އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑް ބަލިކޮށް މެންޗެސްޓާ ސިޓީން ޖެހިޖެހިގެން 20 މެޗުން މޮޅުވެ، ލީގުގެ އެއްވަނައިގައި 13 ޕޮއިންޓުގެ ލީޑެއް ނަގައިފިއެވެ.
އަމިއްލަ ދަނޑުގައި ކުޅުނު މެޗުން ސިޓީ މޮޅުވީ 2-1 ލަނޑުންނެވެ. މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މެޗުގައި އެންމެ ފުރަތަމަ ލަނޑު ޖަގާ ލީޑު ނެގީ ސިޓީންނެވެ. އެގޮތުން މެޗުގެ 30 ވަނަ މިނެޓުގައި ކެވިން ޑި ބްރޭނާ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ޑިފެންޑަރު ރުބެން ޑިއާޒެވެ. އެކަމަކު ފުރަތަމަ ހާފު ނިމުމުގެ ކުރިން މިކޭލް އެންޓޯނިއޯ ވަނީ ވެސްޓް ހޭމަށް ނަތީޖާ އެއްވަރުކޮށްދީފައެވެ. މި މެޗުން ސިޓީ މޮޅުވީ މެޗުގެ 68 ވަނަ މިނެޓުގައި ޑިފެންޑަރު ޖޯން ސްޓޯންސް ކާމިޔާބުކޮށްދިން ލަނޑުންނެވެ. ސްޓޯންސް މި ލަނޑު ކާމިޔާބުކޮށްފައިވަނީ ރިޔާދު މާރޭޒް ތަނަވަސްކޮށްދިން ފުރުސަތަކުންނެވެ.
މި މޮޅާއެކު ސިޓީން ވަނީ ހުރިހާ މުބާރާތެއްގައި އެންމެ ފަހުން ކުޅުނު 20 މެޗުންވެސް މޮޅުވެފައެވެ. އަދި ލީގުގައި އެންމެ ފަހުން ކުޅުނު 14 މެޗުންވެސް ސިޓީ ވަނީ މޮޅުވެފައެވެ. މީގެ އިތުރުން މި މެޗަކީ ސިޓީގެ ކޯޗު ޕެޕް ގާޑިއޯލާގެ އިރުޝާދުގެ ދަށުން އެ ޓީމުން ހޯދި 200 ވަނަ މޮޅެވެ.
މި މޮޅާއެކު ތާވަލުގެ އެއްވަނައިގައި 13 ޕޮއިންޓުގެ ލީޑެއް ސިޓީން ނެގިއިރު، އެ ޓީމަށް ވަނީ ކުޅުނު 26 މެޗުން 62 ޕޮއިންޓް ލިބިފައެވެ. އަދި ދެވަނައިގައި އޮތް މެންޗެސްޓާ ޔުނައިޓެޑާއި ތިންވަނައިގައި އޮތް ލެސްޓާ ސިޓީއަށް 25 މެޗުން ލިބިފައިވަނީ 49 ޕޮއިންޓެވެ. މީގެ އިތުރުން ސިޓީ އަތުން ބަލިވި ވެސްޓް ހޭމް އޮތީ ތާވަލުގެ ހަތަރުވަނައިގައި 26 މެޗުން 45 ޕޮއިންޓާއެކުއެވެ.
ކޮމެންޓު ފޮނުވާ