ކޭސްތައް ހުރިގޮތުން ލީގު ފެށުމަށް ހުއްދަ ދެވޭކަށް ނެތް: ޓެގް

ދިރާގު ދިވެހި ޕްރިމިއާ ލީގު އަލުން ފަށަން ހުއްދަ ދެވެން އަދި ނެތް ކަމަށް ޓެކްނިކަލް އެޑްވައިޒަރީ ގުރޫޕް (ޓެގް) އިން ވިދާޅުވެއްޖެއެވެ.

އެޗްޕީއޭއިން ރޭ ބޭއްވި ނޫސްވެރިންގެ ބައްދަލުވުމުގައި ޓެކްނިކަލް އެޑްވައިޒަރީ ގުރޫޕް (ޓެގް) ގެ ލީޑަރު ޑރ. އަލީ ލަތީފް ވިދާޅުވީ މިހާރު އެންމެ އިސް މަސައްކަތެއްގެ ގޮތުގައި ކުރަނީ ބަލި ކޮންޓްރޯލް ކުރުމުގެ ކަންތައްތައް ކަމަށާއި ލުޔެއް ދެވޭނީ ޒަރޫރީ ކަންތައްތަކަށް އެކަނި ކަމަށެވެ. ޑރ.ވިދާޅުވީ މިހާރު ރާއްޖޭގައި ޚާއްސަކޮށް މާލޭގައި ކޭސްތައް ފެންނަ ނިސްބަތަށް ބަލައި ކުޅިވަރު ހަރަކާތްތައް ފެށުމުގެ ހުއްދަ ދިނުމަކީ ފަސޭހަކަމެއް ނޫންކަމަށެވެ.

ކޯވިޑް-19 އަށް ޕޮޒިޓިވްވާ މީހުންގެ އަަދަދު އިތުރުވެ ބަލީގެ ނުރައްކާ ބޮޑުވެފައިވާތީ މާލެ ސަރަހއްދުގައި ވަނީ ހަރުކަށި ގިނަ ފިޔަވަޅުތައް އަޅާފައެވެ. އެގޮތުން މާލެ ސަރަަހައްދުގައި ކުޅިވަރު ހަރަކާތްތައް ކުރިއަށް ނުގެންދިއުމާއި، ސްކޫލުތަކުގެ ގްރޭޑް 6 ކުން ފެށިގެން ދަށުގެ ގްރޭޑުތަކަށް ސްކޫލު ބަންދު ކުރުމާއި، އިރު އޮއްސި 6 އިން ހެނދުނު 6 ޖެހުމާއި ހަމަޔަށް ވެހިކަލް ނުދުއްވޭގޮތަށް ވަނީ ބަދަލު ގެނެސްފައެވެ.

ދިވެހި ލީގު މެދު ކަނޑާލުމާއި ގުޅިގެން ލީގުގައި ވާދަކުރާ ގިނަ ޓީމުތަކުން ކަންބޮޑުވުން ފާޅު ކުރަމުންދާއިރު، ލީގު ދެން އަލުން ފެށޭނެ ތާރީހެއްވެސް އެގޭނީ ކޯވިޑްގެ ކޭސްތަކަށް ވާ ގޮތުންކަމަށް ރޭގެ ޕްރެސްގައި ޑރ. އަލީ ލަތީފް ދެއްކެވި ވާހަތަކުން އެގެއެވެ.

ކޯވިޑް-19 ގެ ކޭސްތައް އަނެއްކާ ވެސް ގިނަވާތީ އެޗްޕީއޭ އިން އެޅި ރައްކާތެރިކަމުގެ ފިޔަވަޅުތަކުގެ ތެރެއިން ދިރާގު ދިވެހި ޕްރިމިއާ ލީގު މެދުކަނޑާލީ މި މަހު ތިން ވަނަ ދުވަހު އެވެ. ދިވެހި ލީގުގެ އިތުރުން ވޯލްޑް ކަޕް/ އޭޝިއަން ކަޕް ޖޮއިންޓް ކޮލިފައިންގައި އަންނަ މަހު 30 ވަނަ ދުވަހު މާލޭގައި ރާއްޖޭގެ ގައުމީ ޓީމުން ސީރިއާއާ ދެކޮޅަށް ކުޅޭ މެޗު ވަނީ ޝެޑިއުލްކޮށްފަ އެވެ. ލީގު މި ގޮތަށް މެދުކަނޑާލާފައި އޮތުމުން އެ މެޗަށް ތައްޔާރުވާން ގައުމީ ޓީމުގެ ކުޅުންތެރިންނަށް އަސަރުކުރާނެ ކަމަށް ގައުމީ ކޯޗު މާޓިން ކޫޕްމަން ވެސް ވަނީ ބުނެފައެވެ.