ބަޑިބޭހުގެ ކުޅިވަރުތައް ކުޅުމަށްޓަކާ ބޭނުންކުރާ ބަޑިބޭސް، އުފައްދާ ފެކްޓަރީއެގައި ގޮވުންތަކެއް ގޮވާ ހިގި އަލިފާނުގެ ހާދިސާއެއްގައި 11 މީހުން މަރުވެ 34 މީހަކު ޒަޚަމް ވެއްޖެއެވެ.
ޕޮލިސް އޮފިސަރ ރާޖް ނަރަޔާނަން ބައެއް މީޑިއާތަކަށް މައުލޫމާތު ދީފައިވާ ގޮތުގައި، އިންޑިއާގެ ޓެމިލްނާޑޫގެ ވިރުދުނަގަރު ޑިސްޓްރިކްޓުގައި ހުންނަ މި ފެކްޓަރީގައި ހިގި ބާރުގަދަ ގޮވުންތަކުގައި ޒަޚަމްވީ މީހުންނަށް ފަރުވާ ދިނުމަށްޓަކާ މިހާރުވަނީ ކައިރި ހޮސްޕިޓަލްތަކަށް ގެންދެވިފައެވެ.
ފެކްޓަރީގައި ބަޑިބޭސް ގޮވާ، ކައިރީގައި ހުރި، 4 ޕެޓްރޯލް ޝެޑެއްވެސް އަދާ ހުލިވެފައިވާއިރު، ރޯވި މިއަލިފާންގަޑު ނިއްވާލެވުނީ، އަލިފާން ނިއްވާ ބޮޑެތި 10 ވެހިކަލް ބޭނުން ކޮށްގެން ކަމުގައިވެސް ފުލުހުން މައުލޫމާތު ދީފައިވެއެވެ.
ދަ ޕްރެސް ޓްރަސްޓް އޮފް އިންޑިއާއިން މައުލޫމާތު ދީފައިވާ ގޮތުގައި، ފެކްޓަރީގައި ގޮވުންތައް ގޮވާފައިވަނީ، ފެކްޓަރީގައި މަސައްކަތްކުރާ މުވައްޒަފުން، ބަޑިބޭހުގެ ކުޅިވަރުތަކަށް ބޭނުންވާ ކެމިކަލްތައް އެއްކުރަމުންދަނިކޮށެވެ.
ބަޑިބޭހުގެ ކުޅިވަރުތަކަކީ އިންޑިއާގައި ވަރަށް ބޮޑު ވިޔަފާރިއެކެވެ. މިގޮތުން ދީނީ އިހުތިފާލްތަކުގައާއި އަދި ކައިވެނި ހަފްލާތަކުގައި އާންމުކޮށް އިންޑިއާގައި ބަޑިބޭހުގެ ކުޅިވަރުތައް ބާއްވައެވެ.
އަގުހެޔޮކޮށް ބަޑިބޭސް ވިއްކުކަށްޓަކާ އިންޑިއާގައި ގަވާއިދާ ޚިލާފަށް ބަޑިބޭސް އުފައްދާ އެތަކެއް ފެކްޓަރީތަކެއް ހުރެއެވެ.
މިގޮވުންތައް ގޮވާފައިވަނީ، ޓެމިލްނާޑޫގެ ވެރިރަށް ޗެންނާއިގެ ދެކުނުން 520 ކިލޯމީޓަރު ދުރުގައި އޮންނަ ސަރަހައްދެއްގައެވެ.
