ކުލަބު ވޯލްޑްކަޕް ބަޔާން ކާމިޔާބުކޮށްފި

މެކްސިކޯގެ ޓިގްރެސް 1-0 އިން ބަލިކޮށް ޖަރުމަނުގެ ބަޔާނުން މިއުނިކުން ފީފާ ކްލަބް ވޯލްޑް ކަޕް ކާމިޔާބުކޮށްފި އެވެ.

ފުރަތަމަ ހާފުގައި ބަޔާންގެ ޔޯސުއާ ކިމިޗް ޖެހި ގޯލެއް ބަލައިނުގަންނަން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހުއެވެ. އަދި ލެރޯއި ސާނޭ ޖެހި ބޯޅައެއް ވަނީ ގޯލުގެ ދަނޑިއަށް އަމާޒުވެފައެވެ. ބަޔާނަށް މި މެޗުގައި ޖެހި ހަމައެކަނި ގޯލު މެޗުގެ 59 ވަނަ މިނިޓްގައި ރޮބަޓް ލެވަންޑޯސްކީ ދިން ބޯޅައަކުން ކާމިޔާބުކުރީ ޕަވާޑް އެވެ.

ބަޔާނުން އެންމެ ފުރަތަމަ ކްލަބް ވޯލްޑް ކަޕް ކާމިޔާބުކުރީ 2013 ވަނަ އަހަރު އެވެ. އެ ފަހަރުގެ ފައިނަލުގައި ބަޔާން ވަނީ 2-0 އިން މޮރޮކޯގެ ރަޖާ ކަސަބްލަންކާ ބަލިކޮށްފަ އެވެ. ރޭގެ ކާމިޔާބީއާ އެކު ބަޔާނުން ވަނީ އެއް ސީޒަނެއްގެ ހަ ތަށި އުފުލާލައިގެން 2009 ވަނަ އަހަރު ބާސެލޯނާ ހަދާފައިވާ ރެކޯޑާ ހަމަކޮށްފައެވެ.

ބަޔާންގެ ކޯޗުކަމާ 2019 ވަނަ އަހަރުގެ ނޮވެމްބަރު މަހު ހަންސީ ފްލިކް ހަވާލުވި ފަހުން އެ ޓީމު ކުޅުނު 68 މެޗުގެ ތެރެއިން 58 މެޗުން ވަނީ މޮޅުވެފަ އެވެ. އަދި 68 މެޗުން ވަނީ 6 ތަށި ކުލަބަށް ކާމިޔާބުކޮށްދީފައެވެ.