ހޮފެންހަމްއަތުން ބަލިނުވެ ޑޯޓްމަންޑް ސަލާމަތްވެއްޖެ

ޖަރުމަނު ބުންޑަސްލީގާގައި ބްރޫޝިޔާ ޑޯޓްމަންޑް ބަލިނުވެ ސަލާމަތް ވެއްޖެއެވެ.

އަމިއްލަ ދަނޑުގައި ހޮފެންހަމްއާ ވާދަކޮށް ޑޯޓްމަންޑް އެއްވަރުވީ 2-2 ލަނޑުންނެވެ. މެޗުގައި ހޮފެންހަމް އަށް ލަނޑުތައް ކާމިޔާބުކޮށްދިނީ މުނަސް ޑަބުރްގެ އިތުރުން އިއްލަސް ބެބޯއީއެވެ. ޑޯޓްމަންޑްގެ ފުރަތަމަ ލަނޑު ޖޯޑަން ސަންޗޯ ކާމިޔާބުކޮށްދިންއިރު ނަތީޖާ ޑޯޓްމަންޑް އިން ހަމަހަމަކުރީ އާލިން ހާލަންޑް ކާމިޔާބުކޮށްދިން ލަނޑުންނެވެ. މިއީ ސަންޗޯ މި ސީޒަންގައި ކާމިޔާބުކުރި 6 ވަނަލަނޑެވެ. އަދި ހާލަންޑުގެ ލަނޑާއެކު އޭނާ މި ސީޒަނުގައި ކުލަބަށް ޖަހައިދިން ލަނޑުގެ އަދަދުވަނީ 21 އަރާފައެވެ.

ރޭ ލީގުގައި ކުޅުނު އެހެން މެޗުތަކަށް ބަލާއިރު ބަޔާ ލެވަކޫސަން މޮޅުވާން ދަނިކޮށް މެއިންޒް ވަނީ ހުއްޓުވާފައެވެ. ލެވަކޫސަން އާއި މެއިންޒް ވާދަކުރި މެޗު 2-2 ލަނޑުން އެއްވަރުވިއިރު މެޗު ފަހު ދެލަނޑު މެއިންޒްއިން ކާމިޔާބުކުރީ ފަހު ދެމެނިޓުގައިއެވެ. ސްޓްރުޓްގާޓް އާއި ހާތާ ބާލިން ވާދަކުރި މެޗު ނުމުނީ 1-1 ލަނޑުން އެއްވަރުވެގެންނެވެ. މެޗުގެ 82 ވަނަ މިނުޓުގައި ހާތާބާލިން ނަތީޖާ ހަމަހަމަކުރީ ލުކާ ނެޒް ކާމިޔާބުކޮއްދިން ލަނޑުންނެވެ. މިއީ ބުންޑަސް ލީގާގެ ތާރީހުގައި ލަނޑުޖެހި އެންމެ ޒުވާން ޑިފެންޑަރުއެވެ.

ވާޑާ ބްރޭމަން އާއި ފްރެއިބާގް ވާދަކުރި މެޗު އެއްވަރުވި އިރު ޔޫނިއަން ބާލިން އާއި ޝާލްކޭ ވާދކުރި މެޗު ވެސް ނިމުނީ ލަނޑެއް ނުޖެހި އެއްވަރުވެގެންނެވެ. މިނަތީޖާ އެކު މިދި ބުރާސްފަތި ދުވަހު ދުނިޔޭގެ ކުލަބުތަކުގެ ޗެމްޕިއަންކަން ހޯދި ބަޔާން މިއުނިކް ލީގެ ކުރީގައި އޮތީ ހަތަރު ޕޮއިންޓުގެ ލީޑަކާއެކުއެވެ.

ބަޔާން މިއުނިކް އެއްވަނައިގަ އޮތީ 48 ޕޮއިންޓާއެކުއެވެ. ދެވަނާގައިވާ ލީޕްޒިގްވަނީ 44 ޕޮއިންޓް ހޯދާފައެވެ. ވޮލްފްބާގް ތިންވަނައިގަ އޮތީ 38 ޕޮއިންޓާއެކުއެވެ. ލެވަކޫސަން 36 ޕޮއިންޓާއެކު ލީގުގެ ހަތަރުވަނަ ކުރިޔަށް ޖެހުނު އިރު ފަސްވަނާގައި ފްރޭންފާޓް އޮތީ ހަމަ މިއަދަދަށް ޕޮއިންޓް ހޯދައިގެންނެވެ. ޑޯޓްމަންޑް ހަވަނާގައި އޮތީ 33 ޕޮއިންޓާއެކުއެވެ.