުރާ ވިޕެކެވެ. އަދި ތްރީލައިން ވިޕަކާ އެއްގޮތަށް ވޯޓު ނުދީފިނަމަ އެމެމްބަރަކާ ދެކޮޅަށް ފިޔަވަޅު އެޅުމަށްވެސް ޕީޖީ ގްރޫޕްތަކުގެ ގަވާއިދުތަކުގައި ހިމެނިފައި އޮވެއެވެ.

އެހެންނަމަވެސް، އެމްޑިޕީގެ ޕީޖީ ގުރޫޕުން ނެރުުނު ތްރީލައިން ވިޕާ ހިސާން ޚިލާފް ވެވަޑައިގެންފައި ވުމާގުޅިގެން އެއްވެސް ފިޔަވަޅެއް އެޅުއްވުމުގެ ވިސްނުމެއް އެމްޑީޕީގެ ޕީޖީ ގުރޫޕް ތެރޭގައި އޮންކަމެއް އަދި މިހާތަނަށް ސާފުވެފައެއް ނުވެއެވެ.

ތުޅާދޫ ދާއިރާގެ މެމްބަރު ހިސާން ހުސެއިންއަކީ، މަޖިލިސް ރައީސް މުހައްމަދު ނަޝިދުގެ ވަރަށް އަރިސް ބޭފުޅަކަށް ވާއިރު، އޭނާއަކީ ޖުޑިޝަލް ސާވިސް ކޮމިޝަންގެ ރައީސްވެސް މެއެވެ.

މަލީހު ޖަމާލް މަގާމުން ދުރުކޮށްފައި ވަނީ މަޖިލިހުގެ 59 މެމްބަރުންގެ އައުލަބިއްތުންނެވެ. މީގެތެރޭގައި އިދިކޮޅު ޕީޕީއެމް/ޕީއެންސީގެ 3 މެމްބަރަކުވެސް ހިމެނެއެވެ. އެ ތިން މެމްބަރުންނަކީ، ނައިފަރު ދާއިރާގެ މެމްބަރު އަހުމަދު ޝިޔާމްއައި، ޕީއެންސީގެ ނާއިބު ރައީސް މުހައްމަދު ސައީދުގެ އިތުރުން ކ. ގުރައިދޫ ދާއިރާގެ މެމްބަރު އިބުރާހިމް ރިޒާއެވެ.