ވެސްޓް ބްރޮމްވިޗުން ޔުނައިޓެޑް ހިފަހައްޓައިފި

އިނގިރޭސި ޕްރިމިއާ ލީގުގައި ރޭ ވަރުގަދަ މެންޗެސްޓާ ޔުނައިޓެޑް މޮޅުވިޔަ ނުދީ ވެސްޓް ބްރޮމްވިޗް އަލްބިއަނުން ހިފަހައްޓައިފިއެވެ.

ވެސްޓް ބްރޮމްގެ ދަނޑުގައި ކުޅުނު މިމެޗް އެއްވަރުވީ އެއްލަނޑު އެއްލަނޑުންނެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗް ވެސްޓް ބްރޮމްއިން ފެށީ ވަރަށް ފޯރީގައެވެ. އެގޮތުން މެޗްގެ ދެވަނަ މިނެޓްގައި އެޓީމުންވަނީ ލަނޑެއް ޖަހާ މެޗްގެ ލީޑް ނަގާފައެވެ. މިލަނޑު އެޓީމަށް ޖަހާދިނީ ލޯން އެއްބަސްވުމެއްގެ ދަށުން ޖެނުއަރީމަހު އެޓީމާއި ގުޅުނު އެމްބާޔޭ ޑިއާންގނަރއެވެ.

މިމެޗްގައި ގިނަ އިރު ބޯޅަ ގެންގުޅެ ގިނަ ހަމަލާ އުފެއްދި ޔުނައިޓެޑުން މިމެޗްގައި ޖެހި ހަމައެކަނި ލަނޑު މެޗްގެ 44 ވަނަ މިނެޓްގައި ޖަހާދިނީ ބްރޫނޯ ފެނާންޑޭޒްއެވެ.

ރޭގެ ޕޮއިންޓާ އެކު ޔުނައިޓެޑް ވަނީ ލީގުގެ ދެ ވަނަ އަށް ޖެހިލައިފަ އެވެ. އެއީ ތިން ވަނައިގައި އޮތް ލެސްޓާ ސިޓީއާ އެއްވަރަށް ޕޮއިންޓް ހޯދައިގެންނެވެ. ޔުނައިޓެޑާއި ލެސްޓާ އަށް ވެސް 24 މެޗުން 46 ޕޮއިންޓް ލިބިފައިވާއިރު، ޔުނައިޓެޑަށް ކުރި ލިބެނީ ލަނޑުގެ ތަފާތުންނެވެ. މި ޕޮއިންޓާ އެކު ވެސްޓް ބްރޮމް ލީގުގެ 19 ވަނައިގައި އޮތީ 24 މެޗުން 13 ޕޮއިންޓް ހޯދައިގެންނެވެ.