2020 ވަނަ އަހަރު ޖޫން މަހު މަރުވެފައި ހުއްޓާ ފެނުނު އެކްޓަރ ސުޝާންތު ސިންގް ރާޖްޕުތުގެ ކާމިޔާބު ފިލްމު "އެމްއެސް ދޯނީ" ގެ އިތުރު އެކްޓަރެއް ދަންޖެހިގެން މަރުވެއްޖެ އެވެ.
މި ފިލްމުގައި ސުޝާންތުގެ ރައްޓެއްސެއްގެ ރޯލު ކުޅުނު ސަންދީޕް ނަހަރް ދަންޖެހިގެން މަރުވެފައި ހުއްޓާފެނުނީ އިއްޔެގެ ވަގުތެއްގަ އެވެ. އޭނާ މަރުވެފައި ހުއްޓާ ފެނުނީ މުމްބާއީގައި އޭނާ ދިރިއުޅުނު ގޭގައެވެ. އޭނާ މަރުވުމުގެ ކުރިން "ސޫސައިޑް ނޯޓް" ވީޑީއޯއެއް ފޭސްބުކްގައި ހިއްސާކޮށްފައި ވެއެވެ.
ފިލްމީ ތަރި ސަންދީޕް އާންމުކޮށް ފެނިގެން ގޮސްފައިވަނީ ކުދި ކުދި ރޯލުތަކުންނެވެ. އެގޮތުން "އެމްއެސް ދޯނީ"ގެ އިތުރުން އަކްޝޭގެ "ކޭސަރީ" އާއި ސޮނާކްޝީގެ "ޚާންދާނީ ޝަފާޚާނާ" ފާހަގަކޮށްލެވެއެވެ.
View this post on Instagram
އޭނާ ފޭސްބުކް ގައި ހިއްސާކޮށްފައިވާ ވީޑިއޯގައި މިވަގުތުގެ ނަފްސާނީ ގޮތުން އެތަށް ކަންތައްތަކާ ކުރިމަތިލާންޖެހިފައިވާކަމަށް ވަނީ ބުނެފައެވެ. އޭނާގެ މި ފޭސްބުކް ވީޑިއޯގައި މަސައްކަތުގެ ދާއިރާއާއި އަމިއްލަ ދިރިއުޅުމުގައި ދިމާވެފައިވާ އެތަށް ކަމެއްގެ ވާހަކަ ވަނީ ދައްކާފައެވެ. އެގޮތުން އޭނާގެ ކައިވެނީގައި ދިމާވެފައިވާ މައްސަލަތައް ވަކިން ބޮޑަށްވަނީ ފާހަގަކޮށްފަ އެވެ. ނަމަވެސް މިކަމުގައި އޭނާގެ އާއިލާވެސް އަދި އަންހެނުންވެސް ކުށްވެރި ނުކުރުމަށް، 10 ވަރަކަށް މިނިޓްގެ މި ވީޑިއޯގައި އޭނާ ވަނީ އެދިފައެވެ.
މީގެ އިތުރުން އެނާއަށް ފިލްމު އިންޑަސްޓްރީގައި ކުރިމަތިލާންޖެހުނު ކަންކަމުގެ ވާހަކަވެސް ވަނީ ކިޔައިދީފަ އެވެ. ފުލުހުން ބުނީ މި ވީޑިއޯ ރެކޯޑްކޮށްފައި ވާކަމަށް ބެލެވެނީ އޭނާ މަރުވުމުގެ 3 ގަޑީރު ވަރު ކުރިންނެވެ.
މި މައްސަލަ ފުލުހުން މިހާރު ގެންދަނީ އިތުރަށް ތަހުގީގު ކުރަމުންނެވެ. އަދި މިކަމާ ގުޅިގެން ސަންދީޕްގެ އަންހެނުންނާއި މައިދައިތަގެ މައްޗަށް އޭނާގެ މަރުގައި އިހުމާލުވުމުގެ މައްސަލައެއް ފުލުހުން ވަނީ ފައިލްކޮށްފަ އެވެ.
