މޫސުމަށް އަންނަ ބަދަލުތަކާ ގުޅިގެން ރާއްޖެއަށް މާލީ އެހީދޭކަށް އަޅުގަނޑުމެން ނުބުނަން: ރައީސް ނަޝީދު

މޫސުމަށް އަންނަ ބަދަލުތަކާއި ގުޅިގެން ރާއްޖެއަށް މާލީ އެހީތެރިކަން ފޯރުކޮށްދިނުމަށް ރާއްޖެއިން ވަކާލާތު ނުކުރާކަމަށާއި، ރާއްޖެއިން ގޮވާލަނީ އެދާއިރާއިން ވިޔަފާރިކުރުމަށްކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

މަޖިލީހުގެ ރައީސް މިހެން ވިދާޅުވީ، މޫސުމަށް އަންނަ ބަދަލުތަކާއި ގުޅިގެން ދުނިޔެއަށް ކުރިމަތިވާ ނުރައްކާ ކުޑަކުރުމުގެ ގޮތުން ޖައްވަށް ބޭރުކުރާ ގްރީން ހައުސް ގޭސް މަދުކުރުމަށް ޤައުމުތަކުން ކަނޑައަޅާފައިވާ ލަނޑުދަނޑިތައް، މައްޗަށް ޖެއްސުމަށް ރާއްޖެއިން ބާރުއަޅާ ދުނިޔެއިން ނަމޫނާ ދެއްކުމަށް އިތުރަށް މަސައްކަތްކުރުމަށް ގޮވާލާ ހޯރަފުށީ ދާއިރާގެ މެންބަރު އަޙްމަދު ސަލީމް ހުށައެޅުއްވި މައްސަލައަށް އިޝާރާތްކުރައްވާ ވާހަކަފުޅު ދައްކަވަމުންނެވެ.

ބޭރުގެ ޤައުމުތަކުން ރާއްޖެއަށް ލާރިދޭނެކަމެއްނެތް. އަޅުގަނޑުމެން މާވަރަކުން ކުޔަމަކުން ނުވެސް ހިނގަމު އެހީދޭށެކޭވެސް. ވިޔަފާރިކުރަން އަޅުގަނޑުމެންނާއެކު ކުރުމަށް އަންނާނާށޭ އަޅުގަނޑުމެން މިބުނަނީ. މިއީ ވިޔަފާރީގެ ގޮތުން ދެކޮޅުޖެހޭ ކަމެއްކަމަށް.

-މަޖިލީހުގެ ރައީސް މުހައްމަދު ނަޝީދު

ރައީސް ނަޝީދު ވިދާޅުވީ، މޫސުމަށް އަންނަ ބަދަލުތަކާއި ގުޅޭގޮތުން ޤައުމުތަކަށް ކުރާ ނޭދެވޭ އަސަރުތަކުގެ މައިގަނޑު އަސާސަކީ ރައްޔިތުންނާއި ޤައުމުތަކުން ކުރާ މަސައްކަތްތަކެއްގޮތަށް އޮތް އޮތުމަށް މިހާރު ބަދަލު އައިސްފައިވާކަމަށެވެ. އެގޮތުން ފާއިތުވި ދިހަވަރަކަށް އަހަރުގެ ތެރޭގައި މޫސުމަށް އަންނަ ބަދަލުތަކަކީ އިޤްތިޞާދީ މައްސަލައަކަށް ބަދަލުވެފައިވާކަމަށެވެ. އެމަނިކުފާނު ވިދާޅުވީ ރާއްޖެއަށް ލިބެންހުރި ގުދުރަތީ ވަސދީލަތްތައް ބޭނުންކޮށްގެން އަހަރަކު ރާއްޖެށް ލިބޭ ފަސްސަތޭކަ މިލިއަށް ރުފިޔާއަށްވުރެ ބޮޑު ބައެއް ސަލާމަތްކުރެވޭނެކަމަށެވެ.

ފާއިތުވި 10 އަހަރު މިކަމާމެދު ދެކޭގޮތް ބަދަލުވެއްޖެ، މިއީ މިހާރު އިޤްތިޞާދީ މައްސަލައަކަށް ބަދަލުވެފައިވާކަމެއް. ރާއްޖެއަށް އަހަރަކަށް ފަސްސަތޭކަ މިލިއަށްވުރެ ބޮޑު ބައެއް ސަލާމަތްކުރެވެން އެބައޮތް. ލިބެންހުރި ގުދުރަތީ ވަސީލަތެއް އިރުގެ ދޯއްޔަކީ. އެމަގަށް ގޮވާލާ މައްސަލައެއް މިމައްސަލައަކީ.

-މަޖިލީހުގެ ރައީސް މުހައްމަދު ނަޝީދު

ރައީސް ނަޝީދުގެ ވާހަކަފުޅުގައި މޫސުމަށް އަންނަ ބަދަލުތަކާއި ގުޅިގެން ތިމާވެށްޓައި ރަށްޓެހިކޮށް ރާއްޖޭގައި ކުރިއަށްގެންދެވޭނެ މަޝްރޫޢުތައް ބޭރުގެ އިންވެސްޓަރުންނަށް ސާފުވާންޖެހޭކަމަށާއި އެގޮތުން ކަރަންޓް އުފައްދާނަމަ އެކަރަންޓް ވިއްކޭނެ ގޮތް ސާފުވާންޖެހޭކަމަށްވެސް ވިދާޅުވިއެވެ.

ރައީސް ނަޝީދަކީ މޫސުމަށް އަންނަ ބަދަލުތަކާއި ގުޅިގެން ދުނިޔެއަށްކުރާ ނޭދެވޭ އަސަރުކަތާއި ގުޅޭގޮތުން ވަކާލާތުކުރަމުން އަންނަ ލީޑަރެކެވެ.